-
2027 மார்ச் மாதத்திற்குள் பொருளாதார அபாயங்களைத் தவிர்ப்பதற்கு மக்கள் நலன் சார்ந்த புதிய திட்டம் தேவை - சஜித்
-
நீட்டிக்கப்பட்ட நிதி வசதியிலிருந்து வெளியேறுதல் மற்றும் நாட்டின் நிதி ஸ்திரத்தன்மை குறித்து எதிர்க்கட்சித் தலைவர் விளக்கம்
சர்வதேச நாணய நிதியத்துடன் (IMF) நிலவும் நீட்டிக்கப்பட்ட நிதி வசதி (EFF) திட்டம் 2027 ஆம் ஆண்டு மார்ச் மாதத்துடன் நிறைவடைந்த பின்னர், நாட்டின் பொருளாதாரம் அபாயத்திற்கு உள்ளாகாமல் முன்னோக்கிச் செல்வதற்கு மக்களுக்கு நிவாரணம் அளிக்கும் புதிய பதிலீட்டு (Successor) வேலைத்திட்டமொன்றில் நுழைவது அத்தியாவசியமானது என எதிர்க்கட்சித் தலைவர் சஜித் பிரேமதாச தெரிவித்துள்ளார்.
தற்போதைய IMF கடன் நிவாரணத் திட்டம் நிறைவடைவதைத் தொடர்ந்து அரசாங்கம் அந்த உடன்படிக்கையிலிருந்து வெளியேறும் என அமைச்சர் பிமல் ரத்நாயக்க வெளியிட்டிருந்த கூற்றுத் தொடர்பாக விசேட அறிக்கையொன்றை விடுத்து எதிர்க்கட்சித் தலைவர் இதனை வலியுறுத்தினார்.
பொருளாதாரப் புத்துயிர்ப்பும் புதிய உடன்படிக்கையின் அவசியமும்
தற்போதைய கடன் வசதி 2027 மார்ச் மாதத்தில் நிறைவடைந்தாலும், நாட்டின் பொருளாதாரத்தை இயல்பு நிலைக்குக் கொண்டுவரும் செயல்முறை இன்னும் முழுமையடையவில்லை என எதிர்க்கட்சித் தலைவர் சுட்டிக்காட்டுகிறார். நடைமுறையிலுள்ள திட்டத்திற்குள் நாடு குறிப்பிட்டளவு ஸ்திரத்தன்மையை அடைந்தது சாதாரண மக்களைக் கடுமையான பொருளாதார நெருக்கடிக்கு உள்ளாக்கியே எனக் குறிப்பிட்ட அவர், இனிவரும் காலத்தில் தேவைப்படுவது மக்களின் சுமையைக் குறைக்கும் மற்றும் பொருளாதார வளர்ச்சிக்கு வழிவகுக்கும் ஒரு வேலைத்திட்டமே என்றார்.
"கடன் நிலைபேற்றுத் தன்மையை உறுதிப்படுத்தி, அந்நியச் செலாவணி கையிருப்பை பலமான மட்டத்தில் பேணக்கூடிய மற்றும் சர்வதேசக் கடன் வழங்குநர்களின் நம்பிக்கையைப் பாதுகாக்கும் பொறிமுறையொன்று நாட்டிற்குத் தேவை. வறுமையை ஒழிக்கும், ஏற்றுமதியை ஊக்குவிக்கும், விவசாயிகள், மீனவர்கள் உட்பட நாட்டின் 220 லட்சம் மக்களுக்கும் பலன் கிடைக்கும் பதிலீட்டு உடன்படிக்கையொன்றிற்குச் செல்வது இங்கு மிகத் தீர்மானமிக்கது," என அவர் குறிப்பிட்டார்.
கடன் சுமையும் பேரினப் பொருளாதார இலக்குகளும்
நாடு எதிர்கொண்டுள்ள நிதி யதார்த்தத்தைப் பொதுமக்கள் சரியாகப் புரிந்துகொள்ள வேண்டும் எனக் குறிப்பிட்ட சஜித் பிரேமதாச, சர்வதேச நாணய நிதியத்தின் கணிப்புகளின்படி 2026 ஆம் ஆண்டில் மொத்த அரசாங்கக் கடன் மொத்த உள்நாட்டு உற்பத்தியில் (GDP) 100% ஆகவும், 2027 இல் 96% ஆகவும் இருக்கும் என மதிப்பிடப்பட்டுள்ளதாக விளக்கினார்.
இது தவிர, வெளிநாட்டுக் கடன் சதவீதம் 2026 இல் 51% ஆகவும், 2027 இல் 52% ஆகவும் இருக்கும் என்றும், வருடாந்தக் தவணைக் கட்டணங்கள் மற்றும் வட்டிச் செலுத்தல்களுக்குக் கணிசமான சதவீதத்தை ஒதுக்க வேண்டியுள்ளதாகவும் அவர் சுட்டிக்காட்டினார். IMF இலக்குகளை அடைவதற்கு அரசாங்கக் கடனை மொத்த உள்நாட்டு உற்பத்தியில் 95% க்கும் குறைவாகப் பேணுதல் உட்படப் பல நிபந்தனைகள் காணப்படுவதால், கடன் மறுசீரமைப்பிற்கு அப்பாற்பட்ட நிலையான பொருளாதாரப் பாதையொன்று நாட்டிற்குத் தேவை என அவர் சுட்டிக்காட்டுகிறார்.
வெளிநாட்டு கையிருப்பும் உலகளாவிய சந்தை அபாயங்களும்
சர்வதேச நாணய நிதியத்தின் மதிப்பீடுகளின்படி இலங்கையின் உத்தியோகபூர்வ கையிருப்பு மட்டம் 2026 இல் 8.65 பில்லியன் அமெரிக்க டாலர்களாகவும், 2027 ஆம் ஆண்டளவில் 11.8 பில்லியன் டாலர்களாகவும் உயரும் என எதிர்பார்க்கப்படுவதாக எதிர்க்கட்சித் தலைவர் நினைவூட்டினார். பொதுவாக ஒரு நாட்டிற்கு மூன்று மாத இறக்குமதித் தேவைகளை ஈடுசெய்யும் வகையில் வெளிநாட்டு கையிருப்பு இருப்பது சர்வதேசத் தரநிலை எனச் சுட்டிக்காட்டிய அவர், உலகளாவிய சந்தையில் ஏற்படக்கூடிய எதிர்பாராத அதிர்ச்சிகளுக்கு மத்தியில் அந்த கையிருப்பை பாதுகாப்பாகப் பேணுவதன் முக்கியத்துவத்தையும் விளக்கினார்.
பேரினப் பொருளாதார ஸ்திரத்தன்மை குறித்து அதிகாரிகள் அறிக்கைகளை வெளியிட்டாலும், சாதாரண மக்கள் இன்னும் வாழ்க்கைச் செலவு மற்றும் உயர் பணவீக்கம் காரணமாகச் சிரமங்களை எதிர்கொள்வதாக எதிர்க்கட்சித் தலைவர் குறிப்பிட்டார்.