சிறையிலுள்ள மகன் நாமலுக்கு தந்தை மஹிந்தவின் கடிதம்; 'பழிவாங்கல்கள் வேண்டாம்; நீதிமன்றத்தை நம்புங்கள்!'

சர்ச்சைக்குரிய கிரிஷ் (Krrish) நிறுவனக் கொடுக்கல் வாங்கல் தொடர்பான பணமோசடிக் குற்றச்சாட்டின் கீழ் விளக்கமறியலில் வைக்கப்பட்டுள்ள நாடாளுமன்ற உறுப்பினர் நாமல் ராஜபக்சவின் பிணைக் கோரிக்கையைக் கொழும்பு நீதவான் நீதிமன்றம் நிராகரித்துள்ளது.

அவரது வழக்கறிஞர்கள் சமர்ப்பித்த வாதங்களைக் பரிசீலித்த கொழும்பு முதன்மை நீதவான் அஸங்க எஸ். போதரம, நாமல் ராஜபக்ச மற்றும் அந்நிறுவனத்தின் முன்னாள் பணிப்பாளரான ஜானகி சிறிவர்தன ஆகியோரை நவம்பர் 6 ஆம் திகதி வரை மேலும் விளக்கமறியலில் வைக்குமாறு உத்தரவிட்டார்.

"அரசியலுக்கு வருகிறீர்கள் என்றால் சிறைக்குச் செல்லத் தயாராக வாருங்கள்"

நீதிமன்றத் தீர்ப்பு அறிவிக்கப்பட்டதும், கொழும்பு நவலோக வைத்தியசாலையில் சிகிச்சை பெற்றுவரும் முன்னாள் அதிபர் மஹிந்த ராஜபக்ச, சிறையில் அடைக்கப்பட்டுள்ள தனது மூத்த மகனுக்கு உணர்வுபூர்வமான கடிதமொன்றை அனுப்பி வைத்துள்ளார்.

2010 ஆம் ஆண்டில் நாமல் தீவிர அரசியலில் இணைந்துகொள்வதற்கான அனுமதியைக் கோரிய சந்தர்ப்பத்தை நினைவுகூரும் முன்னாள் அதிபர், "விருப்பமென்றால் அரசியலுக்கு வாருங்கள்; ஆனால் சிறைக்குச் செல்லவும், துயரங்களைச் சகிக்கவும் தயாராக வாருங்கள்" என அன்று தான் வழங்கிய அறிவுரையை இதன்போது மீட்டிப் பார்க்கிறார்.

தான் அரசியலில் களமிறங்கிய ஆரம்பக் காலப்பகுதியில் அப்போதைய அரசாங்கம் முன்வைத்த குற்றச்சாடுகளுக்கு மத்தியில் சிறைவாசம் அனுபவித்த விதியினைச் சுட்டிக்காட்டும் அவர், வெளிப்புறக் கருத்துக்கள் எவ்வாறிருப்பினும் ஒரேயொரு நம்பிக்கை நீதிமன்றம் மற்றும் சட்டம் மீதே வைக்கப்பட வேண்டும் என வலியுறுத்துகிறார்.

யோஷிதவின் வழக்கு, இளையோர் வேலைவாய்ப்புகள் மற்றும் 'பழிவாங்காமை' நிலைப்பாடு

யோஷித ராஜபக்ச கடற்படைச் சேவையில் இணைந்தமை தொடர்பில் சட்ட நடவடிக்கைகள் எடுக்கப்பட்டுள்ளமை சுட்டிக்காட்டும் முன்னாள் அதிபர், தனது ஆட்சிக் காலத்தில் தற்போதைய அரசாங்கத்தின் பிரமுகர்களின் பிள்ளைகளுக்குக் கூட வேலைவாய்ப்புகள் வழங்கப்பட்ட கடந்த காலத்தை நினைவுகூருகிறார்.

எனினும் எதிர்காலத்தில் எப்போதாவது அரச அதிகாரம் கைகளுக்குக் கிடைக்கும் பட்சத்தில் அத்தகைய எவரையும் பின்தொடர்ந்து செல்ல வேண்டாம் என அவர் நாமல் ராஜபக்சவிற்கு அறிவுறுத்துகிறார். பெற்றோர்கள் செய்த செயல்களுக்குப் பிள்ளைகள் பலியாகக் கூடாது என்பதுடன், பழிவாங்காமல் இருப்பதே தங்களது அரசியல் நடைமுறையாக இருக்க வேண்டும் என அதில் குறிப்பிடப்பட்டுள்ளது.

நவலோக வைத்தியசாலையிலிருந்து சிறைக் கூண்டுக்குச் சென்ற செய்தி

மஹிந்த ராஜபக்ச மற்றும் ஷிராந்தி ராஜபக்ச தம்பதியினர் தற்போது நாமல் பிறந்த நவலோக வைத்தியசாலையிலேயே சிகிச்சை பெற்று வருகின்றனர். ரோஹித மற்றும் யோஷித ஆகியோர் பெற்றோரின் நலம் விசாரிக்கும் தருணத்தில் எழுதப்பட்ட இக்கடிதம், குடும்ப உறவுகளுக்கும் அரசியல் ஏற்றத்தாழ்வுகளுக்கும் மத்தியில் ஊசலாடும் சக்திவாய்ந்த உரையாடலாகும்.

யுத்தத்தை நிறைவு செய்து நாட்டை விடுவித்தமைக்காகச் சமூகத்தைப் பழி கூறப்போவதில்லை எனக் குறிப்பிடும் முன்னாள் அதிபர், தேர்தலில் தோல்வியடைந்த போதிலும் இந்நாட்டு மக்கள் நன்றியுணர்வுள்ள சமூகம் என்ற நம்பிக்கையுடன் செயற்படுமாறு அறிவுறுத்தி இக்கடிதத்தை நிறைவு செய்துள்ளார்.

முன்னாள் அதிபர் அனுப்பிய முழுமையான கடிதம்:

"அன்பார்ந்த நாமல்!

நீங்கள் அரசியலில் இணைவதை உத்தேசித்த 2010 ஆம் ஆண்டில் அதற்கான அனுமதியை என்னிடம் கோரியது உங்களுக்கு நினைவிருக்கும். அந்தச் சந்தர்ப்பத்தில் நான் உங்களுக்கு வழங்கிய அறிவுரையும் நினைவிருக்கும் என நினைக்கிறேன். 'விருப்பமென்றால் அரசியலுக்கு வாருங்கள். ஆனால் சிறைக்குச் செல்வது போன்றே துயரங்களைச் சகிக்கவும் தயாராக வாருங்கள். அதில் எனக்குத் தடையில்லை.'

நான் அவ்வாறு கூறியது நான் அரசியலுக்கு வந்து சில காலத்திற்குள் அன்றிருந்த அரசாங்கத்தினால் ஆதாரமற்ற குற்றச்சாட்டு ஒன்று சுமத்தப்பட்டு என்னைச் சிறையில் அடைத்ததனாலேயாகும். அந்தச் சமயம் நீங்கள் பிறக்கவில்லை. அன்றைய எனது ஒரே நம்பிக்கை நீதிமன்றம் மீது மட்டுமே இருந்தது. எவர் எதனைக் கூறினாலும் நீங்களும் நீதிமன்றம் மீது மாத்திரம் நம்பிக்கை வையுங்கள்.

தற்செயலாக அம்மாவும் நானும் இந்த நாட்களில் நீங்களும் பிறந்த நவலோக வைத்தியசாலையில் அனுமதிக்கப்பட்டுள்ளோம். உங்களது சகோதரர்களான யோஷித மற்றும் ரோஹித எங்களது நலம் விசாரிக்கின்றனர். யோஷித மீது ஒரு வழக்குத் தாக்கல் செய்யப்பட்டுள்ளது அவர் கடற்படை வேலைவாய்ப்பிற்குச் சென்றமைக்காகவே ஆகும். அந்தக்காலத்தில் நாம் வேலைவாய்ப்புகளை வழங்கிய ஆயிரக்கணக்கான இளைஞர்களுக்கு மத்தியில் இந்த அரசாங்கத்தின் பிரமுகர்களின் இளைய பிள்ளைகளும் இருந்தனர் என்பது உங்களுக்கும் நினைவிருக்கும் என நினைக்கிறேன். எனினும் உங்களுக்கு அதிகாரம் கிடைக்கும் எந்தவொரு சந்தர்ப்பத்திலும் அந்த நபர்களைப் பின்தொடர்ந்து செல்ல வேண்டாம்.

பெற்றோர்கள் செய்யும் செயல்களுக்குப் பிள்ளைகள் பலியாகக் கூடாது என்பதே எனது கருத்தாகும். பழிவாங்காமல் இருப்பதே ராஜபக்சக்களின் முறையாகும், பாரம்பரியமாகும்.

இந்நாட்டில் துயருறும் இலட்சக்கணக்கான மக்களுக்கு நாட்டை விடுவித்துக் கொடுத்த தவறுக்காக ராஜபக்சக்கள் இந்தச் சமூகத்தைக் குற்றவாளிகளாகக் கருதப்போவதில்லை. நாம் வாக்குகளிலிருந்து தோற்கடிக்கப்பட்டோம் எனினும் நாட்டின் மக்கள் நன்றியுணர்வுள்ள சமூகம் என எண்ணிச் செயற்படுங்கள்."