காலநிலை காரணமாக மலையக மற்றும் தாழ்நிலக் காய்கறி வகைகளின் விலைகள் உயர்வடைந்துள்ளன.
இதற்கமைய, கடந்த வாரம் 350 ரூபாவிற்கும் 400 ரூபாவிற்கும் இடைப்பட்ட விலையில் காணப்பட்ட தக்காளி கிலோவொன்றின் மொத்த விலை 600 ரூபாவிற்கும் 650 ரூபாவிற்கும் இடைப்பட்ட விலை வரை உயர்வடைந்துள்ளதாகத் தெரிவிக்கப்படுகிறது.
இதற்கு மேலதிகமாக, 250 ரூபா விலையில் காணப்பட்ட மாலு மிளகாய் (தேசி மிளகாய்) கிலோவொன்றின் விலை 400 ரூபாவிற்கும் 450 ரூபாவிற்கும் இடைப்பட்ட விலையாக உயர்வடைந்துள்ளதுடன், 150 ரூபாவாகக் காணப்பட்ட கோவா கிலோவொன்றின் மொத்த விலை 350 ரூபா வரை உயர்வடைந்துள்ளது.
பண்டிகைக் காலம் நெருங்கி வரும் நிலையில் காய்கறி விலைகள் மேலும் உயர்வடையக்கூடும் என மேனிங் சந்தைப் பொதுச் சங்கத்தின் முன்னாள் அமைப்பாளர் அணில் இந்திரஜித் தெரிவித்துள்ளார்.
இது தொடர்பில் கருத்துத் தெரிவித்த அணில் இந்திரஜித்,
"இத்தினங்களில் காய்கறி விலைகளில் உயர்வொன்று காணப்படுகிறது. அதற்குப் பிரதான காரணம் நாட்டில் நிலவும் காலநிலையாகும். அதிகபட்ச விலையாகத் தக்காளியின் விலை காணப்படுகிறது. அதன் மொத்த விலை 600 ரூபா போல் ஆகின்றது. அதேபோன்று போஞ்சி 400 ரூபாவிற்கும் 500 ரூபாவிற்கும் இடைப்பட்ட விலையில் உள்ளது. கரட் 200 ரூபாவிற்கும் 250 ரூபாவிற்கும் இடைப்பட்ட விலையில் உள்ளது. லீக்ஸ் 200 ரூபாவாகும். பச்சை மிளகாய் 350 ரூபாவிற்கும் 400 ரூபாவிற்கும் இடைப்பட்ட விலையில் உள்ளது. தாழ்நிலக் காய்கறி விலைகளும் உயர்வடைந்துள்ளன. புடலங்காய் கிலோவொன்று இத்தினங்களில் 400 ரூபா வரையிலான விலையில் விற்பனை செய்யப்படுகிறது. அதேபோன்று பீர்க்கங்காய் 200 ரூபாவிற்கும் 250 ரூபாவிற்கும் இடைப்பட்ட விலையில் உள்ளது. பூசணிக்காய் விலையும் இத்தினங்களில் உயர்வடைந்துள்ளது. கிலோவொன்றின் விலை 200 ரூபாயைக் கடந்துள்ளது. வெள்ளரிக்காய் மற்றும் கெக்கரி போன்ற காய்கறிகள் மட்டுமே 100 ரூபாவிற்கும் குறைந்த விலையில் உள்ளன. ஒட்டுமொத்தமாகப் பார்க்கும் போது கடந்த மாதத்துடன் ஒப்பிடுகையில் காய்கறி விலைகள் உயர்வடைந்துள்ளன. எவ்வாறு இருப்பினும் டிசம்பர் மாதம் வரும் போது ஒவ்வொரு ஆண்டும் பொதுவாகக் காய்கறி விலையில் உயர்வொன்று காணப்படுவது வழமையாகும். எனவே எதிர்வரும் காலத்தில் விலை குறைவடையும் என எதிர்பார்க்க முடியாது. விலைகள் மேலும் உயர்வடையக்கூடும்."
இதேவேளை, முட்டை மற்றும் கோழி இறைச்சி கொள்வனவு சுமார் 20 சதவீதத்தால் வீழ்ச்சியடைந்துள்ளதாக அகில இலங்கை கோழி வியாபாரிகள் சங்கத்தின் தலைவர் அஜித் குணசேகர தெரிவித்துள்ளார்.
முட்டையொன்றின் உற்பத்திச் செலவு 30 ரூபாவிற்கும் 32 ரூபாவிற்கும் இடையில் காணப்பட்ட போதிலும், தற்போதைய நிலையில் பண்ணைகளிலிருந்து முட்டைகள் விநியோகிக்கப்படுவதும் அதே விலையிலேயே என்பதால் உற்பத்தியாளர்களுக்கு லாபத்தைப் பெற்றுக்கொள்ள முடியாமல் போயுள்ளதாக அவர் சுட்டிக்காட்டுகிறார்.
மேலும், பண்டிகைக் காலத்தில் சந்தைக்குத் தேவையான முட்டை மற்றும் கோழி இறைச்சியை எந்தவித தடையுமின்றி தொடர்ச்சியாக விநியோகிக்க நடவடிக்கை எடுக்கப்படும் எனவும் அஜித் குணசேகர மேலதிகமாகத் தெரிவித்தார்.
அத்துடன், நவம்பர் 15 ஆம் திகதிக்குப் பின்னர் பண்டிகைக் காலம் ஆரம்பமாவதனுடன் இந்நிலைமை மீண்டும் வழமைக்குத் திரும்பும் என எதிர்பார்ப்பதாகவும் அச் சங்கம் தெரிவிக்கிறது.
இது குறித்துக் கருத்துத் தெரிவித்த அஜித் குணசேகர,
"இன்றைய நிலையில் நுகர்வோரின் கொள்வனவு சக்தி குறைவடைந்துள்ளது. நாம் சந்தையில் ஆய்வொன்றை மேற்கூறும் போது முட்டை மற்றும் கோழி இறைச்சி கொள்வனவு குறைவடைந்துள்ளமை தெரியவருகிறது. சந்தையில் நுகர்வு சுமார் 20 சதவீதத்தால் குறைவடைந்துள்ளதை எம்மால் காண முடிகிறது. முட்டையொன்றின் உற்பத்திச் செலவு பொதுவாக 30 ரூபாவிற்கும் 32 ரூபாவிற்கும் இடைப்பட்டதாக அமைகிறது. எனினும் இன்று பண்ணைகளிலிருந்து முட்டைகள் விநியோகிக்கப்படுவதும் 30 ரூபாவிற்கும் 32 ரூபாவிற்கும் இடைப்பட்ட விலையிலேயாகும். அதனால் உற்பத்தியாளர்களுக்கு லாபகரமான நிலைமை இல்லை. அதேபோன்று கோழி இறைச்சி விலையும் குறைவடைந்துள்ளது. நிலவும் பொருளாதார நிலைமையுடன் கோழி இறைச்சி நுகர்வு குறைவடைந்துள்ளதாகவே எமக்குத் தோன்றுகிறது. எனினும் உற்பத்தி தொடர்ச்சியாகப் பேணப்பட்டு வருகிறது. பண்டிகைக் காலத்தில் சந்தைக்குத் தேவையான விநியோகத்தைத் தடையின்றி வழங்க நாம் நடவடிக்கை எடுப்போம். அதனால் நவம்பர் 15 ஆம் திகதிக்குப் பின்னர் பண்டிகைக் காலம் ஆரம்பமாவதனுடன் நிலைமை மீண்டும் வழமைக்குத் திரும்பும் என நாம் எதிர்பார்க்கிறோம்."