உலகத் தரவரிசையில் இலங்கையின் முக்கிய எழுச்சியானது, ஆசிய பிராந்தியத்திற்குள் இலங்கை கால்பந்தாட்டத்தின் வளர்ச்சி ஆற்றலையும் அதன் லட்சியத்தையும் பிரதிபலிக்கிறது என ஆசிய கால்பந்தாட்டத் தலைவர் தெரிவித்துள்ளார்.
இலங்கை தேசிய கால்பந்தாட்ட அணியின் அண்மைய முன்னேற்றம் குறித்து ஷேக் சல்மான் பின் இப்ராஹிம் அல் கலீஃபா (Sheikh Salman bin Ebrahim Al Khalifa) இவ்வாறு பாராட்டு தெரிவித்திருப்பது, ஜப்பானின் டோக்கியோ நகரில் நடைபெற்ற ஆசிய கால்பந்தாட்டக் கூட்டமைப்பின் (AFC) விசேட பேரவைக் கூட்டத்தின் போது இலங்கை கால்பந்தாட்டச் சம்மேளனத்தின் தலைவர் ஜஸ்வர் உமாரைச் சந்தித்த தருணத்திலாகும்.
இலங்கை (FFSL) மற்றும் ஆசிய (AFC) கால்பந்து தலைவர்களின் டோக்கியோ சந்திப்பு
இக் கலந்தரையாடலின் போது, இலங்கை கால்பந்தாட்டக் கட்டமைப்பை வலுப்படுத்துவதற்காக உயர்தர இரண்டு கால்பந்து மைதானங்களை நன்கொடையாக வழங்கியது உட்பட, இலங்கையின் கால்பந்தாட்ட வளர்ச்சிக்காகத் தொடர்ச்சியாக வழங்கி வரும் ஆதரவையும் அர்ப்பணிப்பையும் பாராட்டி ஆசிய கால்பந்தாட்டக் கூட்டமைப்பின் தலைமைத்துவத்திற்குத் தனது மனமார்ந்த நன்றியை ஜஸ்வர் உமார் தெரிவித்துக்கொண்டார்.
நிதி நன்கொடைகளுக்கு மேலதிகமாக, அடிமட்ட அளவிலும் உயர் மட்டத்திலும் கால்பந்தாட்டத்தை அபிவிருத்தி செய்வதற்கு ஆதரவளிக்கும் வகையில் அத்தியாவசிய உள்கட்டமைப்பு மற்றும் தொழில்நுட்ப உதவிகளை இலங்கைக்கு ஆசிய கால்பந்தாட்டக் கூட்டமைப்பு தொடர்ந்து வழங்கி வருகின்றது.
இலங்கை கால்பந்தாட்டமானது அதன் தற்போதைய தலைவரின் வியூக தொலைநோக்குப் பார்வையின் கீழ் கடந்த இரண்டு ஆண்டுகளாகக் குறிப்பிடத்தக்க மாற்றத்திற்கு உள்ளாகி வருகின்றது. தேசிய அணியின் மேம்பட்ட சர்வதேச விளையாட்டுத் திறன், FIFA தரவரிசையில் அதன் ஏற்றம் மற்றும் உள்நாட்டுப் போட்டிகள் மற்றும் கால்பந்து உள்கட்டமைப்பில் தொடர்ந்து இடம்பெற்று வரும் வளர்ச்சி ஆகியவற்றின் ஊடாக இம்முன்னேற்றம் வெளிப்படையாக நிரூபிக்கப்பட்டுள்ளது.
புதிய லட்சியம், வலுவான அடித்தளம் மற்றும் எதிர்காலத்திற்கான தெளிவான தொலைநோக்குப் பார்வையுடன் முன்னோக்கிச் செல்லும் இலங்கை கால்பந்தாட்டத்தின் பயணத்திற்கு ஆசிய கால்பந்தாட்டத் தலைவரிடமிருந்து கிடைத்துள்ள இந்த அங்கீகாரம் மேலும் பெரும் பலமாக அமைந்துள்ளது.