-
சொத்து விவரங்களை வெளிப்படுத்தும் விதிகளை தளர்த்த வேண்டாம் என இலங்கைக்க தெளிவான செய்தி.
-
பொருளாதாரம் மீட்சியடைந்தாலும் ஊழல் எதிர்ப்புச் சீர்திருத்தங்கள் தொடர்ந்து முன்னெடுக்கப்பட வேண்டும் என வலியுறுத்தல்.
விசாரணைகள் மற்றும் சீர்திருத்தங்களுக்கு மத்தியில் பொருளாதார ஸ்திரத்தன்மையை உறுதிப்படுத்த வேண்டுமாயின் நிறுவன ரீதியான வெளிப்படைத்தன்மையை பலவீனப்படுத்தக்கூடாது என சர்வதேச நாணய நிதியம் (IMF) வலியுறுத்துகிறது.
இலங்கையுடன் நடைமுறைப்படுத்தப்படும் நீட்டிக்கப்பட்ட நிதி வசதியின் (EFF) ஏழாவது மதிப்பாய்வு மற்றும் 2026 ஆம் ஆண்டிற்கான சட்டரீதியான ஆலோசனைக் கலந்துரையாடல்களை முடிவுக்குக் கொண்டுவந்து இலங்கைக்கு வருகை தந்திருந்த சர்வதேச நாணய நிதியத்தின் (IMF) பிரதிநிதிகள் குழு, நாட்டின் ஆட்சிமுறையின் வெளிப்படைத்தன்மை மற்றும் ஊழல் எதிர்ப்பு பாதுகாப்பு ஏற்பாடுகள் குறித்து தீவிர கவனம் செலுத்தியுள்ளது. இங்கு நாணய நிதியம் சுட்டிக்காட்டுகையில், பொருளாதாரம் படிப்படியாக மீட்சியடைந்து வருகின்ற போதிலும், அண்மையில் முன்மொழியப்பட்டுள்ள சில சட்டத் திருத்தங்கள் மூலம் இதுவரை அடைந்துள்ள சீர்திருத்தங்களின் வெளிப்படைத்தன்மை மற்றும் பொறுப்புக்கூறல் பலவீனமடையக்கூடாது எனத் தெரிவித்துள்ளது.
சர்வதேச நாணய நிதியத்தின் இலங்கைக்கான தூதுக்குழுத் தலைவர் ஈவன் பாபேஜோர்ஜியோ (Evan Papageorgiou) தலைமையிலான இந்த பிரதிநிதிகள் குழு செப்டம்பர் 10 முதல் 23 வரை இலங்கைக்கு விஜயம் மேற்கொண்டிருந்ததுடன், அதன் பின்னரே இந்தத் தகவல்கள் வெளியிடப்பட்டன.
சொத்து பிரகடனம் மற்றும் வெளிப்படைத்தன்மையைப் பாதுகாப்பதன் அவசியம்
2023 ஆம் ஆண்டு அறிமுகப்படுத்தப்பட்ட ஊழல் எதிர்ப்புச் சட்டம் மற்றும் 2025 ஆம் ஆண்டு அமலுக்கு வந்த குற்றங்கள் மூலம் பெறப்பட்ட வருமானம் பற்றிய சட்டத்தின் மூலம் இலங்கை நிறுவன ரீதியான பலவீனங்களைத் தவிர்ப்பதற்குப் பல முக்கியமான நடவடிக்கைகளை எடுத்துள்ளதாக IMF பிரதிநிதிகள் குழு பாராட்டியுள்ளது. இருப்பினும், ஜூலை மாதத்தில் சமர்ப்பிக்கப்பட்ட சில சட்டமன்றத் திருத்தங்கள் மூலம் சொத்துக்கள் மற்றும் பொறுப்புகள் பற்றிய பிரகடனங்களை பகிரங்கப்படுத்துதல் மற்றும் தகவல்களை வெளிப்படுத்துதல் தொடர்பாக உள்ள சட்டப்பூர்வ பாதுகாப்புகள் பாதிக்கப்படலாம் என்பது குறித்து அவர்கள் தீவிர கவனம் செலுத்தியுள்ளனர்.
பொதுப் பணத்தைப் பயன்படுத்துதல், லஞ்சம் அல்லது ஊழல் குற்றச்சாட்டுகள் மற்றும் அதிகாரிகளின் நிதி வெளிப்படைத்தன்மையை உறுதி செய்வதில் சொத்து பிரகடன முறைமை ஒரு அத்தியாவசிய காரணியாக இருப்பதால், அந்த பொறிமுறைகளை எந்த வகையிலும் தளர்த்தக்கூடாது என்பதே நாணய நிதியத்தின் நிலைப்பாடாகும்.
பொருளாதார வளர்ச்சி மற்றும் எதிர்கால சவால்கள்
இந்தக் கடுமையான கொள்கை நிலைப்பாடுகளுக்கு மத்தியில், இலங்கையின் ஒட்டுமொத்த பொருளாதாரச் செயல்பாடு குறித்தும் சர்வதேச நாணய நிதியம் தனது திருப்தியை வெளியிட்டுள்ளது.
அதன்படி:
-
பொருளாதார வளர்ச்சி: 2026 ஆம் ஆண்டின் இரண்டாவது காலாண்டிலும் நாட்டின் பொருளாதாரம் 4.2 சதவீத வளர்ச்சியைப் பதிவுசெய்துள்ளதுடன், இது தொடர்ச்சியாக பதினொரு காலாண்டுகளாகப் பதிவான பலமான வளர்ச்சிப் போக்காகும்.
-
வெளிநாட்டு கையிருப்பு: ஆகஸ்ட் மாத முடிவில் நாட்டின் மொத்த உத்தியோகபூர்வ வெளிநாட்டு கையிருப்பு 6.9 பில்லியன் அமெரிக்க டாலர்களாக உயர்ந்துள்ளது.
-
கடன் மறுசீரமைப்பு: நாட்டின் கடன் மறுசீரமைப்புப் பணிகள் தற்போது பெருமளவில் நிறைவடைந்துள்ளப்பதுடன், பொருளாதாரம் படிப்படியாக இயல்பு நிலைக்குத் திரும்பி வருகிறது.
இருப்பினும், உலகளாவிய சந்தையில் ஏற்படக்கூடிய தாக்கங்கள் மற்றும் வெளிப்புற அபாயங்களுக்கு மத்தியில் பொருளாதாரத்தை ஸ்திரமாக வைத்திருக்க வேண்டுமானால், வருவாய் சேகரிப்பிற்கான முறையான நடுத்தர கால மூலோபாயங்களை விரிவுபடுத்துதல், அரசாங்க நிதி மேலாண்மையை மேலும் வெளிப்படைத்தன்மையுடன் பேணுதல் மற்றும் கொள்முதல் முறைகளின் திறனைப் பாதுகாப்பது அவசியமாகும் என IMF சுட்டிக்காட்டுகிறது.
இலங்கை பொருளாதார ஸ்திரத்தன்மையிலிருந்து உண்மையான மாற்றத்தை நோக்கி நகர்வதற்கு இந்த நிறுவன சீர்திருத்தங்கள் அத்தியாவசியமான காரணியாக இருக்கும் என்றும், கட்டம் கட்டமாக எட்டப்படும் உடன்பாடுகளின் அடிப்படையில் ஊழியர் மட்டத்திலான உடன்பாட்டை எட்டுவதற்கு எதிர்காலத்திலும் பேச்சுவார்த்தைகள் தொடர்ந்து முன்னெடுக்கப்படும் என்றும் IMF பிரதிநிதிகள் குழு மேலும் குறிப்பிட்டுள்ளது.