இந்திய இராணுவத்தினரால் படுகொலை செய்யப்பட்ட வைத்தியசாலை ஊழியர்கள் நினைவுகூரல்!

கட்சியான ஜனதா விமுக்தி பெரமுனையின் (JVP) ஆயுதமேந்திய எதிர்ப்பிற்கு உள்ளான இலங்கை-இந்திய ஒப்பந்தத்தின் மூலம் வடக்கு கிழக்கு மாகாணங்களுக்கு வரவழைக்கப்பட்ட இந்திய அமைதிப் படையினரால் முப்பத்தொன்பது ஆண்டுகளுக்கு முன்னர் படுகொலை செய்யப்பட்டவர்கள் யாழ்ப்பாணம் போதனா வைத்தியசாலையில் நினைவுகூரப்பட்டுள்ளனர்.

இந்திய அமைதிப் படையினரின் (IPKF) யாழ்ப்பாணம் போதனா வைத்தியசாலைப் படுகொலையின் 39 ஆம் ஆண்டு நினைவேந்தல் 2026 அக்டோபர் 21 ஆம் திகதி புதன்கிழமை வைத்தியசாலையில் நடைபெற்றடதுடன், உயிரிழந்தவர்களை நினைவுகூர்ந்து மலர்களாலும் சுடரேற்றியும் அவர்களுக்கு அஞ்சலி செலுத்துவதற்கு வைத்தியசாலை ஊழியர்கள் உள்ளிட்ட தரப்பினர் நடவடிக்கை எடுத்திருந்தனர்.

படுகொலை செய்யப்பட்ட நிராயுதபாணியான பொதுமக்களின் குடும்ப உறுப்பினர்கள் சிலரும் கண்ணீருடன் இந்நிகழ்வில் கலந்துகொண்டிருந்தனர்.

சமாதானத்தின் பெயரால் இடம்பெற்ற வைத்தியசாலைப் படுகொலை

சமாதானத்தைப் பேணுவதற்காக அரசாங்கத்தின் அழைப்பின் பேரில் வருகை தந்து வடக்கில் முகமிட்டிருந்த இந்தியப் படையினர் 1987 ஆம் ஆண்டு அக்டோபர் மாதத்தில் தொடர்ச்சியான படுகொலைகளைப் புரிந்திருந்தனர்.

1987 அக்டோபர் 21 ஆம் திகதி லெப்டினன்ட் ஜெனரல் தீபேந்தர் சிங்கின் தலைமையிலான இந்திய அமைதிப் படைப் பிரிவினர் யாழ்ப்பாணம் போதனா வைத்தியசாலைக்குள் புகுந்து நடத்திய துப்பாக்கிச் சூட்டில் வைத்தியசாலை ஊழியர்கள் 21 பேர் மற்றும் சிகிச்சைப் பெற்றுவந்த நோயாளர்கள் 47 பேர் உட்பட 68 பேர் படுகொலை செய்யப்பட்டனர்.

இந்தியப் படையினரால் படுகொலை செய்யப்பட்டவர்களில் ஏ. சிவபாதசுந்தரம், எம்.ஜே. கணேசரத்தினம் மற்றும் கே. பரிமளம் ஆகிய மூன்று மருத்துவர்களும், ஆர். இராமநாதன், சிவபாக்கியம் மற்றும் லீலாவதி ஆகிய மூன்று செவிலியர்களும், தொலைபேசி இயக்குநரான கனகலிங்கம், பணி மேற்பார்வையாளர்களான ஆர். கிருஷ்ணராஜ், கே. செல்வராஜ் மற்றும் வீ. சண்முகலிங்கம் எனும் அவசர ஊர்தி (Ambulance) ஓட்டுநரும் அடங்குவர்.

பாக் ஜலசந்தியின் இரு மருங்கிலும் மறுக்கப்பட்ட நீதி

வைத்தியசாலைத் தாக்குதல் உள்ளிட்ட இந்தியப் படையினரின் படுகொலைகள் தொடர்பாக எவ்வித விசாரணைகளோ அல்லது பாதிக்கப்பட்டவர்களுக்கு நஷ்டஈடு வழங்குவதோ கடந்துசென்ற முப்பத்தெட்டு ஆண்டுகளில் பாக் ஜலசந்தியின் இரு மருங்கிலுமுள்ள எந்தவொரு அரசாங்கத்தினாலும் முன்னெடுக்கப்படவில்லை.

இந்தியப் படையினரால் 1989 ஆகஸ்ட் மாதத்தில் சிறுவர்கள், பெண்கள் மற்றும் முதியவர்கள் உட்பட அறுபதிற்கும் மேற்பட்டோர் படுகொலை செய்யப்பட்டமை தொடர்பாக வல்வெட்டித்துறை பிரஜைகள் குழு ஓராண்டிற்கு முன்னர் அரசாங்கத்திடம் 5 பில்லியன் ரூபா நஷ்டஈடு கோரி விரிவான ஆவணமொன்றை இழப்பீட்டுக்கான அலுவலகத்தில் (ORR) சமர்ப்பித்திருந்தது.

இது தொடர்பாகத் தேசிய மக்கள் சக்தி (NPP) அரசாங்கத்தினால் எடுக்கப்பட்ட நடவடிக்கைகள் எவையும் இதுவரை தெரியவரவில்லை.