லங்கா (HSBC Electronic Data Processing Lanka) நிறுவனம் தனது உள்நாட்டுத் தரவு செயலாக்க நடவடிக்கைகளை நான்கு கட்டங்களாக நிறைவு செய்வதற்குத் திட்டமிட்டுள்ளது.
2026 ஆம் ஆண்டின் இறுதியில் தொடங்கும் இந்த ஆட்குறைப்பானது 2027 மே, ஆகஸ்ட் மற்றும் டிசம்பர் வரை தொடர்ச்சியாக நடைமுறைப்படுத்தப்படவுள்ளது.
இதன் நேரடியான விளைவாக இத்துறையில் நிபுணத்துவம் பெற்ற 3,000 தொழில்சார் வேலைவாய்ப்புகளும் 500 இணைந்த சேவை வேலைவாய்ப்புகளும் இந்நாட்டிற்கு இழக்கப்படவுள்ளன.
பல வருடப் பயிற்சி பெற்ற இந்தத் திறமையான நடுத்தர வர்க்கச் வர்க்கத்தினரின் சம்பளத்தை அடிப்படையாகக் கொண்டு நகர்ப்புற வீட்டுக் கடன்கள், தனியார் கல்வி மற்றும் நாளாந்த சில்லறைச் சந்தைத் தேவைகள் என்பன பெருமளவில் தங்கியிருந்தன. பொருளாதாரம் மீண்டுவரும் பின்னணியில் இத்தகைய உயர் வருமானப் பணியிடங்களை இழப்பது உள்நாட்டு நுகர்வின் மீது தொடுக்கப்படும் பாரிய அடியாகும்.
மிரேகா டவர்ஸ் வளாகமும் நகர்ப்புற சேவை வழங்குநர்களும்
ஹெவ்லோக் சிட்டி மிரேகா டவர்ஸ் (Mireka Towers) வளாகத்தின் எட்டு மாடிகள் முழுவதும் பரந்துள்ள பிரதான வணிக அலுவலக இடங்கள் (Grade-A commercial space) காலியாவது கொழும்பு வணிகச் சொத்துச் சந்தையின் மீது தீர்க்கமான தாக்கத்தை ஏற்படுத்துகிறது.
அலுவலகப் போக்குவரத்துச் சேவை வழங்குநர்கள், உணவகங்கள், பராமரிப்பு நிறுவனங்கள் உள்ளிட்ட பல வணிகங்களின் வருமான வழிகள் இந்தத் தரப்பினர் வெளியேறுவதன் மூலம் ஆபத்துக்குள்ளாகின்றன. மாற்று வரி செலுத்துவோரை உடனடியாகக் கண்டறியாவிட்டால் நகர்ப்புறச் சொத்துத் துறையின் வருமானம் நீண்டகாலமாகக் குறைவடைவதற்கான அபாயம் காணப்படுகிறது.
பிராந்திய போட்டித்தன்மைக்கு மத்தியில் இலங்கையின் சவால்கள்
HSBC நிறுவனம் தனது செயற்பாடுகளை பெங்களூரு, மத்திய கிழக்கு மற்றும் பிலிப்பீன்ஸ் ஆகிய நாடுகளை நோக்கி மையப்படுத்துகிறது. செயற்பாட்டுச் செலவைக் குறைத்துக்கொள்வது உலகளாவிய நிறுவனமொன்றின் இயற்கையான படியாகும், எனினும் வெளிநாட்டு முதலீட்டாளர்கள் இந்நாட்டிற்குப் பதிலாகப் பிராந்தியத்திலுள்ள அந்த நாடுகளைத் தேர்ந்தெடுப்பதற்கான காரணம் கொள்கை வகுப்பாளர்களினது முன்னால் உள்ள பிரதான கேள்வியாகும்.
மின் கட்டணங்கள், வரிட்டுக் கொள்கைகள், ஒழுங்குமுறைத் தடைகள் மற்றும் டிஜிட்டல் உள்கட்டமைப்புத் தொடர்பில் வெளிப்படைத்தன்மையுடன் கூடிய மதிப்பீடொன்றை உடனடியாக மேற்கொள்வது அரசாங்கத்தின் பொறுப்பாகும். உண்மையான தடைகளைக் கண்டறியாமல் வெற்றுப் பிரகடனங்கள் மூலம் மாத்திரம் உலகளாவிய நிறுவனங்களை நிலைநிறுத்துவது நடைமுறை சாத்தியமற்றது எனப் பொருளாதார ஆய்வாளர்கள் சுட்டிக்காட்டுகின்றனர்.
வெளியேறுவது அனைத்துச் செயற்பாடுகளிலிருந்தும் அல்ல
இந்த நிலைமையானது முழுமையாக நாட்டைவிட்டு வெளியேறுவதல்ல என்பதைப் புரிந்துகொள்வது அவசியமாகும். 2026 மே மாதத்தில் தனது நுகர்வோர் மற்றும் சில்லறை வங்கிச் செயற்பாடுகளை நேஷன்ஸ் டிரஸ்ட் வங்கிக்கு (NTB) விற்றுவிட்ட HSBC, இந்நாட்டின் பிரதான நிறுவனக் கொடுப்பனவுகள் மற்றும் வெளிநாட்டு நாணய வர்த்தகம் ஆகியவற்றுக்குள் தொடர்ந்தும் நிலைத்திருக்கிறது.
கொழும்புத் துறைமுகத்தின் SAGT முனைய நவீனமயமாக்கலுக்காக அனைத்துலக நிதி நிறுவனத்துடன் (IFC) இணைந்து 20 மில்லியன் டாலர் பசுமைக் கடன் தொகையொன்றை வழங்குவதற்கு வங்கி அண்மையில் பங்களிப்புச் செய்தது. இதன் மூலம் இலாபகரமான நிறுவன மற்றும் உள்கட்டமைப்புத் திட்டங்களுக்காக அவர்களது பங்களிப்பு தொடர்ச்சியாகக் காணப்படுகிறது என்பது புலப்படுகிறது.
வெளிநாட்டு முதலீடுகளை அளவிடுவதற்கான புதிய நெறிமுறை
மத்திய வங்கியும் முதலீட்டுச் சபையும் இணைந்து இந்தப் பின்டைவிற்குக் காரணமான விடயங்களை உடனடியாக விசாரணை செய்ய வேண்டும். உலகளாவிய மறுசீரமைப்புகளையும் இந்நாட்டின் கொள்கைசார் பலவீனங்களையும் தனித்தனியாக அடையாளம் காண்பது இங்கு அதிமுக்கியமானதாகும்.
வெளிநாட்டு நேரடி முதலீடுகள் என்பன கொண்டுவரப்படும் மூலதனத்தால் மாத்திரம் அளவிடப்படக் கூடாது, மாறாக அதனால் உருவாக்கப்படும் நிபுணத்துவத் திறனுள்ள வேலைவாய்ப்புகள், உள்நாட்டு விநியோகச் சங்கிலி வலுவடைதல் மற்றும் தொழில்நுட்பப் பரிமாற்றம் ஆகியவற்றின் அடிப்படையிலேயே அளவிடப்பட வேண்டும். சேவையிலிருந்து அகற்றப்படும் தொழிலாளர்களை FinTech, சைபர் பாதுகாப்பு மற்றும் டிஜிட்டல் வங்கித் துறைகளை நோக்கி ஆற்றுப்படுத்தும் பயிற்சித் திட்டங்களை உடனடியாக நடைமுறைப்படுத்துவது அவசியமானதாகும்.