மாநில அரசின் சிறுபான்மையினர் நலன், வெளிநாடு வாழ் தமிழர் நலன் மற்றும் வக்ஃப் வாரிய அமைச்சரான ஏ. எம். ஷாஜஹான் (A. M. Shahjahan) உள்ளிட்ட விசேட பிரதிநிதிகள் குழுவினர், ஸ்ரீலங்கா முஸ்லிம் காங்கிரஸின் அம்பாறை மாவட்டத் தலைமைச் செயலகத்திற்கும் விஜயம் செய்திருந்தனர்.
இதன்போது, கட்சியின் தலைவரும் பாராளுமன்ற உறுப்பினருமான ரவூப் ஹக்கீம் தலைமையில் தமிழ்நாட்டு அமைச்சர் உள்ளிட்ட தூதுக்குழுவினருக்கு அமோக வரவேற்பு அளிக்கப்பட்டது.
வரவேற்பு நிகழ்வைத் தொடர்ந்து நடைபெற்ற இருதரப்புப் பேச்சார்த்தையின் போது, இலங்கை மற்றும் தமிழ்நாட்டில் வாழும் சிறுபான்மைச் சமூகங்களின் தற்போதைய சமூக நிலைமை, கல்வித் துறையின் முன்னேற்றம் மற்றும் நலன்புரித் திட்டங்கள் தொடர்பில் கருத்துக்கள் பரிமாறிக் கொள்ளப்பட்டன. குறிப்பாக இரு நாட்டுச் சமூகங்களுக்கும் இடையே நிலவும் வரலாற்று மற்றும் கலாச்சார உறவுகளை மேலும் நடைமுறைச் சாத்தியமான மட்டத்தில் முன்னெடுத்துச் செல்வது குறித்து இருதரப்பினதும் கவனம் செலுத்தப்பட்டது.
பிராந்திய ஒத்துழைப்பின் ஊடாக மக்கள் மட்டத்திலான தொடர்புகளை வளர்த்துக் கொள்வது குறித்தும், இளைய தலைமுறையினரின் கல்வி வாய்ப்புகளை விரிவுபடுத்துவதற்காக எடுக்கப்பட வேண்டிய நடவடிக்கைகள் குறித்தும் இதன்போது கருத்துக்கள் பரிமாறப்பட்டன.
மூத்த பிரதிநிதிகள் குழு சந்திப்பில் பங்கேற்பு
இந்நிகழ்வில் ஸ்ரீலங்கா முஸ்லிம் காங்கிரஸின் பொதுச்செயலாளரும் பாராளுமன்ற உறுப்பினருமான நிஸாம் காரியப்பர், கட்சியின் பொருளாளர் ரஹ்மத் மன்சூர், பிரதிச் செயலாளர் மன்சூர் ஏ. காதர், வெளி விவகாரப் பணிப்பாளர் சிராஷ் மீராசாஹிப், அம்பாறை மாவட்டச் செயலாளர் ஏ.சி. சமால்தீன் உள்ளிட்ட கட்சியின் உயர் பீடப் பிரதிநிதிகள் கலந்துகொண்டிருந்தனர்.
தமிழ்நாட்டு அமைச்சருடன் வருகை தந்த விசேட பிரதிநிதிகள் குழுவினரும் இச்சந்திப்பில் கலந்துகொண்டதுடன், இக்கலந்துரையாடல் மிகவும் நட்புறவானதும் சாதகமானதுமான சூழலில் நடைபெற்றதாகச் செய்திகள் தெரிவிக்கின்றன.