சமூக ஊடகங்களும் AI தொழில்நுட்பமும் இலங்கை வாக்காளர்களின் நடத்தையில் ஆதிக்கம்!

மற்றும் செயற்கை நுண்ணறிவு (AI) மூலம் செல்வாக்கிற்கு உட்படுத்தப்பட்டு வருவதாகவும், இது எதிர்காலத்தில் பாரதூரமான பிரச்சினையாக மாறக்கூடும் என்றும் தேர்தல் ஆணைக்குழு வெளிப்படுத்தியுள்ளது.

'டெமோக்ரசி ரிப்போர்ட்டிங் இன்டர்நேஷனல்' (Democracy Reporting International) மற்றும் 'ஃபேக்டம்' (Factum) ஆகிய நிறுவனங்களால் மேற்கொள்ளப்பட்ட ஆய்வின் கண்டுபிடிப்புகளை மேற்கோள் காட்டி கருத்துரைத்த தேர்தல் ஆணைக்குழு, 2024 ஜனாதிபதித் தேர்தல் மற்றும் பாராளுமன்றத் தேர்தல்களின் போது சமூக ஊடகங்கள் மற்றும் செயற்கை நுண்ணறிவின் செல்வாக்கு வாக்காளர்கள் மீது ஆதிக்கம் செலுத்தியுள்ளதுடன், கடந்த ஆண்டின் உள்ளூராட்சி மன்றத் தேர்தல்களின் போதும் இப்போக்கு காணப்பட்டதாகத் தெரிவித்துள்ளது.

"இந்த நிலைமை எதிர்காலத்தில் அபாயகரமான கட்டங்களை எட்டக்கூடும்," எனத் தேர்தல் மேலதிக ஆணையாளர் (சட்டம்) சிந்தக்க குலரத்ன தெரிவித்துள்ளார்.

அரசியல் செல்வாக்கு செலுத்துபவர்களும் (Influencers) அமைதிப் பிரசாரக் காலப்பகுதியும்

இலங்கையின் 2024 பாராளுமன்றத் தேர்தலின் போது, சட்டப்பூர்வமாகக் கட்டாயமாக்கப்பட்ட அமைதிப் பிரசாரக் காலப்பகுதி (Silence Period) ஆரம்பமான பின்னரும் கூட, அரசியல் செல்வாக்கு செலுத்துபவர்கள் (Political Influencers) தேர்தல் தொடர்பாடலில் குறிப்பிடத்தக்க பங்கைக் கொண்டிருந்தனர். 2024 ஜனாதிபதித் தேர்தலைப் போலல்லாது, பாராளுமன்றத் தேர்தலின் போது அமைதிப் பிரசாரக் காலம் ஆரம்பமானதைத் தொடர்ந்து செல்வாக்கு செலுத்துபவர்களின் ஒட்டுமொத்தச் செயற்பாடுகள் சற்றே குறைந்த போதிலும், பொதுத் தேர்தலின் போது நிலைமை பெருமளவில் மாறாமல் இருந்ததாக அவ் ஆய்வு வெளிப்படுத்தியுள்ளது.

"கண்காணிக்கப்பட்ட அரசியல் செல்வாக்கு செலுத்துபவர்கள் மத்தியில் தேசிய மக்கள் சக்தியே (NPP) அடிக்கடி குறிப்பிடப்பட்ட அரசியல் கட்சியாக இருந்ததுடன், ஏனைய பிரதான கட்சிகள் அனைத்தும் இணைந்து பெற்றதை விட அதிகக் குறிப்புகளைப் பெற்றிருந்தது. கண்காணிப்புக் காலத்தில் தேசிய மக்கள் சக்தி (NPP) 715 குறிப்புகளைப் பெற்றிருந்த அதேவேளையில், இலங்கை பொதுஜன பெரமுன (SLPP) 177 குறிப்புகளையும், ஐக்கிய தேசியக் கட்சி (UNP) 125 குறிப்புகளையும், சமகி ஜன பலவேகய (SJB) 116 குறிப்புகளையும் பெற்றிருந்தன. அமைதிப் பிரசாரக் காலப்பகுதியிலும் இந்நிலைமை தொடர்ந்ததுடன், அடையாளங்காணப்பட்ட 100 கட்சிக் குறிப்புகளில் 53 குறிப்புகளை தேசிய மக்கள் சக்தி (NPP) கொண்டிருந்தது."

ஒட்டுமொத்தமாக, முறையான தேர்தல் பிரசாரங்கள் வரையறுக்கப்பட்டிருந்த நேரத்திலும், 2024 பாராளுமன்றத் தேர்தலின் போது இலங்கையின் இணையவழித் தேர்தல் தொடர்பாடலின் ஒரு முக்கிய அங்கமாக அரசியல் செல்வாக்கு செலுத்துபவர்கள் தொடர்ந்து இயங்கியதை இக் கண்டுபிடிப்புகள் காட்டுகின்றன. தேர்தல் தொடர்பான உள்ளடக்கங்கள் ஜனாதிபதித் தேர்தலை விடக் குறைந்த பங்கையே பிரதிநிதித்துவப்படுத்திய போதிலும், அமைதிப் பிரசாரக் காலத்தில் அதன் ஒப்பீட்டு முக்கியத்துவம் 39% இலிருந்து 46.8% ஆக அதிகரித்துள்ளது என ஆய்வின் தரவுகள் தெரிவிக்கின்றன.

தேர்தல் ஆணைக்குழுவின் 9 கட்டச் செயற்பாட்டுத் திட்டம்

இந்த நிலைமையை எதிர்கொள்வதற்காக ஒன்பது உப திட்டங்களை உள்ளடக்கிய செயற்பாட்டுச் சட்டகமொன்றை (Operational Matrix) தேர்தல் ஆணைக்குழு உருவாக்கியுள்ளதாக வெளிப்படுத்தப்பட்டுள்ளது.

அவை வருமாறு:

1. சட்ட மற்றும் கொள்கை மறுசீரமைப்புகள்.

2. உடனடிப் பதிலளிப்பு மற்றும் உள்ளடக்கங்களை அகற்றும் முறைமை.

3. வாக்காளர் விழிப்புணர்வு மற்றும் கல்விப் பிரசாரம்.

4. செயற்கை நுண்ணறிவு (AI) சார்ந்த உள்ளடக்கங்களைக் கண்டறியும் முறைமை.

5. ஒரே உண்மைத் தகவல் வலைத்தளப் பதிவு (Single Source of Truth Website).

6. நடத்தை விதிக் கட்டமைப்பு (Code of Conduct Framework).

7. தேசிய சமூக ஊடகக் கண்காணிப்பு வலையமைப்பை அறிமுகப்படுத்தல்.

8. உண்மைச் சரிபார்ப்புக் கூட்டமைப்பு (Fact-check Consortium).

9. ஊடக வழிகாட்டல் நவீனமயமாக்கல் வேலைத்திட்டம்.

தேர்தல் காலத்தில் போலிப் பதிவுகளைத் தடுப்பது தொடர்பாக ஃபேஸ்புக் (Facebook) மற்றும் யூடியூப் (YouTube) போன்ற சமூக ஊடகத் தளங்களுடன் பேச்சுவார்த்த நடத்தி வருவதாகவும் தேர்தல் ஆணைக்குழு தெரிவித்துள்ளது.

அரசியல் கட்சிகள் மீதான நம்பிக்கையீனமும் புதிய கட்சிகளின் பதிவுகளும்

அதேவேளையில், இலங்கையில் மக்கள் அரசியல் கட்சிகள் மீதான நம்பிக்கையை இழந்துள்ளதாகவும் வெளிப்படுத்தப்பட்டுள்ளது.

இருப்பினும், இந்த ஆண்டின் ஜனவரி மாதமளவில் 41 புதிய அரசியல் கட்சிகள் பதிவிற்காக விண்ணப்பித்துள்ளதாகத் தேர்தல் ஆணைக்குழுவின் தவிசாளர் ஆர். எம். ஏ. எல். ரத்நாயக்க தெரிவித்துள்ளார்.

இந்த ஆண்டின் இறுதிக்குள் புதிய அரசியல் கட்சிகள் அங்கீகரிக்கப்படும் என அவர் குறிப்பிட்டுள்ளார். இலங்கையில் ஏற்கனவே பதிவு செய்யப்பட்டுள்ள 84 பதிவு செய்யப்பட்ட அரசியல் கட்சிகள் உள்ளதாகவும், அவற்றுள் 27 அரசியல் கட்சிகள் இயங்காத நிலையில் (Inactive) உள்ளதாகவும் மேலும் வெளிப்படுத்தப்பட்டுள்ளது.