22ஆம் திகதி வர்த்தமானி அறிவித்தலில் வெளியிடப்பட்ட ‘அரசைப் பயங்கரவாதத்திலிருந்து பாதுகாக்கும் சட்டமூலம்’ (Protection of the State from Terrorism Bill - PSTA) தொடர்பில் ஐக்கிய நாடுகள் மனித உரிமைகள் உயராணையகம் (OHCHR) தனது முதற்கட்ட அவதானிப்புகளையும் தொழில்நுட்ப மதிப்பீட்டையும் இலங்கை அரசாங்கத்திடம் கையளித்துள்ளது.
தற்போது நடைமுறையிலுள்ள பயங்கரவாதத் தடுப்புத் தற்காலிக ஏற்பாடுகள் சட்டத்தை (PTA) நீக்கிவிட்டு, சர்வதேச மனித உரிமைத் தரநிலைகளுக்கு இணங்கக்கூடிய புதிய சட்டக் கட்டமைப்பையொன்றை உருவாக்குவதற்கு அரசாங்கம் எடுத்துள்ள முயற்சியை உலக சமூகம் இங்கு பாராட்டியுள்ளது.
குறிப்பாக, பொலிஸார் முன்னிலையில் அளிக்கப்படும் வாக்குமூலங்களைச் சாட்சியங்களாக ஏற்றுக்கொள்ளும் முறைமையை நீக்குதல், வழக்குத் தொடுதல்கள் மற்றும் தடுப்புக் காவல் உத்தரவுகள் குறித்த மத்திய தரவுத் தளமொன்றை நிறுவுதல், இலங்கை மனித உரிமைகள் ஆணைக்குழுவிற்கு 48 மணித்தியாலங்களுக்குள் அறிவிக்க வேண்டிய கட்டாய நிபந்தனை மற்றும் கருத்துச் சுதந்திரத்திற்காகச் சில தளர்வுகளைச் சேர்த்தல் என்பன அவ் அறிக்கையில் நேர்மறையான படிகளாகப் பதிவாக்கப்பட்டுள்ளன.
எனினும், சட்ட மூலத்தில் அடங்கியுள்ள சில சரத்துகள் மேலும் பரந்த ஆய்வுக்கு உட்படுத்தப்பட வேண்டும் என்றும், பாராளுமன்றத்தில் நிறைவேற்றப்படுவதற்கு முன்னர் பரந்த தரப்பினரின் உரையாடல் மூலம் இது மேலும் பலப்படுத்தப்பட வேண்டும் என்றும் ஐநா அறிக்கை சுட்டிக்காட்டுகிறது.
முதற்கட்ட அவதானிப்புகளும் சட்ட ரீதியான உரையாடலும்
ஐநா மனித உரிமைகள் உயராணையகம் முன்வைத்துள்ள அவதானிப்புகளுள் பிரதான துறைகள் சில குறித்து விசேட கவனம் செலுத்தப்பட்டுள்ளது:
-
பயங்கரவாதம் என்பதன் வரைவிலக்கணம்:
முந்தைய வரைவுகளை விட குற்றத்தின் எல்லைகள் குறுக்கப்பட்டுள்ள போதிலும், 3 ஆம் சரத்தில் அடங்கியுள்ள விடயங்கள் சாதாரண குற்றவியல் சட்டத்தின் கீழ் வரும் சம்பவங்களைக் கூட உள்ளடக்கும் அளவிற்குப் பரந்ததாக இருக்கக்கூடாது எனச் சுட்டிக்காட்டப்பட்டுள்ளது. அமைதியான போராட்டங்கள், தொழிற்சங்க நடவடிக்கைகள் மற்றும் மானுட அபிவிருத்தி உதவிகளை வழங்குதல் என்பன பயங்கரவாதச் செயல்களின் எல்லைக்குள்ளிருந்து தெளிவாக விடுவிக்கப்பட வேண்டியதன் அவசியமும் வலியுறுத்தப்பட்டுள்ளது.
-
தடுப்புக் காவல் உத்தரவுகளும் நீதித்துறை தலையீடும்:
சந்தேகநபர் ஒருவர் கைது செய்யப்படும் ஆரம்ப தருணத்திலிருந்தே முழுமையான நீதித்துறை கண்காணிப்பு நிலவ வேண்டியதன் முக்கியத்துவத்தை அறிக்கை சுட்டிக்காட்டுகிறது. பாதுகாப்பு அமைச்சின் செயலாளருக்கு வழங்கப்படும் தடுப்புக் காவல் அதிகாரங்களின் போது நீதவான் ஒருவர் முன்னிலையில் ஆஜர்படுத்துவதற்கான கால எல்லைகள் மற்றும் சட்டத்தரணியின் உதவியை இரகசியமாகப் பெற்றுக்கொள்வதற்கான உரிமை என்பன சர்வதேச சிவில் மற்றும் அரசியல் உரிமைகளுக்கான உடன்படிக்கைக்கு (ICCPR) அமைவாக இருக்க வேண்டும் எனக் குறிப்பிடப்பட்டுள்ளது.
-
நிறைவேற்று அதிகாரங்களும் அமைப்புகளைத் தடை செய்தலும்:
அமைப்புகளைத் தடை செய்தல் (Proscription Orders) மற்றும் தனிநபர்களின் பயணங்களைக் கட்டுப்படுத்துதல் (Restriction Orders) என்பவற்றுக்காக விதிக்கப்பட்டுள்ள நிபந்தனைகள் கால எல்லையின்றி நீடிக்கப்படுவதைத் தடுப்பதற்காகச் சுயாதீன மறுஆய்வுப் பொறிமுறையொன்று (Independent Review) நிலவ வேண்டியதன் முக்கியத்துவம் சுட்டிக்காட்டப்பட்டுள்ளது.
-
முப்படைத் தலையீடும் சிவில் நிர்வாகமும்:
விசேட சந்தர்ப்பங்களில் முப்படையினருக்கும் கடலோரப் பாதுகாப்புப் படையினருக்கும் வழங்கப்படும் சோதனையிடுதல் மற்றும் கைது செய்தல் அதிகாரங்கள், சிவில் பொலிஸ் அதிகாரங்களின் முதன்மைக்கும் சாதாரண குற்றவியல் சட்ட நீதித்துறை அதிகாரத்திற்கும் உட்பட்டுச் செயற்பட வேண்டியதன் அவசியத்தை நினைவூட்டுகிறது.
ஐநா உயராணையகத்தின் பிரதான பரிந்துரைகள்
சட்ட மூலத்தைப் பாராளுமன்றத்தில் சமர்ப்பிப்பதற்கு முன்னர் சுயாதீன ஆணைக்குழுக்கள், சட்டத்துறை வல்லுநர்கள் மற்றும் சிவில் சமூகத்தினருடன் இணைந்து பரந்த மறுஆய்வொன்றை மேற்கொள்ளுமாறு ஐநா மனித உரிமைகள் உயராணையகம் யோசனை முன்வைத்துள்ளது.
அதில் முன்வைக்கப்பட்டுள்ள பிரதான பரிந்துரைகள் வருமாறு:
-
பயங்கரவாதம் மற்றும் அது தொடர்பான குற்றங்கள் பற்றிய வரைவிலக்கணத்தை மிகவும் தெளிவான மற்றும் குறுகிய எல்லைக்குள் வைத்திருத்தல்.
-
ஒவ்வொரு கைது மற்றும் தடுப்புக் காவலுக்கும் உடனடி நீதித்துறை கண்காணிப்பைக் கட்டாயமாக்குதல்.
-
சந்தேகநபர்களுக்குச் சட்டத்தரணி உதவி மற்றும் சுயாதீன மொழிபெயர்ப்பு வசதிகள் எந்தவொரு தடையுமின்றி வழங்கப்படுவதை உறுதிசெய்தல்.
-
இராணுவத் தலையீடுகளைக் கடுமையான சிவில் கண்காணிப்பிற்கு உட்படுத்துதல்.
-
சித்திரவதைகளைத் தடுப்பதற்கான பாதுகாப்பு ஏற்பாடுகளை மேலும் பலப்படுத்துதல்.
இந்தச் சட்ட மூலத்தை இலங்கை பிணைக்கப்பட்டுள்ள சர்வதேச மனித உரிமைத் தரநிலைகளுக்கு முழுமையாகப் பொருந்தும் வகையில் தயாரித்துக் கொள்வதற்குத் தேவையான தொழில்நுட்ப உதவி மற்றும் சட்ட ஆலோசனைகளை வழங்குவதற்குத் தாம் தயார் என்றும் ஐக்கிய நாடுகள் மனித உரிமைகள் உயராணையகம் இறுதியாக அறிவித்துள்ளது.