முற்றிலும் மாறுபட்ட பாதையொன்றிற்குக் கொண்டுவந்து, சிதறிக் காணப்படும் வருவாய் வசூலிப்பு நிறுவனங்கள் அனைத்தையும் ஒரே டிஜிட்டல் வலையமைப்பிற்குள் இணைக்கும் மற்றும் மின்னணு இன்வாய்ஸ் (E-invoicing) முறைமையை அறிமுகப்படுத்தும் பிரம்மாண்டமான மறுசீரமைப்பிற்கு அரசாங்கம் அடிக்கல் நாட்டி வருகின்றது.

பேங்காக் நகரில் நடைபெற்று வரும் சர்வதேச நாணய நிதியத்தின் (IMF) மற்றும் உலக வங்கியின் வருடாந்த மாநாட்டிற்கு இணையாக நடைபெற்ற விசேட அமர்வில் நிதியமைச்சின் அரச நிதித்துறைப் பொதுக் கொள்கைத் திணைக்களத்தின் பணிப்பாளர் நாயகம் கலாநிதி கபில சேனாநாயக்க இதனை வெளிப்படுத்தினார்.

தற்போது இந்நாட்டில் நடைமுறையிலிருப்பது ஒன்றோடொன்று தொடர்பில்லாத தனித்தனி வரி மற்றும் வருவாய் அமைப்புகளாகும் எனச் சுட்டிக்காட்டிய அவர், எதிர்காலத்தில் தயாரிக்கப்படும் நடுத்தர கால வருவாய் மூலோபாயத்தின் பிரதான தூணாக 'டிஜிட்டல்மயமாக்கல்' மாற்றப்பட்டுள்ளதாகக் குறிப்பிட்டார்.

ஒன்றோடொன்று பொருந்தாத அமைப்புகளை இணைக்கும் புதிய நடவடிக்கை

உள்நாட்டு இறைவரித் திணைக்களம், சுங்கம் மற்றும் சுங்கவரித் திணைக்களம் போன்ற பிரதான வருவாய் வசூலிப்பு நிறுவனங்களுக்கு இடையே சரியான தகவல் பரிமாற்றம் இல்லாமை இந்நாட்டின் வரி கசிவுகளுக்கு நீண்டகாலமாகப் பாதிப்பை ஏற்படுத்திய பிரதான பிரச்சினையாகும்.

கடந்த வரவுசெலவுத் திட்டத்தில் யோசனை செய்யப்பட்ட விற்பனை முனை (Point-of-Sale - POS) இயந்திரங்களை அறிமுகப்படுத்தும் நடவடிக்கையின் ஊடாக ஆரம்பமான இம்மாற்றமானது, எதிர்காலத்தில் கொடுக்கல்வாங்கல்கள் உடனடியாகப் பதிவாகும் டிஜிட்டல் இன்வாய்ஸ் (E-invoicing) முறைமை வரை விரிவாக்கப்படவுள்ளது.

எவ்வாறாயினும், இந்தத் தொழில்நுட்ப மாற்றத்தை ஒரே இரவில் செய்துவிட முடியாது என்றும், அதற்குப் பாரிய நிதி முதலீடு தேவைப்படுவதால் படிப்படியாகவே (Phased Rollout) இது நடைமுறைப்படுத்தப்படும் என்றும் கலாநிதி சேனாநாயக்க விளக்கமளித்தார்.

சிறு வணிகங்களுக்குச் சிலி (Chile) நாட்டின் முன்னுதாரணம்

இந்த அமர்வில் உரையாற்றிய IMF இன் நிதியியல் விவகாரத் திணைக்களத்தின் பிரதிப் பணிப்பாளர் ஹுவான் டோரோ (Juan Toro) சுட்டிக்காட்டியதாவது, வரி நிர்வாகத்தை டிஜிட்டல் மயமாக்குவதன் ஊடாக முறைசாரா மட்டத்திலுள்ள சிறு மற்றும் நடுத்தர அளவிலான வணிகங்களை முறைசார் பொருளாதாரத்திற்குள் உள்வாங்க முடியும் என்பதாகும்.

வணிகமொன்று பொருட்களைக் கொள்வனவு செய்தல், விற்பனை செய்தல் மற்றும் சம்பளம் வழங்குதல் போன்ற அன்றாடச் சுழற்சி டிஜிட்டல் இன்வாய்ஸ் ஊடாக இடம்பெறும் போது, அந்த வணிகம் தானாகவே டிஜிட்டல் மயமாக்கப்படுகின்றது என அவர் சுட்டிக்காட்டினார்.

• இலவச மென்பொருள் வசதிகள்: சிலி நாடு சில ஆண்டுகளுக்கு முன்னர் இ-இன்வொய்ஸ் முறைமையை அறிமுகப்படுத்திய விதத்தை நினைவுகூர்ந்த டோரோ, அங்கு சிறிய நிறுவனங்களுக்காக அரசாங்கத்தினால் இலவசமாகவே முறைமை வசதிகள் வழங்கப்பட்டதாகக் கூறினார்.

• எளிதான மதிப்புக் கூட்டு வரி (VAT) கணிப்பீடு: சிறு வணிகங்களின் கொடுக்கல்வாங்கல்கள் எளிமையானவை என்பதால், அவர்களின் மதிப்புக் கூட்டு வரி அறிக்கைகள் தானாகவே நிரப்பப்படும் (Pre-populated) எளிய கணக்கியல் முறையொன்று அதன் மூலம் உருவாக்கப்பட்டது.

• வங்கிச் கடன் வசதிகள்: துல்லியமான டிஜிட்டல் ஆவணங்கள் நிலவும் போது சிறு வணிகர்களுக்கு வங்கி அமைப்பிலிருந்து கடன்கள் மற்றும் நிதி வசதிகளைப் பெற்றுக்கொள்வது மிகவும் எளிதாகிறது.

வெற்றிக்குத் தேவையான அடிப்படை நிபந்தனைகள்

பாரிய அளவிலான நிறுவனங்களுக்குத் தனியார் துறையின் தொழில்நுட்பத் தீர்வுகளைப் பெற்றுக்கொள்ள முடிந்தபோதிலும், சிறு வணிகர்களை அதிகச் செலவுகளிலிருந்து பாதுகாப்பது அரசாங்கத்தின் பொறுப்பாகும் எனப் பொருளாதாரப் பகுப்பாய்வாளர்கள் சுட்டிக்காட்டுகின்றனர்.

குறிப்பாகத் தீவு முழுவதிலும் நம்பகமான மற்றும் குறைந்த செலவிலான இணைய இணைப்புகள் (Digital Public Infrastructure) இல்லாவிட்டால், இவ்வாறான டிஜிட்டல் அமைப்புகளைப் பராமரிப்பது சாதாரண வணிகருக்கு மேலதிகச் சுமையாக அமையக்கூடும் என சர்வதேச நாணய நிதியம் வலியுறுத்துகிறது. அதற்கமைய வரவிருக்கும் வரவுசெலவுத் திட்டத்தின் ஊடாக இதற்காக எவ்வாறான முன்னுரிமையும் நிதி ஒதுக்கீடும் ஒதுக்கப்படும் என்பது குறித்துப் பொருளாதாரத் துறையில் தீவிர அவதானம் செலுத்தப்பட்டுள்ளது.