கார்பன் வர்த்தகம் இடைநிறுத்தப்பட்டதால் பசுமை சக்தி முதலீடுகளில் நெருக்கடி!

(Renewable Energy Sector) முதலீட்டாளர்களும் உருவாக்குநர்களும் (Developers) தமது கார்பன் கடன்களை (Carbon Credits) சர்வதேச சந்தைக்கு வெளியிடுவதற்காக இருந்த சந்தர்ப்பங்கள், தெளிவான தேசிய ஒழுங்குமுறை பொறிமுறையொன்று உருவாக்கப்படும் வரை தற்காலிகமாகக் கட்டுப்படுத்தப்பட்டுள்ளதாகத் தெரிவிக்கப்படுகிறது. பாரிஸ் ஒப்பந்தத்தின் 6 ஆம் பிரிவுக்கு (Article 6) அமைவாக, ஒரு நாடாக அடைய வேண்டிய பசுமைச்சாத வாயு வெளியேற்றக் குறைப்பு இலக்குகளைப் (NDCs) பாதுகாத்துக் கொள்ளும் நோக்கில் அரசாங்கம் இந்த கொள்கை ரீதியிலான ஒழுங்குமுறை நடவடிக்கைகளை முன்னெடுத்து வருகிறது.

இருப்பினும், தற்போது தரப்படுத்தப்பட்ட மின்சாரக் கொள்முதல் ஒப்பந்தங்களின் (SPPAs) கீழ் மூன்றாம் தரப்பினருடன் கார்பன் பரிவர்த்தனைகளில் ஈடுபடுவது தனியார் துறைக்குக் கட்டுப்படுத்தப்பட்டுள்ளமையால், புதுப்பிக்கத்தக்க சக்தித் திட்டங்கள் மூலம் எதிர்பார்க்கப்பட்ட மேலதிக நிதிப் பாய்ச்சல்கள் தடைப்பட்டுள்ளதாகத் இத்துறை சார்ந்த பங்காளர்கள் சுட்டிக்காட்டுகின்றனர்.

கொள்கை உருவாக்கம் மற்றும் தேசிய பதிவேட்டு அமைப்பு

இலங்கை மின்சார மேலாளர்கள் சங்கம் (SLEMA) ஏற்பாடு செய்திருந்த இணையவழிச் கருத்தரங்கில் (Webinar) கருத்துத் தெரிவித்த சுற்றாடல் அமைச்சின் சுற்றாடல் திட்டமிடல் மற்றும் பொருளாதாரப் பிரிவின் பணிப்பாளர் குமுதினி வித்யாலங்கார, கார்பன் வர்த்தகம் தொடர்பான அதிகாரப்பூர்வ வழிகாட்டல்களும் தேசிய கார்பன் பதிவேட்டு அமைப்பும் (National Carbon Trade Registry) தற்போது தயாரிக்கப்பட்டு வருவதாகத் தெரிவித்தார்.

அரசின் புதிய கொள்கைத் தீர்மானங்கள் மற்றும் நடைமுறைப்படுத்தல் வழிகாட்டல்கள் பூர்த்தியடைந்தவுடன் இந்தப் பதிவேட்டு அமைப்பு நிறுவப்படும். கடந்த 2024 செப்டம்பர் மாதத்தில் இலங்கை அரசாங்கத்தினால் பாரிஸ் ஒப்பந்தத்தின் கீழ் பரிவர்த்தனை செய்யக்கூடிய திட்டத் துறைகள் அடங்கிய 'நேர்மறைப் பட்டியல்' (Positive List) அங்கீகரிக்கப்பட்டதுடன், அதில் சில புதுப்பிக்கத்தக்க சக்தித் திட்டங்களுக்காக வழங்கப்படக்கூடிய உமிழ்வு குறைப்பு அளவை 25% மற்றும் 50% ஆகக் கட்டுப்படுத்த (Capping) நடவடிக்கை எடுக்கப்பட்டது.

தன்னார்வ சந்தை மற்றும் அரசின் கண்காணிப்பு

சர்வதேச தன்னார்வ கார்பன் சந்தையில் (Voluntary Carbon Market) உள்ளூர் திட்டங்கள் பரிவர்த்தனை செய்ய முடியுமா என்பதை விளக்கிய பணிப்பாளர், குறித்த கார்பன் கடன்கள் சர்வதேச சிவில் விமானப் போக்குவரத்து குறைப்பு பொறிமுறை (CORSIA) அல்லது பிற நாடுகளின் தேசிய உமிழ்வு இலக்குகளுக்குப் (NDCs) பயன்படுத்தப்படாவிட்டால், உள்ளூர் நிறுவனங்கள் தமது கார்பன் சமநிலை (Carbon Neutrality) மற்றும் விளம்பர நோக்கங்களுக்காக அவற்றை விற்பனை செய்வதில் எவ்விதத் தடையும் இல்லை எனக் குறிப்பிட்டார். ஆனால் அவை சர்வதேச இலக்குகளுக்காகப் பயன்படுத்தப்படுமாயின் அரசின் முன்அனுமதி கட்டாயமாகும்.

தாய்லாந்து போன்ற நாடுகள் தன்னார்வ கார்பன் பரிவர்த்தனைகளைக் கூட அதிகாரப்பூர்வ பதிவு அமைப்பின் ஊடாகப் பதிவு செய்வதைக் கட்டாயமாக்கியுள்ளதைச் சுட்டிக்காட்டிய அவர், இலங்கையிலும் இவ்வாறான வெளிப்படைத்தன்மை கொண்ட அமைப்பொன்றின் மூலம் ஒரே உமிழ்வு குறைப்பு இருமுறை கணக்கிடப்படுவதைத் (Double-Counting) தடுத்துக் கொள்ள முடியும் எனத் தெரிவித்தார்.

சந்தை வெளிப்படைத்தன்மை மற்றும் எதிர்கால நோக்கு

SLEMA இன் முன்னாள் தலைவர் ஹர்ஷ விக்கிரமசிங்க இங்கு உரையாற்றுகையில், அரசின் முறையான கண்காணிப்பின்றி இடம்பெறும் சில ஒழுங்கற்ற கார்பன் பரிவர்த்தனைகளால் நாட்டின் சுற்றாடல் கொள்கை கட்டமைப்பிற்குப் பாதிப்பு ஏற்படக்கூடும் என வலியுறுத்தினார். கொள்வனவாளர்களுக்கும் விற்பனையாளர்களுக்கும் இடையே நேரடியாக இடம்பெறும் இவ்வாறான பரிவர்த்தனைகள் குறித்து அரசாங்கம் அறியாமல் இருப்பது சிக்கலான நிலைமை என அவர் சுட்டிக்காட்டினார்.

ஐக்கிய நாடுகள் அபிவிருத்தித் திட்டம் (UNDP) இலங்கைக்குக் கார்பன் வர்த்தகக் கொள்கையை விரைவாக முறைப்படுத்தி நடைமுறைப்படுத்துவதன் அவசியத்தை சுட்டிக்காட்டியுள்ளது. தேசிய உமிழ்வு இலக்குகளை அடைந்துகொள்வது மற்றும் வெளிநாட்டு முதலீடுகளை ஈர்ப்பது ஆகிய இரண்டையும் சமநிலைப்படுத்தக்கூடிய தெளிவான சட்டக் கட்டமைப்பை உருவாக்குவது அரசாங்கத்தினதும் தனியார் துறையினதும் எதிர்காலப் பொருளாதார வளர்ச்சிக்குத் தீர்மானமிக்க காரணியாக அமையும்.