கட்டுப்பாடுகளுக்குத் தீர்வாக தீவு முழுவதும் 75 புதிய எரிபொருள் நிரப்பும் நிலையங்களை நிறுவுவதற்கும், பொருளாதார வளர்ச்சியை இலக்காகக் கொண்ட புதிய சர்வதேச நாணய நிதிய (IMF) உடன்படிக்கையொன்றை எட்டுவதற்கும் அரசாங்கம் ஆயத்தமாகவுள்ளதாக ஜனாதிபதி தெரிவித்துள்ளார்.
கொழும்பில் நேற்று (12) நடைபெற்ற ‘இலங்கை பொருளாதார மற்றும் முதலீட்டு மாநாடு - 2026’ இல் உரையாற்றிய ஜனாதிபதி அநுர குமார திசாநாயக்க, இந்நாட்டின் வலுசக்தித் துறை மற்றும் ஒட்டுமொத்தப் பொருளாதாரப் பாதை தொடர்பில் பல தீர்மானமிக்க விடயங்களை வெளிப்படுத்தினார். மத்திய கிழக்கு நெருக்கடிக்கு மத்தியிலும் இந்நாட்டின் வலுசக்தி விநியோகத்தைச் சீராகப் பேணுவதற்கு அரசாங்கம் எடுத்த நடவடிக்கைகள் மற்றும் எதிர்காலப் பொருளாதார மறுசீரமைப்புகள் இதன்போது விசேட அவதானத்தைப் பெற்றன.
எரிபொருள் சந்தையும் போட்டித்தன்மையின் சவால்களும்
கடந்த காலங்களில் உள்நாட்டுச் சந்தைக்குப் நியாயமான போட்டித்தன்மையை எதிர்பார்க்கும் நோக்கில் தனியார் நிறுவனங்கள் வரவழைக்கப்பட்டன. எவ்வாறாயினும், தற்போதைய நெருக்கடியான சூழ்நிலைக்கு மத்தியில் அந்த எதிர்பார்ப்பு முழுமையாக நிறைவேறவில்லை என்பது ஜனாதிபதியின் உரையில் தெளிவானது.
-
நிவாரணம் வழங்குவதிலுள்ள இடைவெளி:
இலங்கை கனிமநெய் கூட்டுத்தாபனம் (CPC) கடந்த காலாண்டில் 28 பில்லியன் ரூபா செயல்பாட்டு இலாபத்தைப் பதிவு செய்துள்ளதுடன், அந்த இலாபத்தின் ஒரு பகுதியை மக்களுக்கு நிவாரணமாக வெளியிட்டு, சலுகை விலையில் எரிபொருளை விநியோகிக்கக் கூட்டுத்தாபனம் நடவடிக்கை எடுத்துள்ளது.
-
விநியோகக் கட்டுப்பாடுகள்:
களஞ்சியசாலைகளில் எரிபொருள் இருப்புக்கள் உள்ளபோதும், தனியார் துறையைச் சேர்ந்த சில நிறுவனங்கள் தாம் எதிர்பார்க்கும் இலாப வரம்பு கிடைக்காமையின் காரணமாக விநியோகங்களைக் கட்டுப்படுத்த நடவடிக்கை எடுத்துள்ளமை அவதானிக்கப்பட்டுள்ளது.
-
விலை இடைவெளி:
டீசல் லீட்டர் ஒன்றின் விலையில் 130 ரூபாவிற்கும் அதிகமான இடைவெளியைச் சுமக்க நேரிடுவது நுகர்வோருக்கு இழைக்கப்படும் அநீதி எனச் சுட்டிக்காட்டிய ஜனாதிபதி, இலாபத்தைப் போன்றே சமூக நீதியையும் பாதுகாக்க வணிக சமூகம் கடமைப்பட்டுள்ளது என்பதை நினைவூட்டினார்.
75 புதிய எரிபொருள் நிரப்பும் நிலையங்களும் சட்ட மறுபரிசீலனையும்
தனியார் எரிபொருள் நிரப்பும் நிலையங்களை மட்டுமே நம்பியிருக்கும் சில தொலைதூரப் பகுதிகளை அடையாளம் கண்டு, மக்கள் வாழ்வாதாரம் மற்றும் தொழில்துறைகளுக்கு ஏற்படும் தாக்கத்தைக் குறைப்பதற்காக, இலங்கை கனிமநெய் கூட்டுத்தாபனத்தின் ஊடாக விரைவாக 75 புதிய எரிபொருள் நிரப்பும் நிலையங்களைத் தொடங்குவதற்குத் திட்டமிடப்பட்டுள்ளது.
இது தவிர, சம்பந்தப்பட்ட நிறுவனங்களுடன் எட்டப்பட்டுள்ள ஒப்பந்தக் கடப்பாடுகள் மற்றும் விநியோக நிபந்தனைகள் தொடர்பாகச் சட்டமா அதிபர் திணைக்களத்தின் ஊடாகச் சட்ட மறுபரிசீலனையொன்று முன்னெடுக்கப்பட்டு வருவதாகவும் இங்கு வெளிப்படுத்தப்பட்டது.
பொருளாதார வளர்ச்சிக்கு புதிய IMF அணுகுமுறை
இலங்கையின் கடன் தரப்படுத்தல்கள் நன்நிலையை எட்டியுள்ளதுடன், அடிப்படைப் பொருளாதாரச் சமநிலையை அடைந்துகொள்ள முடிந்துள்ளது. எனினும், அந்தச் சமநிலையை மேலும் முன்னோக்கி எடுத்துச் செல்வதாயின் வெளிநாட்டு கையிருப்புகளைப் பலப்படுத்தி பொருளாதார வளர்ச்சியை (Economic growth) விரைவுபடுத்த வேண்டும்.
அதற்கமைய, நான்காண்டு அடிப்படைச் சமநிலைப்படுத்தும் திட்டத்திற்கு அப்பால் சென்று, பொருளாதார விரிவாக்கத்தை இலக்காகக் கொண்ட புதிய உடன்படிக்கையொன்றுக்காகச் சர்வதேச நாணய நிதியத்துடன் (IMF) பேச்சுவார்த்தை நடத்த அரசாங்கம் தயார் நிலையில் உள்ளதாக ஜனாதிபதி மேலும் குறிப்பிட்டார்.
கிழக்கு முனையத்திற்குத் தனியார் முதலீட்டு மேலாண்மை
கொழும்பு துறைமுகம் இந்நாட்டின் பொருளாதாரத்தின் பிரதான மையமாக விளங்குவதுடன், துறைமுக அதிகார சபைக்குச் சொந்தமான கிழக்கு கொள்கலன் முனையத்தின் (ECT) முழுத் திறனை 3.2 மில்லியன் கொள்கலன்கள் வரை உயர்த்தும் சாத்தியம் காணப்படுகிறது. எவ்வாறாயினும், தற்போது அது சுமார் ஐந்து இலட்சம் கொள்கலன்கள் என்ற வரையறுக்கப்பட்ட மட்டத்திலேயே இயங்கி வருகின்றது.
இந்த தேசிய வளத்திலிருந்து அதிகபட்ச உற்பத்தியைப் பெற்றுக்கொள்வதற்காக:
-
கிழக்கு முனையத்தின் சட்டப்பூர்வ உரிமையை அரசாங்கம் தன்வசம் வைத்துக்கொள்ளும்.
-
அதன் செயல்பாடுகள் மற்றும் மேலாண்மைக்காகத் தனி நிறுவனம் ஒன்று நிறுவப்படும்.
-
அந்த நிறுவனத்தின் பங்குகள் சர்வதேசக் கப்பல் சேவை வழங்கும் தனியார் முதலீட்டாளர்களுக்குக் கைமாற்ற நடவடிக்கை எடுக்கப்படும்.
இவ் நடவடிக்கைகளின் மூலம் நாட்டின் மூலோபாய வளங்களைப் பாதுகாத்துக்கொண்டே வினைத்திறனை உயர்த்துவதே அரசாங்கத்தின் முதன்மை இலக்கு என ஜனாதிபதி இம்மாநாட்டில் தெளிவுபடுத்தினார்.