'காவி உடையைக் களைய எவருக்கும் அதிகாரமில்லை' - மகாநாயக்க தேரர் காரசாரமான நிலைப்பாடு!

சிறைச்சாலை ஒழுங்குவிதிகளுக்கும் இடையிலான முரண்பாடு

சிறைச்சாலையிலடைக்கப்பட்டுள்ள வணக்கத்திற்குரிய கலேகொடஅத்தே ஞானசார தேரரின் காவி உடையைக் (சிவுரு) களைந்து, சிறைச்சாலடை ஆடையை அணிவித்தமை தொடர்பில் தற்போது சமய, சட்ட மற்றும் சமூகத் தளங்களில் பரந்தளவிலான விவாதங்கள் மேலெழுந்துள்ளன.

எதிர்க்கட்சித் தலைவர் சஜித் பிரேமதாஸ பன்னிப்பிட்டிய ருக்மல்கம தர்ம விஜயாலோக விகாரைக்கு விஜயம் செய்து, கோட்டே ஸ்ரீ கல்யாணி சாமஸ்ரீ தர்ம மகா சங்க சபையின் மகாநாயக்க அதிவணக்கத்திற்குரிய இத்தேபானே தம்மாஸங்கார மகா நாகிமியைச் சந்தித்த போதே இவ்விடயம் விசேட கவனத்திற்கு உள்ளானது.

இங்கு கருத்து வெளியிட்ட மகாநாயக்க தேரர், பிக்கு ஒருவரின் காவி உடையைக் களையும் அதிகாரம் மகா சங்கத்தினருக்கு மட்டுமே உரித்தானது எனச் சுட்டிக்காட்டினார். ஞானசார தேரர் பிரதிநிதித்துவப்படுத்தும் கோட்டே சங்க சபையிடம் வினவாமல் அல்லது அது குறித்து எவ்வித ஆலோசனையுமின்றி இவ்வாறான நடவடிக்கைகளை மேற்கொண்டமை கவலையளிப்பதாகக் குறிப்பிட்ட அவர், நாட்டின் முப்பீட மகா சங்கத்தினரில் பெரும்பாலானோர் இதற்குத் தமது எதிர்ப்பை வெளியிடுவதாகவும் தெரிவித்தார். இது தொடர்பில் ஜனாதிபதியைச் சந்தித்து விடயங்களைத் தெளிவுபடுத்த எதிர்பார்ப்பதாகவும் அவர் மேலும் குறிப்பிட்டார்.

சட்டத்தின் ஆட்சியும் பௌத்த வினய அமைப்பும்

ஒரு புறத்தில் நாட்டின் குற்றவியல் சட்டமும் சிறைச்சாலைகள் கட்டளைச் சட்டத்தில் குறிப்பிடப்பட்டுள்ள ஒரே மாதிரியான சட்ட நடைமுறையும் காணப்படுவதாக அவதானிப்பாளர்கள் சுட்டிக்காட்டுகின்றனர். நீதிமன்ற உத்தரவொன்றின் மூலம் சிறைத்தண்டனை விதிக்கப்பட்ட ஒருவரைச் சிறைச்சாலை அமைப்பிற்குள் நடத்தும் போது, தொடர்புடைய கட்டளைச் சட்டத்திற்கு அமைவாகச் செயற்படுவது அதிகாரிகளின் பொறுப்பாகும் என்பதே அரசாங்கத்தின் நிலைப்பாடாகும்.

மறுபுறத்தில், நாட்டின் அரசியலமைப்பின் 9 ஆவது உறுப்புரையின் கீழ் புத்த சாசனத்திற்கு வழங்கப்பட்டுள்ள விசேட அரசியலமைப்பு ரீதியான பாதுகாப்பையும், பல நூற்றாண்டுகளாக நிலவிவரும் சங்க அதிகாரம் அல்லது வினய பாரம்பரியங்களைப் புறக்கணிப்பதும் சிக்கலானது என்பதே சங்கத்தினரின் அபிப்பிராயமாக உள்ளது.

இதனிடையே, சிறைச்சாலை அதிகாரிகளால் எடுக்கப்பட்ட இத் தீர்மானத்தைச் செல்லுபடியற்றதாக்குமாறு கோரி மேல்முறையீட்டு நீதிமன்றத்தில் ரீட் (Rit) மனுவொன்றும் தாக்கல் செய்யப்பட்டுள்ளதால், இப் பிரச்சினையானது சட்ட ரீதியான மற்றும் நீதித்துறை சார்ந்த செயன்முறையொன்றை நோக்கியும் நகர்ந்துள்ளது.

அரசியல் தலையீடும் நுட்பமான சமநிலையும்

பேச்சுவார்த்தையின் பின்னர் ஊடகங்களுக்குக் கருத்துத் தெரிவித்த எதிர்க்கட்சித் தலைவர் சஜித் பிரேமதாஸ, நாட்டின் சட்டம் நடைமுறைப்படுத்தப்படும் அதேவேளையில், நாட்டின் வரலாற்றுச் சிறப்புமிக்க சமய மற்றும் கலாசார அடையாளங்களுக்கு மதிப்பளிப்பது அத்தியாவசியமான காரணியாகும் எனக் குறிப்பிட்டார். பௌத்த மதத்தைப் பாதுகாக்கும் அதேவேளையில், அனைத்து மதங்களுக்கும் இனங்களுக்கும் உரித்தான பாதுகாப்பை உறுதிப்படுத்தி, ஒரே இலங்கை அடையாளம் என்ற குடையின் கீழ் முன்னோக்கி நகர வேண்டும் என அவர் தெரிவித்தார்.

சட்டத்தை அனைவருக்கும் சமமாக நடைமுறைப்படுத்தும் ஜனநாயக அவசியத்திற்கும், இலங்கை கலாசார வேர்களுக்குள் பிக்கு வினயத்தின் மீது காட்டப்படும் உணர்வுபூர்வமான தன்மைக்கும் இடையே முறையான சமநிலையைப் பேணுவதே இவ்வாறான சந்தர்ப்பங்களில் ஆட்சியாளர்களின் முன்னுள்ள பிரதான சவாலாகும் என அரசியல் மற்றும் சட்டப் பகுப்பாய்வாளர்கள் சுட்டிக்காட்டுகின்றனர்.

'காவி உடைக்கு நீதி' - கொழும்பு நோக்கி நகரும் பாதயாத்திரையின் இரண்டாம் நாள் இன்று!

சிறைச்சாலையிலடைக்கப்பட்டுள்ள வணக்கத்திற்குரிய கலேகொடஅத்தே ஞானசார தேரருக்காகவும், பிக்குகளின் சமய உரிமைகளுக்காகவும் மகா சங்கத்தினரின் தலைமையில் ஆரம்பிக்கப்பட்ட பாதயாத்திரை இன்று (11) இரண்டாவது நாளாகவும் முன்னெடுக்கப்படுகின்றது.

'காவி உடைக்கு நீதி - தேசிய அதிஷ்டான பூஜையும் விடுதலையின் பாதயாத்திரையும்' நேற்று (10) காலை கண்டி வரலாற்றுச் சிறப்புமிக்க ஸ்ரீ தளதா மாளிகைக்கு முன்பாக ஆரம்பமானது.

கடுகன்னாவைப் பகுதியில் பாதயாத்திரையின் முதலாம் நாள் நேற்று மாலை நிறைவடைந்த நிலையில், அது இன்றைய தினம் கடுகன்னாவையிலிருந்து மீண்டும் பயணத்தை ஆரம்பிக்கவுள்ளது.

இப் பாதயாத்திரையானது கேகாலை, வரகாப்பொல, நிட்டம்புவ, கடவத்த ஆகிய நகரங்களைக் கடந்து வரும் 15 ஆம் திகதி கொழும்பை சென்றடையவுள்ளதாக வணக்கத்திற்குரிய உலப்பனே சுமனரதன தேரர் தெரிவித்தார்.