அனோஜன் வழக்கு: சவூதி உயர் நீதிமன்றத்தில் மேல்முறையீடு செய்ய சட்டக் குழு இறுதி வடிவம் அளிப்பு!

விதிக்கப்பட்டுள்ள இலங்கை பிரஜையான அனோஜன் சிவராசாவின் தண்டனைக்கு எதிராக, சவூதி உயர் நீதிமன்றத்தில் (Saudi Supreme Court) தாக்கல் செய்யப்படவுள்ள மேல்முறையீட்டு மனு, இலங்கையின் சட்டத்தரணிகள் குழுவின் ஆலோசனைகளைத் தொடர்ந்து இறுதி செய்யப்பட்டு, விரைவில் தாக்கல் செய்யப்படவுள்ளது.

நபிகள் நாயகத்தை அவமதிக்கும் வகையில் பேஸ்புக்கில் (Facebook) பதிவிட்டதாகக் கூறப்படும் குற்றச்சாட்டின் பேரிலேயே, சவூதி அரேபிய மேல்முறையீட்டு நீதிமன்றம் சிவராசாவிற்கு மரண தண்டனை விதித்தது.

முன்னதாக, கீழ் நீதிமன்றம் ஒன்று அவருக்கு 5 ஆண்டுகள் சிறைத்தண்டனை விதித்திருந்த நிலையில், அரசாங்க வழக்கறிஞரால் (Public Prosecutor) செய்யப்பட்ட மேல்முறையீட்டைத் தொடர்ந்து, மேல்முறையீட்டு நீதிமன்றம் அந்தத் தீர்ப்பை ரத்து செய்து மரண தண்டனையாக உயர்த்தியது.

இந்தக் குற்றச்சாட்டை இஸ்லாமிய சட்டத்தின் கீழ் இறைவனுக்கு எதிரான கடுமையான குற்றப்பிரிவான "ஹத்" (Hadd) வகையின் கீழ் நீதிமன்றம் வகைப்படுத்தியுள்ளது.

இந்தத் தீர்ப்பைத் தொடர்ந்து, சவூதி உயர் நீதிமன்றத்தில் மேல்முறையீடு செய்வதற்கு உதவுவதற்காக இலங்கையின் சிரேஷ்ட சட்டத்தரணிகள் குழுவொன்று சவூதி அரேபியாவிற்கு விஜயம் செய்தது.

இக்குழுவினர் சிவராசாவின் வழக்கைக் கையாழும் வழக்கறிஞர்களுடன் பல கட்ட ஆலோசனைகளை நடத்தி, சட்டச் சமர்ப்பிப்புகளை இறுதி செய்ய உதவியுள்ளனர்.

சவூதி அரேபியாவின் உச்ச நீதித்துறை அதிகார அமைப்பான உயர் நீதிமன்றம், கீழ் நீதிமன்றத் தீர்ப்புகளை பிரதானமாகச் சட்ட மற்றும் நடைமுறை ரீதியிலான அடிப்படையில் மட்டுமே மறுஆய்வு செய்யும்.

தூதுவர் அஜ்வத் முன்னதாக சிறையிலிருக்கும் சிவராசாவை நேரில் சந்தித்துப் பேசியிருந்தார்.

இறுதி செய்யப்பட்ட மேல்முறையீட்டு மனு விரைவில் சவூதி உயர் நீதிமன்றத்தில் சமர்ப்பிக்கப்படவுள்ள நிலையில், இது மரண தண்டனையை எதிர்த்துப் போராடுவதற்கான அடுத்த கட்ட சட்ட முயற்சியாகக் கருதப்படுகிறது.