ரணிலின் வீட்டிற்குத் தீவைத்த வழக்கில் ஸ்ரீ ரங்கா உட்பட அறுவர் விடுதலை!

கொழும்பிலுள்ள தனிப்பட்ட வீட்டிற்குத் தீவைத்த சம்பவத்துடன் தொடர்புடைய வழக்கில் சந்தேகநபர்கள் அறுவரைச் சட்டமா அதிபரின் ஆலோசனையின் பேரில் விடுவிப்பதற்கும், ஏனைய சந்தேகநபர்களின் வெளிநாட்டுப் பயணத் தடையை நீக்குவதற்கும் கோட்டை நீதவான் நீதிமன்றம் உத்தரவிட்டுள்ளது.

நீதிமன்றத் தீர்ப்பும் சட்டமா அதிபரின் ஆலோசனையும்

2022 ஆம் ஆண்டு ஜூலை 9 ஆம் திகதி இடம்பெற்ற மக்கள் எழுச்சியின் போது, கொழும்பு 07, ஐந்தாம் ஒழுங்கையில் அமைந்துள்ள முன்னாள் ஜனாதிபதி ரணில் விக்ரமசிங்கவின் தனிப்பட்ட வீட்டிற்குத் தீவைத்த சம்பவம் தொடர்பான வழக்கு கோட்டை நீதவான் நீதிமன்றத்தில் விசாரணைக்கு எடுத்துக்கொள்ளப்பட்டது.

இதன்போது, இச்சம்பவம் தொடர்பாகக் கைது செய்யப்பட்டுப் பிணையில் விடுவிக்கப்பட்டிருந்த முன்னாள் பாராளுமன்ற உறுப்பினர் ஜே. ஸ்ரீ ரங்கா மற்றும் போராட்டக்காரரான பிரியத் நிகேஷல உட்பட ஆறு சந்தேகநபர்களை விடுவிப்பதற்குச் சட்டமா அதிபர் ஆலோசனை வழங்கியுள்ளதாகக் குற்றப்புலனாய்வுத் திணைக்களம் நீதிமன்றத்திற்கு அறிவித்தது.

அதற்கமையத் தகவல்களைப் பரிசீலித்த கோட்டை நீதவான் பசந்த அமரசேன, குறித்த ஆறு சந்தேகநபர்களையும் விடுவித்து உத்தரவிட்டார். இதற்கு முன்னரும் இவ்வழக்கின் மேலும் ஆறு சந்தேகநபர்கள் சட்டமா அதிபரின் ஆலோசனையின் பேரில் விடுவிக்கப்பட்டிருந்தனர்.

வெளிநாட்டுப் பயணத் தடை நீக்கம்

வழக்கு விசாரணைக்கு எடுத்துக்கொள்ளப்பட்ட போது ஆஜரான சட்டத்தரணிகள், ஒவ்வொரு சந்தேகநபர் தொடர்பிலும் சட்டமா அதிபர் வெவ்வேறு ஆலோசனைகளை வழங்கியுள்ளதாகவும், 25 ஆவது சந்தேகநபர் சார்பிலான வழக்கு முடிவடைந்துள்ளதால் விதிக்கப்பட்டுள்ள வெளிநாட்டுப் பயணத் தடைகளை நீக்குமாறும் கோரிக்கை விடுத்தனர்.

ஒரே சம்பவத்துடன் தொடர்புடைய சந்தேகநபர்கள் குறித்துச் சட்டமா அதிபர் வெவ்வேறு சந்தர்ப்பங்களில் மாறுபட்ட ஆலோசனைகளை வழங்கியுள்ளமையை நீதிமன்றம் இதன்போது அவதானித்தது. அதனைக் கருத்திற் கொண்ட நீதவான், வழக்கின் அனைத்துச் சந்தேகநபர்களுக்கும் எதிராக விதிக்கப்பட்டிருந்த வெளிநாட்டுப் பயணத் தடையை உடனடியாக அமலுக்கு வரும் வகையில் நீக்கி உத்தரவிட்டதுடன், அது குறித்துக் குடிவரவு குடியகல்வுக்கட்டுப்பாட்டாளருக்கு அறிவிக்குமாறும் பணித்தார்.

வழக்கின் எதிர்கால நகர்வுகள்

தீப்பற்றல் ஏற்பட்ட சந்தர்ப்பத்தில் அவ்விடத்திற்கு வருகை தந்த கொழும்பு மாநகர சபையின் தீயணைப்பு வாகனத்திற்குள் நுழைவதைத் தடுத்து, கடமைக்கு இடையூறு விளைவித்ததாகச் சந்தேகநபர்களுக்கு எதிராக ஆரம்பக் குற்றச்சாட்டுகள் சுமத்தப்பட்டிருந்தன.

வழக்கு விசாரணைக்கு எடுத்துக்கொள்ளப்பட்ட போது 20 சந்தேகநபர்கள் நீதிமன்றத்தில் ஆஜராகியிருந்ததுடன், ஆஜராகாத சந்துன் குமார ஹேரத் உள்ளிட்ட இருவருக்குத் திறந்த பிடியாணை பிறப்பிக்கப்பட்டது. வழக்கு விசாரணை மீண்டும் 2027 மார்ச் 03 ஆம் திகதி வரை ஒத்திவைக்கப்பட்டது.