ருமேஷ் தரங்கவின் பெயரில் பரவிவரும் உலக விருது செய்தி: உண்மைய பின்னணி!

உலக தடகள விருதுக்கு பரிந்துரைக்கப்பட்டுள்ளதாக சமூக ஊடகங்களில் பரவிவரும் செய்தியும், அதற்காக வாக்கு சேகரிக்கும் இணைய இணைப்புகளும் முற்றிலும் போலி (Fake) என உறுதி செய்யப்பட்டுள்ளது.

ரமேஷ் தரங்கவின் பெயரில் பரவிவரும் உலக விருது செய்தியின் பின்னணி

இலங்கையின் முன்னணி ஈட்டி எறிதல் வீரரான ருமேஷ் தரங்க, 2026 ஆம் ஆண்டிற்கான 'உலகின் சிறந்த தடகள வீரர்' (World Athlete of the Year) விருதுக்குப் பரிந்துரைக்கப்பட்டுள்ளதாகக் கூறி கடந்த சில மணிநேரமாக சமூக வலைத்தளங்களில் செய்தி ஒன்று வேகமாகப் பரவி வந்தது.

அத்துடன், அவருக்கு வாக்களிக்குமாறு கூறி ஒரு சிறப்பு இணைய இணைப்பும் (Link) பகிரப்பட்டு வந்தது. உள்ளூர் விளையாட்டு ரசிகர்கள் பலரும் எந்தவித உண்மைத் தன்மையையும் ஆராயாமல் இச்செய்தியைப் பகிர்ந்து வருவதை அவதானிக்க முடிந்தது.

எனினும், இச்செய்தியும் அது தொடர்பான வாக்கெடுப்பும் முற்றிலும் பொய்யானது மற்றும் சந்தேகத்திற்குரியது என விளையாட்டுத் துறை ஆய்வாளர்கள் சுட்டிக்காட்டியுள்ளனர்.

உத்தியோகபூர்வ அறிக்கைகளில் இல்லாத வெற்றிகள்

ருமேஷ் தரங்க 'டைமண்ட் லீக்' (Diamond League) சாம்பியன்ஷிப்பையும் உலகின் முதலிடத்தையும் வென்றுள்ளதாக அச்செய்தியில் குறிப்பிடப்பட்டிருந்தபோதிலும், சர்வதேச தடகளச் சம்மேளனத்தின் (World Athletics) எந்தவொரு உத்தியோகபூர்வ தரவுத்தளத்திலும் அவ்வாறான பதிவுகள் எதுவும் இல்லை.

ருமேஷ் தரங்க ஆசிய பிராந்தியத்தில் திறமையை வெளிப்படுத்திய ஒரு சிறந்த வீரராக இருந்தபோதிலும், உலகத் தரம் வாய்ந்த முன்னணி தரவரிசையிலோ அல்லது இறுதி பரிந்துரைப் பட்டியலிலோ அவரது பெயர் இடம்பெறவில்லை. ஒரு விளையாட்டு வீரரின் பெயரை தவறாகப் பயன்படுத்தி இவ்வாறான பொய்ப் பிரசாரங்களை மேற்கொள்வதற்குப் பின்னால் ஏதேனும் குறுகிய நோக்கம் இருக்கலாம் என சந்தேகிக்கப்படுகிறது.

சந்தேகத்திற்குரிய இணைப்புகள் குறித்து எச்சரிக்கை!

இச்செய்தியுடன் பரப்பப்படும் வாக்கெடுப்பு இணைய இணைப்பு 'SurveyMonkey' எனும் மூன்றாம் தரப்பு வலைப்பக்கத்திற்கு பயனர்களை அழைத்துச் செல்கிறது.

சர்வதேச தடகளச் சம்மேளனம் தனது விருதுகளுக்கான வாக்கெடுப்புகளைத் தனது உத்தியோகபூர்வ வலைத்தளம் மற்றும் சமூக ஊடகக் கணக்குகள் மூலமாக மட்டுமே நடத்துகிறது. இவ்வாறான உறுதிப்படுத்தப்படாத வெளி இணைப்புக்கள் மூலம் நடத்தப்படும் வாக்கெடுப்புகளின் பின்னணியில் பயனர்களின் தனிப்பட்ட தரவுகளைத் திருடும் (Phishing) அல்லது சமூக ஊடகக் கணக்குகளின் பாதுகாப்பிற்கு அச்சுறுத்தல் ஏற்படுத்தும் சூழ்ச்சிகள் இருக்கலாம் என தொழில்நுட்ப ஆய்வாளர்கள் எச்சரிக்கின்றனர்.

எனவே, உறுதிப்படுத்தப்படாத செய்திகளையும் தெரியாத இணைய இணைப்புகளையும் கிளிக் செய்வதைத் தவிர்க்குமாறும், நாட்டின் விளையாட்டு வீரர்களின் புகழுக்குக் களங்கம் ஏற்படுத்தும் இவ்வாறான போலிப் பிரசாரங்களில் ஏமாற வேண்டாம் என்றும் விளையாட்டுத் துறை வல்லுநர்கள் பொதுமக்களிடம் கேட்டுக்கொண்டுள்ளனர்.