கரு ஜயசூரிய மற்றும் கலாநிதி வசந்தா ஜயசூரிய ஆகியோரால் சமூக நலன்புரிப் பணிகளுக்காக ஆரம்பிக்கப்பட்ட ‘சூர்ய அறக்கட்டளை’ (Surya Foundation) ஊடாகத் தேசிய ஒருமைப்பாட்டிற்காக முன்னெடுக்கப்பட்ட வரலாற்றுச் சிறப்புமிக்க பணிக்கு 10 ஆண்டுகள் பூர்த்தியாகியுள்ளன.
முப்பதாண்டு காலச் சாபம் நிறைந்த யுத்தம் நிறைவடைந்த போதிலும், இன்னமும் இனங்களுக்கு இடையே நிலவும் நம்பிக்கையின்மை மற்றும் பிரிவினைகளுக்கு அரசியல் தீர்வுகள் தேடப்பட்டு வரும் இக்காலகட்டத்தில், இனங்களுக்கிடையில் காணப்படும் மொழி ரீதியான புரிந்தணர்வின்மையே இதற்குப் பிரதான காரணமாக அமைகின்றது என திரு. ஜயசூரிய அவர்கள் நம்பினார். மனிதர்கள் தங்களது உண்மையான உணர்வுகளையும் கருத்துக்களையும் மற்றுமொருவருக்குத் தெளிவாகத் தொடர்பாடல் செய்ய முடியுமாயின், மற்றவர் மீது சந்தேகம் கொள்வதைத் தவிர்க்க முடியும் என்பதை அவர் கண்டுகொண்டார். நாட்டில் மீண்டும் மோதல்கள் உருவாவதை அவர் எவ்விதத்திலும் விரும்பவில்லை. எனவே புதியதொரு செயற்திட்டத்தின் அவசியம் அவருக்குத் தீவிரமாக உணர்ந்தது.
வடக்கிற்குச் சிங்களம் - தெற்கிற்குத் தமிழ்: 2016இல் ஆரம்பிக்கப்பட்ட பயணம்
'சூர்ய அறக்கட்டளை' ஊடாகப் பரந்தளவிலான பணிகள் இடம்பெற்று வந்தபோதிலும், தேசிய ஒருமைப்பாட்டிற்கான பாதை 2016ஆம் ஆண்டிலேயே திறந்துவிடப்பட்டது. கம்பஹா அலுவலகத்தில் தெற்குப் பகுதி சிறுவர்களுக்குத் தமிழ் மொழியையும், யாழ்ப்பாணத்தில் வட பகுதி சிறுவர்களுக்குச் சிங்கள மொழியையும் இலவசமாகக் கற்பிக்கும் வகுப்புகளை ஆரம்பிப்பதன் மூலமே இது சாத்தியமானது. இச்செயற்திட்டம் ஆரம்பிக்கப்பட்டு தற்போது 10ஆவது ஆண்டு கடந்து கொண்டிருக்கின்றது.
இவ்வாறு கல்வியைக் கற்ற 10ஆவது குழுவிற்கான சான்றிதழ்களை வழங்கும் கௌரவிப்பு நிகழ்வு அண்மையில் யாழ்ப்பாணத்தில் நடைபெற்றது. ஒவ்வொரு ஆண்டும் வடக்கைச் சேர்ந்த சுமார் 400 மாணவர்கள் இதன் மூலம் பயனடைகின்றனர். இந்நிகழ்வில் வட மாகாண ஆளுநர் நாகலிங்கம் வேதனாயகம், மேல் மாகாண முன்னாள் ஆளுநர் நவீன் திஸாநாயக்க, யாழ்ப்பாண மாவட்டச் செயலாளர், பிரதேச செயலாளர்கள் மற்றும் பிரதேச அரசியல் பிரதிநிதிகள் உட்படப் பெருந்திரளானோர் கலந்துகொண்டனர்.
சிங்களக் கலாசார பாணியில் மிளிர்ந்த யாழ்ப்பாண மேடை
இவ்விழாவில் தமிழ் சிறுவர்கள் தங்களது கற்றல் திறன்களை வெளிப்படுத்தி அனைவரது கவனத்தையும் ஈர்த்தனர். சிங்களக் கலாசார உடைகளை அணிந்தவாறு அவர்கள் சிங்களப் பாடல்களுக்கு நடனமாடினர். சிங்கள மொழியிலேயே தங்களால் உருவாக்கப்பட்ட குறும்படங்களை/நாடகங்களை நடித்தும் காட்டினர். சிங்கள மொழியில் உரையாற்றினர். பிராந்திய மற்றும் மொழி எல்லைகள் தகர்ந்தெறியப்பட்ட அம்முஹூர்த்தம் அனைவரது பாராட்டையும் பெற்றது.
சூர்ய அறக்கட்டளையின் 30 ஆண்டுகாலப் பணி
'சூர்ய அறக்கட்டளை' 1992ஆம் ஆண்டில் ஆரம்பிக்கப்பட்டது. ஆரம்பம் முதல் இன்று வரை சுகாதார சேவைகள், கண் தானம், சுற்றாடல் திட்டங்கள் மற்றும் கணினித் தொழில்நுட்பம், STEM கல்வி (அறிவியல், தொழில்நுட்பம், பொறியியல் மற்றும் கணிதம்), ஆங்கில மொழிப் பயிற்சி மற்றும் புலமைப்பரிசில் வழங்கல் போன்ற பல்வேறு துறைகளின் ஊடாகப் ஏராளமான மக்களுக்கு இதன் மூலம் நிவாரணம் வழங்கப்பட்டது. இதன் முக்கிய முன்னேற்றப் படியாகவே 2016ஆம் ஆண்டில் இத்திட்டம் வடக்கிற்கும் விரிவுபடுத்தப்பட்டது.
கண்களில் கண்ணீரை வரவழைத்த எதிர்பாராத கௌரவம்
விழா சபையில் எவருமே எதிர்பார்க்காத ஒரு சிறப்புச் சம்பவமும் இடம்பெற்றது. திரு. கரு ஜயசூரிய அவர்கள் மேடையில் நின்று சிறுவர்களுக்குச் சான்றிதழ்களை வழங்கிக் கொண்டிருந்த போது, திடீரெனச் சபையின் மத்தியிலிருந்து மற்றொரு குழுவினர் கேக் மற்றும் நினைவுப் பலகை ஒன்றைக் கொண்டுவந்து மேடையில் வைத்து, அதனை வெட்டுமாறு திரு. கரு ஜயசூரிய அவர்களுக்கு அழைப்பு விடுத்தனர்.
தனைத் தொடர்ந்து, அங்குள்ள 400 சிறுவர்களாலும் கூட்டாகத் தயாரிக்கப்பட்ட கேக், வாழ்த்து அட்டைகள் மற்றும் ஏராளமான நினைவுப் பரிசுகளைத் திரு. ஜயசூரிய அவர்களுக்கு வழங்கித் தங்களது அன்பை வெளிப்படுத்தினர். இந்நிகழ்வு கூடியிருந்த அனைவரது கண்களிலும் ஆனந்தக் கண்ணீரை வரவழைத்த உணர்வுபூர்வமான காட்சியாக அமைந்தது. தங்களுக்குச் சிங்கள மொழியைக் கற்றுக்கொள்வதற்குப் பாதையை அமைத்துக் கொடுத்த தலைவருக்கு வட பகுதிச் சிறுவர்கள் காட்டிய அந்த உண்மையான நன்றியுணர்வு எதனைப் பிரதிபலிக்கின்றது? தேசிய ஒருமைப்பாட்டின் உண்மையான பாலங்களைக் கட்டுவதன் பெறுமதியையும், வட பகுதிச் சிறுவர்களுக்கும் அந்தச் சகோதரத்துவம் எவ்வளவு அவசியமானது என்பதையும்தானே?