ஞானசார தேரர் பொதுமகன் உடையில் நீதிமன்றில்: சமூக வலைத்தளங்களில் கொந்தளிப்பு!

சேனா அமைப்பின் பொதுச்செயலாளர் பூஜ்ய கலகொடஅத்தே ஞானசார தேரர், சிறைச்சாலை அதிகாரிகளால் இன்று (ஒக். 06) கொழும்பு மேல் நீதிமன்றத்திற்கு அழைத்து வரப்பட்டார்.

அவர் பௌத்த துறவிக்குரிய காஷாய ஆடையை அகற்றி, பொதுமகன் (கிஹி) உடையில் நீதிமன்றத்திற்கு வருகை தந்திருந்தமை அவதானிக்கப்பட்டது.

ஆஜராகாமையால் பிறப்பிக்கப்பட்ட பிடியாணை

இஸ்லாமிய மார்க்கத்திற்கு எதிராக அவதூறான கருத்துக்களை வெளியிட்டமை தொடர்பாக ஞானசார தேரருக்கு எதிராகச் சட்டமா அதிபரால் தாக்கல் செய்யப்பட்டிருந்த வழக்குக் கடந்த 29ஆம் திகதி விசாரணைக்கு எடுத்துக் கொள்ளப்பட்ட போது, அவர் நீதிமன்றத்தில் ஆஜராகியிருக்கவில்லை.

அதனைத் தொடர்ந்து அவரைக் கைது செய்து நீதிமன்றத்தில் ஆஜர்படுத்துமாறு உத்தரவிட்டு, கொழும்பு மேல் நீதிமன்ற நீதிபதி புத்திக சி. ராகல அன்றைய தினம் பிடியாணை பிறப்பித்திருந்தார்.

அப் பிடியாணைக்கு அமைவாக நீதிமன்றத்தில் ஆஜர்படுத்துவதற்காகவே ஞானசார தேரர் சிறைச்சாலை அதிகாரிகளால் இன்று நீதிமன்றத்திற்கு அழைத்து வரப்பட்டிருந்தார்.

'துறவி ஆடை அகற்றப்பட்டமை குறித்துக் கவலையடைகிறேன்' - சட்டத்தரணி சஞ்சய மாரம்பே

நீதிமன்றத்தில் சாட்சியமளித்த ஞானசார தேரரின் சட்டத்தரணி சஞ்சய மாரம்பே தெரிவிக்கையில்:

"கௌரவ நீதிபதி அவர்களே.. இன்றைய தினம் ஞானசார தேரரின் துறவி ஆடையைச் சிறைச்சாலையினரால் அகற்றி, பொதுமகன் உடையில் நீதிமன்றத்தில் ஆஜர்படுத்தியுள்ளனர். இது தொடர்பில் நான் ஆழ்ந்த கவலையடைகிறேன். அரசியலமைப்பில் பௌத்த மதத்தைப் பாதுகாத்துப் போற்ற வேண்டும் எனக் குறிப்பிடப்பட்டுள்ளது. ஆனால் இதுவொரு விசனத்திற்குரிய சூழ்நிலையாகும்."

சமூக வலைத்தளங்களில் வெளியான புகைப்படங்கள் மற்றும் கருத்துக்கள்

ஞானசார தேரர் பொதுமகன் உடையில் இருக்கும் புகைப்படங்கள் சமூக வலைத்தளங்களில் வேகமாகப் பரவி வருவதுடன், அது குறித்துப் பல்வேறு தரப்பினரும் கருத்துக்களை வெளியிட்டு வருகின்றனர்.

பிரபல சமூக ஆர்வலர்களான கலாநிதி மகேஷ் ஹப்புகொட மற்றும் சிந்தன தர்மதாச ஆகியோர் தங்களது ஃபேஸ்புக் பக்கங்களில் பதிவிட்டுள்ள கருத்துக்கள் வருமாறு:

கലാநிதி மகேஷ் ஹப்புகொட: "துறவி ஆடையில் எழுதப்பட்டிருந்த உண்மை..."

பௌத்த துறவி மற்றும் துறவிக் கோலம் தொடர்பாக நமது மனங்களில் உள்ள கௌரவத்தோடு பார்க்கும் போது, கலகொடஅத்தே தேரரின் இப் புகைப்படம் ஒருவித அதிர்ச்சியை ஏற்படுத்துகிறது. துறவி ஆடையில் இருந்த ஒருவரை திடீரென வெள்ளையுடையில் அல்லது சிறை உடையில் பார்க்கும் போது 'ஐயோ பாவம்' என்ற எண்ணமே எமக்குள் எழுகின்றது. சமூக வலைத்தளங்களின் எதிர்வினைகளைப் பார்க்கும் போதும் அது உறுதி செய்யப்படுகின்றது. சிங்கள பௌத்த சமூகத்தின் மத்தியில் இதுவொரு தனித்துவமான விவாதப் பொருளாக மாறக்கூடும்.

எனக்குக் கூட இக் காட்சி சற்று மனக்கலக்கத்தை ஏற்படுத்தியது. இருப்பினும்...

அவர் துறவி ஆடையை அணிந்திருந்த காலத்தில் சிந்தித்திருக்க வேண்டிய விடயம் என்னவெனில், அக் காஷாய ஆடைக்கு அவமதிப்பு ஏற்படாதவாறு நடந்துகொள்வதாகும். பொதுபள சேனா மிகவும் பிரபலமாக இருந்த காலத்தில், தனக்கு மேலே எவருமே இல்லை என்ற மிதப்பில் அவர் செயற்பட்டது நினைவிருக்கலாம். அதற்கு அன்றைய மஹிந்த ராஜபக்ஷ அரசாங்கத்தின் பலமும் பயன்படுத்தப்பட்டது.

இன்று அத் தேரர் 'எந்த அரசாங்கமும் எனது காஷாய ஆடையைத் தொட்டதில்லை' எனக் கூறுகிறார். ஆனால் அங்ஙனம் அச்சுறுத்தும் வகையில் நடந்துகொண்ட காலத்தில், 'யாதேனும் ஒரு நாளில் நான் செல்லும் இந்த வழியில் சென்றால் எவரேனும் எனது ஆடையைக் கூட கழற்றிவிடுவார்கள்' என்பதைச் சிந்தித்திருக்க வேண்டும். அது அன்றே அவரது துறவி ஆடையிலேயே எழுதப்பட்டிருந்தது. அதாவது இறுதியில் அவர் செல்லும் பாதையின் தன்மையே அவரை அந்த 'முடிவுப் புள்ளிக்கு' கொண்டுவந்து சேர்க்கும்.

அந்தப் பலத்திலேயே அவர் நீதிமன்றத்தில் கூடச் சத்தமிட்டார். துறவி ஆடையின் பலத்தினால் அது நடந்தது. இறுதியில் அதே அடையாளம் அவருக்கு அற்றதாகிப் போனது.

எப்போதும் காஷாய ஆடை இருக்கிறது என்பதற்காக 'எதையும்' செய்துவிட முடியாது. நாம் சட்டத்திற்கும் இயற்கைக்கும் கட்டுப்பட்டவர்கள். ஒரு அரசியல் செய்யும் போது, அதனால் ஏற்படும் ஏனைய மனிதர்களின் வேதனையைப் பற்றியும் சிந்திக்க வேண்டும்.

பொதுபள சேனாவின் டிஃபென்டர் ஊர்வலங்கள் நினைவிலுள்ள ஒருவருக்குத் தெரியும் - சிங்களவர்களாகிய நமக்கே அச்சத்தை ஏற்படுத்திய அரசியல் அங்கு இருந்தது. சிறுபான்மையினரைப் பற்றிப் பேசவே தேவையில்லை...

அத்தேரர் தான் இந்த நிலைக்கு வருவார் என்றோ, மகா பலம்பொருந்திய 'காஷாய ஆடை' இல்லாமற்போகும் என்றோ நினைக்கவில்லை. ஆனால் அது அன்றே அந்த ஆடையில் எழுதப்பட்டிருந்தது....

துறவி ஆடை அணிந்திருப்பதில் ஒரு அரசியல் இருப்பது போல, அதனை அகற்றுவதிலும் ஒரு அரசியல் இருக்கவே செய்கின்றது.

சிந்தன தர்மதாச: "பொதுமக்கள் முன் வரும்போது காஷாய ஆடைக்கு அனுமதியளிக்கப்பட வேண்டும்"

துறவி ஆடையுடன் சிறையிலடைப்பது அக் காஷாய ஆடைக்குச் செய்யப்படும் அவமதிப்பாகவே நான் பார்க்கிறேன். சிறைவாசத்தில் இருக்கும் போது ஒரு துறவியாக இருந்தாலும், அக் காஷாய ஆடை தண்டனைக்கு உள்ளாகாமல் சாதாரண சிறை ஆடையை அணிவது பொருத்தமானது. ஆனால் அதனை ஊடகங்களில் விளம்பரப்படுத்துவது ஒரு நாகரிகமற்ற செயலாகும். அதுவொரு கைதியின் தனிப்பட்ட சுதந்திரத்திற்குச் செய்யப்படும் அநீதியாகும். சிறைக் கூடத்திற்குள் அதற்குரிய உடையில் இருந்தாலும், நீதிமன்றத்திற்கு அல்லது பொதுமக்கள் முன்னிலையில் வரும்போது மீண்டும் தனது விருப்பத்திற்கேற்ப காஷாய ஆடையை அணிவதற்கு அனுமதி இருக்க வேண்டும். கைதி என்பவர் குறிப்பிட்ட காலப்பகுதிக்குத் தண்டனைக்கு உள்ளாக்கப்பட்ட ஒரு மனிதனாவான்.