சூதாட்டத்தில் ஈடுபட்டுவந்த 8 வெளிநாட்டுப் பிரஜைகளைத் தலங்கம பொலிஸ் நிலைய அதிகாரிகள் கைது செய்துள்ளனர்.
கடந்த 4ஆம் திகதி தலவத்துகொட பகுதியிலுள்ள வீடொன்றில் சிலர் தங்கியிருந்து, கணினிகள் மற்றும் கைப்பேடிகளைப் பயன்படுத்தி இணையவழியினூடாகச் சட்டவிரோதமான முறையில் பணத்தைப் பந்தயமாக வைத்துச் சூதாட்டத்தில் ஈடுபடுவதாகக் கிடைத்த தொலைபேசித் தகவலுக்கு அமைய, தலங்கம பொலிஸார் விசாரணைகளை ஆரம்பித்திருந்தனர்.
அதற்கமைய, கடுவலை நீதவான் நீதிமன்றத்திடம் பெறப்பட்ட தேடுதல் பிடியாணைக்கு அமைய, குற்றப் பதிவுக் பிரிவு, குற்றப் புலனாய்வுத் திணைக்களத்தின் கணினிப் குற்றப் பிரிவு மற்றும் பொலிஸ் சுற்றுலாப் பிரிவு அதிகாரிகளின் உதவியுடன் நேற்று (04) குறித்த வீடு சோதனையிடப்பட்டது.
கைப்பற்றப்பட்ட பொருட்கள் மற்றும் சந்தேகநபர்கள்
இந்தச் சோதனையின் போது, அவ்வீட்டில் தங்கியிருந்த 8 வெளிநாட்டுச் சந்தேகநபர்கள் கைது செய்யப்பட்டதுடன், அவர்களிடம் இருந்து 6 கணினிகள், 39 கைப்பேசிகள் உட்படப் பல கணினி உபகரணங்களும் பொலிஸாரால் கைப்பற்றப்பட்டுள்ளன.
கைது செய்யப்பட்ட சந்தேகநபர்கள் 22 முதல் 51 வயதிற்குட்பட்ட இந்தியப் பிரஜைகள் என அடையாளம் காணப்பட்டுள்ளதுடன், இது தொடர்பான மேலதிக விசாரணைகளைத் தலங்கம பொலிஸார் தீவிரமாக முன்னெடுத்து வருகின்றனர்.