தங்கியுள்ள ஈரானியக் கப்பல்களுக்கு அத்தியாவசியப் பொருட்களை வழங்குவது தொடர்பில் அமெரிக்காவினால் அரசாங்கத்திற்கு அழுத்தம் பிரயோகிக்கப்பட்டதாக வெளியாகும் செய்திகளை வெளிவிவகார அமைச்சர் நிராகரித்துள்ளார்.
சர்வதேசக் கடற்பரப்பில் தங்கியுள்ள 47 கப்பல்கள்
இலங்கையின் 12 கடல் மைல் எல்லைக்கு அப்பால் உள்ள சர்வதேசக் கடற்பரப்பில் தற்போது சுமார் 47 வெளிநாட்டுக் கப்பல்கள் நங்கூரமிட்டுள்ளன.
ஹோர்முஸ் நீரிணையில் (Strait of Hormuz) நிலவும் கடற்போக்குவரத்து நெருக்கடி காரணமாகவே இந்த நிலைமை ஏற்பட்டுள்ளதுடன், அவற்றில் சுமார் 19 கப்பல்கள் ஈரானுக்குச் சொந்தமானவை என வெளிவிவகார அமைச்சு சுட்டிக்காட்டுகின்றது.
இந்தக் கப்பல்களுக்குச் சேவைகள் மற்றும் அத்தியாவசிய விநியோகங்களை வழங்குவது தொடர்பில் அமெரிக்க ஐக்கிய நாடுகளினால் இலங்கை அரசாங்கத்திற்கு எவ்வித அழுத்தமும் அல்லது உத்தரவும் பிறப்பிக்கப்படவில்லையென வெளிவிவகார அமைச்சர் விஜித ஹேரத் தெளிவுபடுத்தியுள்ளார்.
இறைமையும் நடுநிலையான வெளிவிவகாரக் கொள்கையும்
இலங்கை எவ்வித பாஹிய (வெளிப்புற) அழுத்தங்களுக்கும் பணியாது என்றும், நாட்டின் இறைமை மற்றும் சுதந்திரத்தைப் பாதுகாத்தே தீர்மானங்களை எடுக்கும் என்றும் வெளிவிவகார அமைச்சர் வலியுறுத்தினார்.
சர்வதேசத் தடைகளுக்கு உள்ளாகியுள்ள கப்பல்களுக்கு அரசாங்கம் ஒருபோதும் எரிபொருளையோ அல்லது ஏனைய விநியோகங்களையோ வழங்கவில்லையென அவர் குறிப்பிட்டார்.
மானிடவியல் தேவைகளின் போது சர்வதேசக் கடல் சட்டத்திற்கு அமைவாகச் செயற்படும் அதேவேளை, அரசாங்கம் எப்போதும் நடுநிலையான வெளிவிவகாரக் கொள்கையையே பின்பற்றும் என்றும் அவர் தெரிவித்தார்.
தனியார் துறையின் பொறுப்பும் ஆபத்தும்
ஒருவேளை உள்நாட்டுத் தனியார் நிறுவனங்கள் இதுபோன்ற கப்பல்களுக்குப் பொருட்கள் அல்லது சேவைகளை வழங்குமாயின், அதற்குரிய சட்ட நிலைமைகள் மற்றும் ஆபத்துக்களைப் புரிந்துகொள்வது அந்நிறுவனங்களின் பொறுப்பாகும் என அரசாங்கம் தெரிவிக்கின்றது.
அமெரிக்க டொலர் நிதி முறைமையினூடாகப் பரிவர்த்தனைகளை மேற்காள்ளும்போது, சர்வதேசத் தடைகள் காரணமாக ஏற்படக்கூடிய ஆபத்துக்கள் குறித்துத் தனியார் துறை தீவிரக் கவனம் செலுத்த வேண்டுமென அவதானிகள் சுட்டிக்காட்டுகின்றனர்.
அமெரிக்கச் சட்டங்களை மீறுவதைத் தவிர்ப்பது குறித்து நாட்டின் கடற்போக்குவரத்து முகவர்கள் மற்றும் எரிபொருள் விநியோகஸ்தர்களுக்கு விழிப்புணர்வூட்டும் நடவடிக்கையாகத் தனியார் துறை மிகுந்த பொறுப்புடன் செயற்பட வேண்டுமெனச் சுட்டிக்காட்டப்பட்டுள்ளது.
இராஜதந்திர விளக்கமளிப்புகள்
இதனிடையே, இரு நாடுகளுக்கும் இடையே இடம்பெற்ற இராஜதந்திரப் பேச்சுவார்த்தைகளின் உள்விவரங்களை வெளிப்படுத்த முடியாது என இலங்கையிலுள்ள அமெரிக்கத் தூதரகம் தெரிவித்துள்ளது.
இருப்பினும், தட விதிக்கப்பட்ட கப்பல்களுக்கு அறியாமல் உதவி வழங்குவதன் மூலம் ஏற்படக்கூடிய ஆபத்துக்கள் குறித்து இலங்கையின் கடல்சார் மற்றும் சேவைத் துறையைச் சேர்ந்த 40க்கும் மேற்பட்ட அதிகாரிகளுக்கு விழிப்புணர்வூட்டும் சிறப்புப் பட்டறையொன்று நடத்தப்பட்டதாகத் தூதரகம் குறிப்பிட்டுள்ளது.
சர்வதேசக் கடற்பரப்பில் தங்கியுள்ள தடைகளுக்கு உள்ளான இத்தகைய கப்பல்களுக்குத் தெரியாமல் சேவைகளை வழங்குவதன் மூலம் உள்நாட்டு நிறுவனங்கள் சர்வதேசச் சட்ட மற்றும் நிதி நெருக்கடிகளில் சிக்குவதைத் தடுப்பதற்காகவே அமெரிக்கத் தூதரகம் இலங்கை அதிகாரிகளுக்கு இவ்வாறு விழிப்புணர்வூட்டியுள்ளது.