எல்ல நியூபேர்க் தேயிலை தொழிற்சாலை ஆடம்பர விடுதியாக மாற்றம்

பாரம்பரியத்தைப் பேணிப் பாதுகாத்து, பிரவுன்ஸ் நிறுவனம் (Browns) எல்ல நியூபேர்க் (Newburgh) தேயிலைத் தொழிற்சாலையை முழுமையான டிஜிட்டல் தொழில்நுட்பத்துடன்கூடிய ஆடம்பர விடுதியாக மாற்றியுள்ளது.

நூற்றாண்டு கால தேயிலை வரலாற்றிற்குப் புதிய வடிவம்

இலங்கையின் மலைநாட்டுத் தேயிலைச் சுற்றுலாத்துறைக்குப் புதிய மதிப்பைக் கூட்டும் வகையில், 1903 ஆம் ஆண்டு ஆரம்பிக்கப்பட்ட வரலாற்றுச் சிறப்புமிக்க நியூபேர்க் தேயிலைத் தொழிற்சாலை, ஆடம்பரச் சுற்றுலா விடுதியாக மாற்றியமைக்கப்பட்டுள்ளது.

பிரவுன்ஸ் ஹோட்டல்ஸ் அண்ட் ரிசோர்ட்ஸ் (Browns Hotels & Resorts) குழுமத்தினால் 2024 ஆம் ஆண்டில் தொடங்கப்பட்ட இத்திட்டம், ‘Newburgh Ella – The Tea Factory Resort’ எனும் பெயரில் 2026 பெப்ரவரி மாதத்தில் உத்தியோகபூர்வமாகத் தனது செயல்பாடுகளைத் தொடங்கியது.

தொழிற்சாலையின் பழமையான கட்டிடக்கலை அம்சங்கள் மற்றும் புகழ்பெற்ற ஆரஞ்சு நிற புகைப் போக்கியை (Orange Chimney) அப்படியே தக்கவைத்து இந்த நவீனமயமாக்கல் மேற்கொள்ளப்பட்டுள்ளமை இதன் சிறப்பம்சமாகும்.

எல்ல கெப் பள்ளத்தாக்கு அருகில் தனித்துவமான அமைவிடம்

எல்ல ரொக் (Ella Rock) மற்றும் புஞ்சி சிறிபாயா (Little Adam's Peak) ஆகியவற்றிற்கு இடையே அமைந்துள்ள புகழ்பெற்ற எல்ல கெப் (Ella Gap) பள்ளத்தாக்கு தெளிவாகப் புலப்படும் அழகிய நிலப்பரப்பில் விடுதி அமைக்கப்பட்டுள்ளது.

இயற்கை எழிலைக் கண்டுகளிப்பதற்காகவே சிறப்பாக வடிவமைக்கப்பட்ட ‘ஸ்கை டெக்’ (Sky Deck) ரசனை மேடையும், சுற்றியுள்ள தேயிலைத் தோட்டங்களும் சுற்றுலாப் பயணிகளின் பிரதான ஈர்ப்பு மையங்களாக மாறியுள்ளன.

தேயிலைக் கொழுந்துகளின் பெயரிலான ஆடம்பர அறைகள்

இலங்கைத் தேயிலை உற்பத்தியின் தரப் பிரிவுகளை அடிப்படையாகக் கொண்டு விடுதியின் அறைகள் வகைப்படுத்தப்பட்டுள்ளதுடன், அவற்றுக்கான வசதிகள் பின்வருமாறு அமைந்துள்ளன:

• சில்வர் டிப் (Silver Tip): மிக உயர்ந்த மட்டத்திலான 10 ஆடம்பர அறைகள்.

• கோல்ட் டிப் (Gold Tip): தனிப்பட்ட பால்கனி வசதியைக் கொண்ட 22 அறைகள்.

• புரோன்ஸ் டிப் (Bronze Tip): பாரம்பரிய வடிவமைப்புடன் கூடிய 09 அறைகள்.

• ஜனாதிபதித் தொகுதி (Presidential Suite): அதிநவீன வசதிகள் நிறைந்த ஒரு தனித்துவமான தங்குமிட அலகு.

மாற்றுத்திறனாளிகள் (differently abled) இலகுவாக நடமாடக்கூடிய வகையில் விடுதி வளாகம் வடிவமைக்கப்பட்டுள்ளது.

உள்ளூர் உணவு மற்றும் தேயிலை அனுபவங்கள்

தொழிற்சாலை ஆரம்பிக்கப்பட்ட ஆண்டினை நினைவுகூரும் வகையில் பெயரிடப்பட்ட ‘1903 The Dining Room’ பிரதான உணவகத்திற்கு மேலதிகமாக மேலும் மூன்று உணவகங்கள் இங்கு இயங்குகின்றன:

• ஈஸ்டர்ன் வேலி (Eastern Valley): திறந்தவெளி ஆசிய உணவு அனுபவங்கள்.

• ஜார்ஜ் தாம்சன் பவுண்டர்ஸ் டாவர்ன் (George Thomson Founder’s Tavern): தோட்டத்தின் நிறுவனரை நினைவுகூரும் வகையில், தேயிலை கலந்த பானங்களை வழங்கும் மதுபான ஊர்தி (Bar Truck).

• த்ரீ டிப்ஸ் கஃபே (Three Tips Café): பல்வேறு தரத்திலான இலங்கைத் தேயிலையைச் சுவைத்துப் பார்க்கும் மற்றும் கொள்முதல் செய்யும் மையம்.

விடுதி வளாகத்தில் சிறிய அளவில் இயங்கும் தேயிலைத் தொழிற்சாலை மூலம் தேயிலைக் கொழுந்து பறிப்பது முதல் உற்பத்தி வரையிலான நடைமுறைகளைக் கற்றுக்கொள்வதற்கு விடுதியில் தங்குபவர்களுக்கும் வெளிச்சுற்றுலாப் பயணிகளுக்கும் வாய்ப்பு அளிக்கப்பட்டுள்ளது.

பசுமைசால் கருத்துருக்களும் சமூகப் பங்களிப்பும்

இலங்கையின் விருந்தோம்பல்துறையின் சுற்றுச்சூழல் நட்புத் தரநிலைகளில் இணைந்து, இவ்விடுதி முழுமையாகக் காகிதமற்ற (100% Paperless) நிறுவனமாக தேசிய தூய்மை உற்பத்தி மையத்தின் (NCPC) சான்றிதழைப் பெற்றுள்ளது.

ஆற்றல் திறனுக்காக (Energy Efficiency) A+ தரச் சான்றிதழும் விடுதிக்குக் கிடைத்துள்ளது.

விடுதியின் ஊழியர்களில் 70 சதவீதத்திற்கும் அதிகமானோர் அப்பகுதியைச் சேர்ந்த உள்ளூர்வாசிகளாவர். அவர்களுள் பழைய தொழிற்சாலையில் பணியாற்றிய அனுபவமிக்க ஊழியர்கள் பலரும் அடங்குவர்.

தெற்காசிய விருது

• தெற்காசியச் சுற்றுலா விருது வழங்கும் விழாவில் (SATA), பிராந்தியத்தின் ‘சிறந்த புதிய விடுதி’ (Leading Best New Hotel in South Asia) என்ற விருதை நியூபேர்க் எல்ல விடுதி தட்டிச்சென்றது.

• புகழ்பெற்ற ஒன்பது வளைவுப் பாலம் (Nine Arches Bridge), தெமோதரை இரயில் வளைவு மற்றும் பெக்கோ ட்ரெயில் (Pekoe Trail) உள்ளிட்ட மலைநாட்டுச் சுற்றுலாப் பாதைகள் பலவற்றை இவ்விடுதி வளாகத்திலிருந்து இலகுவாகச் சென்றடைய முடியும்.