வெளிநாட்டுப் பணியாளர்களின் பாதுகாப்பிற்குப் புதிய தேசிய திட்டம்

டொலர்களை ஈட்டித் தந்த வெளிநாட்டுப் பணியாளர்களின் பாதுகாப்பு மற்றும் நலன்புரியை உறுதிப்படுத்தும் தீர்க்கமான உலகளாவிய வேலைத்திட்டம் இலங்கையில் உத்தியோகபூர்வமாக வெளியிடப்பட்டுள்ளது.

வெளிவிவகார, வெளிநாட்டு வேலைவாய்ப்பு மற்றும் சுற்றுலா அமைச்சினால் செயற்படுத்தப்படும் இவ்வேலைத்திட்டத்திற்கு ஐக்கிய நாடுகளின் சர்வதேச புலம்பெயர்ந்தோர் அமைப்பின் (IOM) முழுமையான ஆதரவு கிடைத்துள்ளது.

வெளிநாடுகளிலுள்ள பணியாளர்களின் உரிமைகள் மற்றும் பாதுகாப்பை உறுதி செய்வதை நோக்கமாகக் கொண்ட 2026–2028 தேசிய நடைமுறைப்படுத்தல் திட்டம் (NIP) அரசாங்கத்தினால் உத்தியோகபூர்வமாக அறிவிக்கப்பட்டுள்ளது.

உலகளாவிய உடன்படிக்கையும் இலங்கையின் நடவடிக்கைகளும்

பாதுகாப்பான மற்றும் சட்டப்பூர்வமான புலம்பெயர்விற்கான உலகளாவிய உடன்படிக்கையில் (GCM) இலங்கை 2018 ஆம் ஆண்டில் ஐக்கிய நாடுகளின் உறுப்பு நாடுகளான 151 நாடுகளுடன் இணைந்து கையெழுத்திட்டது.

• 23 பிரதான இலக்குகளின் அடிப்படையில் இந்த உடன்படிக்கை கட்டியெழுப்பப்பட்டுள்ளது.

• சட்டப்பூர்வமான புலம்பெயர்வு வழிகளை விரிவுபடுத்துவதும் மனித கடத்தலைத் தடுப்பதும் இதன் முதன்மை இலக்காகும்.

• ஆசிய-பசிபிக் பிராந்தியத்தில் இவ்வேலைத்திட்டத்தை முன்னின்று செயற்படுத்தும் முன்னணி 8 நாடுகளுக்குள் இலங்கையும் உள்ளடங்குகின்றது.

இந்தத் தேசிய திட்டத்திற்கு கடந்த 2026 ஆகஸ்ட் மாதத்தில் அமைச்சரவை அனுமதி கிடைத்திருந்தது.

பொருளாதாரத்திற்கு 8 பில்லியன் டொலர் பலம்

நாட்டின் பொருளாதார ஸ்திரத்தன்மையின் பிரதான உந்துசக்தியாக வெளிநாட்டுப் பணியாளர்கள் மாறியுள்ளதாக உத்தியோகபூர்வ தரவுகள் சுட்டிக்காட்டுகின்றன.

ஐக்கிய நாடுகள் அமைப்பின் இலங்கைக்கான வதிவிட ஒருங்கிணைப்பாளர் மார்க்-அண்ட்ரே பிரான்சே (Marc-André Franche) சுட்டிக்காட்டுகையில், 2025 ஆம் ஆண்டில் வெளிநாட்டுப் பணியாளர்களால் நாட்டிற்கு அனுப்பப்பட்ட பணத்தின் அளவு 8 பில்லியன் அமெரிக்க டொலர்களைக் கடந்துள்ளதாகத் தெரிவித்தார். இது இலங்கை ரூபாயில் 2.4 ட்ரில்லியனுக்கும் அதிகமான பாரிய தொகையாகும்.

நாட்டிற்குக் கிடைக்கும் வெளிநாட்டுச் செலாவணியில் கணிசமான பங்கைப் பெற்றுத்தரும் இந்தப் பணியாளர் சமூகம் இன்னும் சில பிரச்சினைகளை எதிர்கொண்டு வருகின்றது:

• ஆட்களைப் பணியமர்த்தும்போது இடம்பெறும் சட்டவிரோதப் பண வசூல்கள் மற்றும் மோசடிகள்.

• சேவை ஒப்பந்த மீறல்கள் மற்றும் போதுமான சட்டப் பாதுகாப்பு இன்மையமை.

• வெளிநாடு செல்லும்போது மற்றும் மீண்டும் தாயகம் திரும்பும்போது எதிர்கொள்ளும் சமூக மற்றும் பொருளாதார சவால்கள்.

கொள்கை ரீதியான மாற்றத்தின் அவசியம்

இந்த புதிய தேசிய திட்டம் அரசாங்க நிறுவனங்கள், புத்திஜீவிகள், சிவில் அமைப்புகள் மற்றும் வெளிநாட்டுப் பணியாளர் பிரதிநிதிகளின் பரந்த பங்கேற்புடன் வரைவு செய்யப்பட்டுள்ளது.

இலங்கை வெளிநாட்டு வேலைவாய்ப்புப் பணியகச் சட்டத்தில் எதிர்காலத்தில் கொண்டுவரப்படவுள்ள திருத்தங்களுடன் இந்தத் திட்டம் இணைக்கப்படவுள்ளது. பல்வேறு நிறுவனங்களுக்கு இடையிலான தொடர்புகளை மேலும் ஒருங்கிணைத்து, முடிவுகளைக் கண்காணிக்கும் வெளிப்படைத்தன்மை கொண்ட பொறிமுறையொன்றை உருவாக்குவதே அரசாங்கத்தின் நோக்கமாகும்.

வெளிநாட்டுப் பணியாளர்களை வெறும் வெளிநாட்டுச் செலாவணியை ஈட்டித் தருபவர்களாக மட்டுமே பார்க்காமல், அவர்களின் பாதுகாப்பும் மனித கௌரவமும் பேணப்படும் அமைப்பொன்று நடைமுறையில் சாத்தியமாவதே இதன் உண்மையான வெற்றியைத் தீர்மானிக்கும்.