ஜெரோமின் 1,500 கட்டில்கள் திட்டத்தின் உண்மைப் பின்னணி இதோ!

1,500 கட்டில்களைக் கொண்ட மையம் ஒரு மருத்துவமனையா? அல்லது தங்குமிட வளாகமா? என்பது குறித்த விபரம்:

போதகர் ஜெரோம் பெர்னாண்டோவினால் கட்டுநாயக்கவில் அமைப்பதற்குத் திட்டமிடப்பட்டுள்ள 1,500 கட்டில்களைக் கொண்ட பிரம்மாண்ட மையம் குறித்து இப்போதெல்லாம் சமூகத்திலும் ஊடக வெளியிலும் தீவிரமாகப் பேசப்பட்டு வருகிறது.

இது அரசாங்கத்தின் பிரதான கற்பித்தல் மருத்துவமனையான களுபோவிலை மருத்துவமனையின் மொத்தக் கொள்ளளவையும் (கிட்டத்தட்ட 1,100 கட்டில்கள்) விஞ்சும் அளவாகும்.

இருப்பினும், இந்த இடம் முழுமையான மருத்துவச் சிகிச்சைகளை வழங்கும் ஒரு மருத்துவமனையா? அல்லது ஆன்மீகச் சுகமளிப்புச் சேவைகளுக்காக வருகை தரும் பக்தர்களுக்கான தங்குமிட மையமா? என்பது குறித்துக் கண்டறிவது அவசியமானதாகும்.

1,500 கட்டில்களைக் கொண்ட தங்குமிடத் திட்டம்

கட்டுநாயக்கவிலுள்ள ‘மிரக்கிள் டோம்’ (Miracle Dome) வளாகத்திற்கு அருகில் அமைக்கப்பட்டு வரும் ‘மிரக்கிள் டோம் சிட்டி’ (Miracle Dome City) நிலப்பரப்பில் இந்த வசதி நிறுவப்படவுள்ளது.

போதகர் ஜெரோம் பெர்னாண்டோவின் உத்தியோகபூர்வ அறிவிப்புகளுக்கு அமைவாக, சுகமளிப்பு வழிபாடுகளுக்காக நாட்டின் நாலா பாகங்களிலிருந்தும் வெளிநாடுகளிலிருந்தும் ஆயிரக்கணக்கான மக்கள் வருகை தருகின்றனர்.

நீண்டகால நோய்களினால் பாதிக்கப்பட்டுள்ள, தூர இடங்களிலிருந்து வருகை தரும் ஏழை மக்களுக்கும் தங்குமிட வசதிகள் இல்லாதவர்களுக்கும் தங்கியிருப்பதற்காகவே இந்த மையம் தயாரிக்கப்படுவதாக அத்தரப்பினர் தெரிவிக்கின்றனர்.

நிதி உதவி திரட்டப்படும் விதம்

இத்திட்டத்திற்காக உள்நாட்டு மற்றும் சர்வதேச பக்தர்களிடமிருந்து நிதிப் பங்களிப்புகளைப் பெற்றுக்கொள்ளும் நடவடிக்கைகள் தற்போது ஆரம்பிக்கப்பட்டுள்ளன.

‘Pledge A Bed’ (ஒரு கட்டிலுக்குப் பொறுப்பேருங்கள்) எனும் பெயரில் செயற்படுத்தப்படும் நிதி திரட்டும் திட்டத்தின் கீழ் பின்வரும் தகவல்கள் வெளியாகியுள்ளன:

• ஒரு கட்டில் மற்றும் உள்கட்டமைப்புச் செலவீனம் 500,000 ரூபா என மதிப்பிடப்பட்டுள்ளமை (சுமார் 1,670 அமெரிக்க டொலர்கள்).

• உள்நாட்டு மற்றும் வெளிநாட்டு கடன்/பற்று அட்டைகள் (Credit/Debit Cards) மூலம் அந்தப் பங்களிப்புப் பணத்தைப் பெற்றுக்கொள்ளுதல்.

• தூர இடைவெளி காரணமாகச் சிகிச்சைகள் அல்லது பிரார்த்தனைகளைத் தவறவிடும் மக்களுக்கு நிவாரணம் வழங்குவதே இத்திட்டத்தின் முதன்மை நோக்கம் எனத் தெரிவிக்கப்பட்டுள்ளமை.

சுற்றுச்சூழல் குற்றச்சாட்டுகளும் கள ஆய்வும்

‘மிரக்கிள் டோம் சிட்டி’ திட்டத்தினால் அப்பகுதியின் சுற்றாடலுக்குப் பாதிப்பு ஏற்படுவதாகக் கடந்த நாட்களில் சமூக வலைத்தளங்களில் பல்வேறு குற்றச்சாட்டுகள் முன்வைக்கப்பட்டன.

இது தொடர்பாகச் சிவில் அமைப்புகளின் பிரதிநிதிகள் குழுவொன்று குறித்த இடத்தில் கள ஆய்வு நடவடிக்கையில் ஈடுபட்டது.

இதன்போது கருத்துத் தெரிவித்த சிவில் செயற்பாட்டாளர் சஞ்சய மஹவத்த, குறித்த நிலப்பரப்பை அவதானித்த போது சுற்றாடல் பாதுகாப்புத் தரநிலைகள் பின்பற்றப்படுவதைக் காணக்கூடியதாக இருந்ததாகக் குறிப்பிட்டார்.

அத்துடன், இணையதளங்களில் பகிரப்படும் குற்றச்சாட்டுகளுக்கும் களத்தின் உண்மை நிலைமைக்கும் இடையே வேறுபாடு காணப்படுவதாகவும், நோயுற்ற மற்றும் ஆதரவற்ற மக்களுக்குத் தங்குமிடம் வழங்குவதற்காகவே இந்த 1,500 கட்டில்களைக் கொண்ட மையம் திட்டமிடப்பட்டுள்ளதாகவும் அவர் மேலும் தெரிவித்தார்.

மிகப்பெரிய மூடிய அரங்குகளுள் ஒன்று

கட்டுநாயக்கவில் அமைந்துள்ள ‘தி மிரக்கிள் டோம்’ அரங்கு 2023 ஆம் ஆண்டில் திறக்கப்பட்டதுடன், 5,000 இற்கும் அதிகமான ஆசனக் கொள்ளளவைக் கொண்ட நாட்டின் மிகப்பெரிய மூடிய அரங்குகளில் (Indoor Auditoriums) ஒன்றாகும்.

கடந்த காலத்தில் தேசபோதனைகள் மற்றும் மத உள்ளடக்கங்கள் தொடர்பாக ஜெரோம் பெர்னாண்டோ தரப்பினருக்கு எதிராகச் சட்ட விசாரணைகள் முன்னெடுக்கப்பட்டதுடன், அவர் வெளிநாடு சென்றிருந்து மீண்டும் திரும்பியதன் பின்னர் நீதிமன்ற நடவடிக்கைகளில் ஆஜராகியிருந்தார்.

தற்போது செயற்படுத்தப்பட்டு வரும் ‘மிரக்கிள் டோம் சிட்டி’ திட்டமானது மத வழிபாடுகளுக்கு மேலதிகமாகப் பரந்த உள்கட்டமைப்பு வசதிகள் மற்றும் தங்குமிட வளாகம் வரை விரிவாக்கம் செய்யத் திட்டமிடப்பட்டுள்ள ஒரு திட்டமாகும்.