விருந்தினரொருவர் வீட்டிற்கு வரும்போது பான உபசரிப்பு செய்வது நாட்டின் கலாச்சாரத்தில் ஆழமாக வேரூன்றிய ஒரு வழக்கமாகும். இருப்பினும், தற்காலத்தில் ஒரு கப் தேநீர் உபசரிக்கும் போது கூட "சீனி குறைவாகவா? அல்லது இல்லாமலா?" எனக் கேட்க வேண்டிய நிலை ஏற்பட்டுள்ளது. இது இலங்கையின் அன்றாட சமூக வாழ்க்கையில் தொற்றா நோய்கள் எந்தளவிற்குத் தீவிரமாக ஊடுருவியுள்ளன என்பதைத் தெளிவாகப் பிரதிபலிக்கிறது.
இலங்கையின் தற்போதைய மருத்துவமனை அமைப்பில், நோயாளி ஒருவர் மருத்துவரைச் சந்திக்கச் செல்லும்போது காணப்படும் கடும் நெரிசல் மற்றும் நீண்ட வரிசைகள் காரணமாக, நோயாளியின் நிலைமை குறித்து விரிவாகக் கலந்துரையாடி ஆலோசனைகளை வழங்க மருத்துவர்களுக்குக் கிடைக்கும் நேரம் மிகவும் வரம்பிற்குட்பட்டதாக உள்ளது. மறுபுறம், பொதுமக்கள் தங்கள் சுகாதாரப் பிரச்சினைகள் குறித்துப் போதுமான நேரத்தைச் செலவிட்டு விவாதிக்கவோ அல்லது தடுப்புச் சுகாதார முறைகள் குறித்து விழிப்புணர்வு பெறவோ வாய்ப்பு கிடைக்காதது நீண்டகாலப் பிரச்சினையாக மாறியுள்ளது.
பாரம்பரிய மருந்தகங்களைத் தாண்டிய நோய்த்தடுப்பு அணுகுமுறை
இந்த பின்னணியைக் கருத்திற் கொண்டு, பல கிராம உத்தியோகத்தர் பிரிவுகளை உள்ளடக்கிச் சமூக மட்டத்தில் சுகாதார ஆலோசனைகள், பரிசோதனைகள் மற்றும் வழிகாட்டல்களை வழங்கும் நோக்கில் ‘ஆரோக்யா நல்வாழ்வு மையங்கள்’ (Arogya Wellness Centers) என்ற கருத்தாக்கத்தை அறிமுகப்படுத்தச் சுகாதாரத் துறை நடவடிக்கை எடுத்துள்ளது. சுகாதார மற்றும் ஊடக அமைச்சின் வழிகாட்டலின் கீழ் செயல்படுத்தப்படும் இந்தப் புதிய வேலைத்திட்டம் செப்டம்பர் 01 ஆம் திகதி முதல் நடைமுறைப்படுத்தப்படவுள்ளது.
இந்த மையங்கள் ஒரு பாரம்பரிய மருந்தகத்திற்கோ (Dispensary) அல்லது வெளிநோயாளி பிரிவிற்கோ (OPD) மட்டும் வரம்பிற்குட்பட்டவை அல்ல. ஒருவர் நோயுற்ற பிறகு சிகிச்சை அளிப்பதை விட, நோய்கள் ஏற்படுவதை முன்கூட்டியே தடுத்தல் (Preventive Care) மற்றும் ஒட்டுமொத்த உடல் நல்வாழ்வை (Wellness) மேம்படுத்துவதே இதன் முதன்மை நோக்கமாகும். ஒவ்வொரு மையத்திற்கும் ஒரு மருத்துவர், சமூகச் செவிலியர் குழு மற்றும் ஒருங்கிணைப்பு அதிகாரிகள் நியமிக்கப்படுவர். இவர்கள் அப்பகுதி மக்களின் குடும்ப மருத்துவத் தேவைகள் மற்றும் வாழ்க்கை முறை ஆலோசனைச் சேவைகளின் நேரடிப் பொறுப்பை ஏற்பார்கள்.
தேசிய சுகாதாரச் செலவைக் குறைத்து ஆயுட்காலத்தை அதிகரித்தல்
உலக சுகாதார அமைப்பின் (WHO) தரவுகளின்படி, இலங்கையில் நிகழும் மொத்த மரணங்களில் 80 சதவீதத்திற்கும் அதிகமானவற்றுக்கு நீரிழிவு, உயர் இரத்த அழுத்தம் மற்றும் இருதய நோய்கள் போன்ற தொற்றா நோய்களே காரணமாகின்றன. இந்நிலையைக் கட்டுப்படுத்துவதற்கு நோய் தீவிரமடைந்த பிறகு இரண்டாம் நிலை அல்லது மூன்றாம் நிலை மருத்துவமனைகளுக்குச் செல்வதை விட, ஆரம்ப சுகாதார சேவை மட்டத்திலேயே ஆபத்துக் காரணிகளை அடையாள காண்பது மிகவும் பயனுள்ள முறையாகும் என நிபுணர்கள் சுட்டிக்காட்டுகின்றனர்.
ஆரம்ப சுகாதாரப் பராமரிப்பை வலுப்படுத்துவதன் மூலம் மருத்துவமனைகளில் உள்ள நெரிசல் குறைவதுடன், சுகாதாரத் துறைக்குச் செலவிடப்படும் பாரிய மருந்துச் செலவுகளையும் கணிசமாகக் கட்டுப்படுத்த முடியும்.
கிராம உத்தியோகத்தர் பிரிவு மட்டத்தில் செயல்படும் 'ஆரோக்யா' மையங்களைச் சரியான தரத்துடனும் தொடர்ச்சியான கண்காணிப்புடனும் பராமரிப்பதன் மூலம் சமூகத்தின் சுகாதார அறிவை உயர்த்த முடியும். அத்துடன், இலங்கையர்களின் சராசரி ஆயுட்காலத்தை மட்டுமல்லாமல், "ஆரோக்கியமான ஆயுட்காலத்தையும்" (Healthy Life Expectancy) நீட்டிப்பதற்கு இது ஒரு வலுவான அடித்தளத்தை உருவாக்கும் என்று சுகாதாரத் துறை பகுப்பாய்வாளர்கள் சுட்டிக்காட்டுகின்றனர்.