பாதுகாப்புத் தொடர்பில் தீவிர அபாயகரமான சூழ்நிலை நிலவுவதாக இலங்கை கணினி அவசரகால பதிலளிப்புக் குழு (SLCERT) நடத்திய மதிப்பீட்டில் தெரியவந்துள்ளது.
2025 ஆம் ஆண்டிற்குரிய செயல்திறன் அறிக்கையின் கணக்காய்வு அறிக்கையிலேயே இத்தகவல் குறிப்பிடப்பட்டுள்ளது.
2025 ஆம் ஆண்டில் இலங்கை கணினி அவசரகால பதிலளிப்புக் குழுவினால் நாடாளுமன்றத்தின் தகவல் மற்றும் சைபர் பாதுகாப்புத் தொடர்பாக மதிப்பீடொன்று மேற்கொள்ளப்பட்டுள்ளது. அதில் 56 காரணிகள் பரிசோதிக்கப்பட்டதுடன், அவற்றில் 46 காரணிகளின் அபாயத்தன்மை உயர் மட்டத்தில் உள்ளமை கண்டறியப்பட்டுள்ளது.
சைபர் தொழில்நுட்பத்தைத் தவறாகப் பயன்படுத்தி டிஜிட்டல் அமைப்புகளுக்குள் சட்டவிரோதமாக நுழைந்து உணர்திறன் மிக்கத் தகவல்களைத் திருடுதல், நிறுவனத்தின் செயல்பாடுகளுக்குத் தடைகளை ஏற்படுத்துதல், வலைத்தளங்களின் உள்ளடக்கங்களைத் திரிபுபடுத்தி நிறுவனங்களின் நற்பெயருக்குக் களங்கம் விளைவித்தல் போன்ற தீங்கிழைக்கும் செயல்கள் இடம்பெறுவதற்கான சாத்தியக்கூறுகள் உள்ளமை இங்கு வெளிப்படுத்தப்பட்டுள்ளது. இது தொடர்பில் தீவிர கவனம் செலுத்தப்பட வேண்டும் என கணக்காய்வின் போது சுட்டிக்காட்டப்பட்டுள்ளது.