இலஞ்ச ஊழல் ஆணைக்குழுவில் நாளை ஆஜராகிறார் ரவி!

மூன்று ஊழியர்களை அரசியல் நடவடிக்கைகளில் ஈடுபடுத்தி அரசாங்கத்திற்கு நிதி இழப்பை ஏற்படுத்தியதாகச் சுமத்தப்பட்டுள்ள குற்றச்சாட்டு தொடர்பில் வாக்குமூலம் வழங்குவதற்காக, நாடாளுமன்ற உறுப்பினர் ரவி கருணாநாயக்க நாளை (31) லஞ்ச அல்லது ஊழல் பற்றிய குற்றச்சாட்டுகளை விசாரணை செய்யும் ஆணைக்குழுவில் ஆஜராகவுள்ளார்.

லஞ்ச ஊழல் ஆணைக்குழுவினால் விடுக்கப்பட்ட மூன்று அறிவித்தல்களுக்கு அமைவாக அவர் ஆஜராகவில்லை எனச் செய்திகள் வெளியானதைத் தொடர்ந்து, ஆணைக்குழுவின் விசாரணை அதிகாரிகள் குழுவொன்று நேற்று (29) ரவி கருணாநாயக்கவின் வீட்டிற்கும் சென்றிருந்தது. இருப்பினும், தனது சேவைபெறுநர் எந்த வகையிலும் ஆணைக்குழுவில் ஆஜராவதைத் தவிர்க்கவில்லை என்றும், தனது மகளின் திருமண விவகாரங்கள் காரணமாகவே சட்டத்தரணிகள் ஊடாக வேறு திகதியைக் கோரியிருந்ததாகவும் ரவி கருணாநாயக்கவின் அலுவலகப் பேச்சாளர் ஒருவர் தெரிவித்தார்.

குற்றச்சாட்டுக்குள்ளான ஊழியர் நியமனம் மற்றும் திட்டப் பின்னணி

இச்சம்பவம் தொடர்பான உண்மைப் பின்னணியை விளக்கிய ரவி கருணாநாயக்கவின் அலுவலக வட்டாரங்கள், குறித்த மூன்று ஊழியர்களும் தேசிய லொத்தர் சபை, நிதியமைச்சு மற்றும் ஜனாதிபதி செயலகம் ஆகியன இணைந்து முன்னெடுத்த சமூக நலன்புரித் (CSR) திட்டங்களை ஒருங்கிணைப்பதற்காகவே பணியமர்த்தப்பட்டதாகச் சுட்டிக்காட்டின.

குறிப்பாக, ஜனாதிபதி செயலகத்தின் கீழ் இயங்கிய சிறுநீரக நிதியத்தை வலுப்படுத்துவதற்காகத் தேசிய லொத்தர் சபை அறிமுகப்படுத்திய ‘நீரோகா’ லொத்தர் திட்டம் மற்றும் ‘சிரச News1st கிராமியம்’ (Gammaddaha) கருத்தாக்கத்தின் ஊடாக வடமத்திய மற்றும் கிழக்கு மாகாண மக்களுக்குத் சுத்தமான குடிநீரை வழங்கும் பாரிய சமூக சேவைத் திட்டங்களை மெய்ப்பிக்கும் பொறுப்பே இந்த அதிகாரிகளுக்கு வழங்கப்பட்டிருந்தது.

நிர்வாக அறிக்கைகள் மற்றும் சட்ட நடவடிக்கை

குறித்த திட்டங்கள் வெற்றிகரமாக முன்னெடுக்கப்பட்டமையால் தேசிய மட்டத்திலான மதிப்பீடுகளும் விருதுகளும் கிடைத்ததாகச் சுட்டிக்காட்டிய அத்தரப்பு, இந்த ஒருங்கிணைப்பாளர்களின் தினசரி வருகைப்பதிவு அறிக்கைகள் முறைப்படி தேசிய லொத்தர் சபையிடம் சமர்ப்பிக்கப்பட்டுள்ளதாகவும் தெரிவித்தது. சட்டப்பூர்வமான நிர்வாகக் கட்டமைப்பிற்குள் இடம்பெற்ற இவ்வாறானதொரு சமூக சேவையை அரசியல் இலாபத்திற்காகத் திரிபுபடுத்திப் பரப்புரை செய்வது வருந்தத்தக்கது என்றும் குறிப்பிடப்பட்டது.

இதற்கமைய, உரிய தகவல்கள் மற்றும் சட்ட ஆவணங்களுடன் நாடாளுமன்ற உறுப்பினர் நாளை லஞ்ச அல்லது ஊழல் பற்றிய குற்றச்சாட்டுகளை விசாரணை செய்யும் ஆணைக்குழுவில் ஆஜராகி உத்தியோகபூர்வ வாக்குமூலத்தை வழங்கத் தயாராக உள்ளதாக அவரது சட்டத்தரணிகள் உறுதிப்படுத்தியுள்ளனர்.