இலங்கை கடற்பரப்பிற்கு அருகே ஈரானிய கப்பல் நெருக்கடி; கொழும்பிலும் அரசியல் அரங்கிலும் பலத்த அவதானம்!

• பிரத்யேக பொருளாதார மண்டலத்தில் (EEZ) நங்கூரமிட்டுள்ள கப்பல்களுக்கு எவ்வித வசதிகளும் வழங்‍கப்படாது என வெளி விவகார அமைச்சு அறிவிப்பு.

• பிராந்திய பாதுகாப்பு மற்றும் இராஜதந்திர தாக்கம் குறித்து ரவி கருணாநாயக்க எச்சரிக்கை.

இலங்கைக்குச் சொந்தமான பிரத்யேக பொருளாதார மண்டலத்தை (EEZ) ஒட்டிய கடல் பகுதியில் ஈரானிய எரிபொருள் கடத்தல் கப்பல்கள் மற்றும் தடைகளைத் தவிர்க்கும் கப்பல்கள் (Shadow Fleet) தங்கியிருப்பது குறித்து அரசாங்கத்தின் முழுமையான கவனம் திரும்பியுள்ளதாக வெளி விவகார அமைச்சு தெரிவித்துள்ளது. சர்வதேசக் கடல்சார் கண்காணிப்புத் தரவுகளின் அடிப்படையில் இது தொடர்பாக உள்நாட்டிலும் சர்வதேச அளவிலும் கடுமையான விவாதங்கள் உருவாகியுள்ளன.

வெளி விவகார அமைச்சின் நிலைப்பாடு

இது குறித்துக் கருத்துத் தெரிவித்த வெளி விவகார அமைச்சின் ஊடகப் பணிப்பாளர் நாயகம் துஷார ரொட்ரிகோ, குறித்த கப்பல்கள் இலங்கையின் உத்தியோகபூர்வ பிராந்தியக் கடல் எல்லைக்கு (Territorial Waters) வெளியே அமைந்துள்ளதால், அவை தொடர்பான நேரடிச் சட்டப் பொறுப்பு இலங்கைக்கு இல்லை எனக் குறிப்பிட்டார்.

மேலும், இலங்கை அரசாங்கமோ அல்லது துறைமுக அதிகாரசபையோ இந்த கப்பல்களுக்கு எவ்விதமான விநியோகங்களையோ, சேவைகளையோ அல்லது வசதிகளையோ வழங்கவில்லை என்றும் அவர் அழுத்தமாகக் கூறினார்.

TankerTrackers அறிக்கையின் வெளிப்பாடு

சர்வதேசக் கடல்சார் தகவல்களைக் கண்காணிக்கும் 'TankerTrackers' இணையதளம் வெளியிட்டுள்ள அறிக்கையின்படி, அமெரிக்கக் கடற்படைத் தடைகள் மற்றும் இடையூறுகள் காரணமாக ஈரானிய துறைமுகங்களுக்குச் செல்ல முடியாத ஈரானிய கொடியுடன் கூடிய 13 கப்பல்கள் உட்பட சுமார் 20 கப்பல்கள் இலங்கையின் பிரத்யேக பொருளாதார மண்டலத்திற்கு அருகே நங்கூரமிட்டுள்ளன.

பாதுகாப்புத் தேடி இவ்வாறு தங்கியிருக்கும் பெரும்பாலான கப்பல்கள் தற்போது எரிபொருள் இன்றி காலியாக உள்ளதாக அந்த அறிக்கை சுட்டிக்காட்டுகிறது. இருப்பினும், சர்வதேசக் கடல்சார் சட்டத்தின்படி இக்கப்பல்கள் 12 நாட்டிக்கல் மைல் எல்லைக்கு அப்பால் அமைந்திருந்தாலும், அப்பகுதியில் நிலவும் பாதுகாப்பு அபாயங்கள் குறித்துக் கடல்சார் வல்லுநர்கள் கருத்துத் தெரிவித்து வருகின்றனர்.

ரவி கருணாநாயக்கவின் கருத்து

இந்த விவகாரம் குறித்துக் கருத்துத் தெரிவித்த முன்னாள் நிதியமைச்சரும் வெளிவிவகார அமைச்சருமான ரவி கருணாநாயக்க, சர்வதேசப் புவிசார் அரசியல் நெருக்கடிகளுக்கு மத்தியில் இலங்கை மிகவும் புத்திசாலித்தனமான இராஜதந்திரக் கொள்கையைப் பின்பற்ற வேண்டும் எனச் சுட்டிக்காட்டியுள்ளார்.

பிராந்தியக் கடல் பகுதியின் பாதுகாப்பையும் இறையாண்மையையும் பாதுகாக்கும் அதே வேளையில், சர்வதேச சமூகத்துடனான உறவுகளுக்குப் பாதிப்பு ஏற்படாத வகையில் சமநிலையான முடிவுகளை எடுப்பது அவசியமாகும் என அவர் வலியுறுத்துகிறார். குறிப்பாகப் பொருளாதாரம் ஸ்திரமடைந்து வரும் இக்காலக்கட்டத்தில், சர்வதேசக் கடல்சார் சட்டங்கள் மற்றும் பாதுகாப்புத் தரங்களை முறைப்படி அமுல்படுத்தி, இலங்கை எந்தவொரு தரப்பினதும் புவிசார் அரசியல் மோதல்களிலும் சிக்காமல் செயற்படுவதன் முக்கியத்துவத்தையும் முன்னாள் அமைச்சர் சுட்டிக்காட்டினார்.