"டென்னிஸ் மைதானம் போன்ற அலுவலகங்களை தடை செய்ய வேண்டும்!"

• அதிகாரத்தைக் காட்டும் இருண்ட அலுவலக கலாசாரத்திற்குப் பதிலாக நவீன "Workstation" முறை அறிமுகப்படுத்தப்படும்.

• வெவ்வேறாகச் சிதறிக் காணப்படும் அரச நிறுவனங்களை ஒரே கூரையின் கீழ் கொண்டுவரக் கொள்கை ரீதியிலான திட்டம்.

• போக்குவரத்து, நெடுஞ்சாலைகள், துறைமுகங்கள் மற்றும் சிவில் விமான சேவைகள் அமைச்சர் பிமல் ரத்நாயக்க சிறப்பு உரை.

அரசாங்க ஊழியர்கள் பாரம்பரிய அதிகாரத்துவ மனப்பான்மையிலிருந்து விரைவாக வெளிவர வேண்டும் என்றும், அலுவலக இடம் என்பது ஒருவரின் பதவியின் அதிகாரத்தையோ அல்லது சொந்தப் பெருமையையோ (Ego) காட்சிப்படுத்தும் இடமாக இருக்கக் கூடாது என்றும் போக்குவரத்து, நெடுஞ்சாலைகள், துறைமுகங்கள் மற்றும் சிவில் விமான சேவைகள் அமைச்சர் பிமல் ரத்நாயக்க வலியுறுத்தியுள்ளார்.

பழைய சுவர்களால் சூழப்பட்ட சிறைச்சாலை போன்ற இருண்ட அலுவலகக் கலாசாரத்திலிருந்து அரச துறை விரைவாக வெளியேற வேண்டும் சுட்டிக்காட்டிய அமைச்சர், எதிர்காலத்தில் அரச நிறுவனங்கள் குழு உணர்வுடன் திறம்படச் செயல்படக்கூடிய திறந்த அலுவலக (Workstation) மாதிரியாக மாற்றப்பட வேண்டியதன் அவசியத்தையும் சுட்டிக்காட்டினார்.

"டென்னிஸ் மைதானம் போன்ற அறைகளை உருவாக்குவது தடை செய்யப்பட வேண்டும்"

அரச சேவையில் உள்ள வீண் செலவுகள் மற்றும் வளங்கள் வீணடிக்கப்படுவது குறித்து கருத்துத் தெரிவித்த அமைச்சர், தாம் தற்போது பயன்படுத்தி வரும் அமைச்சு அலுவலகம் கூட தேவையின்றி மிகப்பெரிய இடத்தைக் கொண்டுள்ளதாகக் குறிப்பிட்டார்.

"பழைய சுவர்களால் சூழப்பட்ட, சிறைச்சாலை போன்ற அந்த இருண்ட அலுவலக முறையிலிருந்து நாம் வெளியே வர வேண்டும். தற்போது எமது நெடுஞ்சாலைகள் அமைச்சில் நான் இருக்கும் அலுவலகத்தை எடுத்துக்கொண்டால், அது ஒரு டென்னிஸ் மைதானத்தைப் போலப் பெரிதாக உள்ளது. இதுபோன்ற அறைகளை உருவாக்குவதைத் தடை செய்ய வேண்டும். அலுவலக இடம் (Office Space) என்பது ஒருவரது ஈகோவையோ அல்லது அவரது பதவியையோ காட்டக்கூடிய ஒன்றல்ல. உண்மையில் நமக்குத் தகுதிகள் இருந்தால், ஒரு சிறிய அலுவலகமே போதுமானது. அலுவலகத்தின் மூலம் எமது ஆளுமையை (Personality) உருவாக்கிக்கொள்ள வேண்டிய தேவை எவருக்கும் இல்லை..."

அலுவலக அறைகளை அலங்கரிப்பதற்காக மட்டுமே அதிக செலவுமிக்க மரபாடங்களை (Furniture) பயன்படுத்தும் பாரம்பரியத்தையும் அவர் கடுமையாக நிராகரித்தார்.

"...எங்களது அறையில் சுமார் ஐந்து நாற்காலிகள் உள்ளன. அதில் ஒரு நாற்காலியின் பணத்தைக் கொண்டு ஒரு சாதாரண மனிதனால் ஒரு வீட்டையே கட்ட முடியும். எனவே நமக்கு அப்படி ஒரு மனநோய் இல்லை. நாற்காலிகள் மூலமாகவோ, அலுவலக இடத்தின் மூலமாகவோ அந்தப் போலிப் பெருமையை அடைய வேண்டிய தேவை நமக்கில்லை. நிச்சயமாக மீண்டும் Workstation மாதிரிக்குச் சென்று, இலகுவாக ஒரு குழுவாக வேலை செய்யக்கூடிய வகையில் இதை மாற்றியமைக்க வேண்டும்."

சிதறியுள்ள நிறுவனங்கள் ஒரே கூரையின் கீழ்

ஒரே அமைச்சின்கீழ் உள்ள நிறுவனங்கள், திணைக்களங்கள் மற்றும் பிரிவுகள் பல்வேறு இடங்களில் சிதறி இருப்பதால் நிர்வாக நடவடிக்கைகளும் பொதுமக்களுக்கான சேவைகளும் கடுமையாகப் பாதிக்கப்பட்டுள்ளமை இதன்போது வெளிப்பட்டது.

"அரச நிறுவனங்கள் அனைத்தும் ஒரே இடத்திற்கு வர வேண்டும் என்ற முடிவை இப்போது நாங்கள் எடுத்துள்ளோம். எங்களது அமைச்சை எடுத்துக்கொண்டால், அது ரம்ய, சுரம்ய, சுப எனப் பல இடங்களில் சிதறிக் காணப்படுகிறது. அவை உண்மையில் எங்கெங்கு உள்ளன என்று கூட எனக்கு இன்னும் சரியாகத் தெரியாது."

இதற்கமைய, அரச இயந்திரத்தின் செலவுகளைக் கட்டுப்படுத்தி, நிர்வாகத் திறனை அதிகரிப்பதற்காகச் சிதறியுள்ள தொடர்புடைய அனைத்து நிறுவனங்களையும் ஒரே வளாகத்திற்குள் ஒருங்கிணைப்பதற்கான கொள்கை நடவடிக்கைகள் எதிர்காலத்தில் எடுக்கப்படும் என்று அமைச்சர் மேலும் தெரிவித்தார்.

நவீன அரச சேவை மாதிரியின் அவசியம்

உலகின் பல வளர்ந்த மற்றும் வளர்ந்து வரும் நாடுகள் ஏற்கனவே பாரம்பரிய மூடிய அறை முறையிலிருந்து விடுபட்டு, திறந்த அலுவலக இடங்களை (Open Plan & Collaborative Workstations) நோக்கி நகர்ந்துள்ளன. இதன் மூலம் அதிகாரிகளுக்கு இடையிலான தொடர்பாடல் விரைவாவதுடன், அலுவலகப் பராமரிப்புச் செலவுகள், மின் நுகர்வு மற்றும் தேவையற்ற கட்டிட வாடகைச் செலவுகளைக் கணிசமாகக் குறைக்க முடியும்.

இலங்கையின் தற்போதைய பொருளாதார மற்றும் நிர்வாக சவால்களுக்கு மத்தியில், அரச துறையின் வளங்களை அதிகபட்ச உற்பத்தித்திறனுடன் பயன்படுத்துவதற்கும், படிநிலைத் தடைகளைக் குறைத்து மக்கள் மைய சேவையை வழங்குவதற்கும் இத்தகைய இட மறுசீரமைப்புகள் அடிப்படைப் படியாக அமையும் என நிர்வாகத் துறை ஆய்வாளர்கள் சுட்டிக்காட்டுகின்றனர்.