நீதிபதிகளின் ஓய்வுபெறும் வயதை அதிகரிக்கும் யோசனைக்கு மத்தியில் நீதிமன்றச் சுயாதீனம் குறித்து அரசியலமைப்புச் நெருக்கடி!

• உயர்நீதிமன்ற மற்றும் மேன்முறையீட்டு நீதிமன்ற நீதிபதிகளின் ஓய்வுபெறும் வயதை 2 வருடங்களால் அதிகரிப்பதற்கு அமைச்சரவை அங்கீகாரம்

• இலங்கைச் சட்டத்தரணிகள் சங்கம் மற்றும் தொழிற்சங்கங்களிடமிருந்து கடும் எதிர்ப்பு: யோசனையை உயர்நீதிமன்றத்தில் சவாலுக்கு உட்படுத்த நடவடிக்கை

உயர்நீதிமன்றம் மற்றும் மேன்முறையீட்டு நீதிமன்றம் உள்ளிட்ட நீதித்துறைக்கட்டமைப்பின் நீதிபதிகளின் ஓய்வுபெறும் வயது எல்லையை அதிகரிப்பதற்கு அரசாங்கம் எடுத்துள்ள நடவடிக்கையுடன், நாட்டின் நீதிமன்றச் சுயாதீனம், நிறுவனச்சமநிலை மற்றும் ஜனநாயகக் கட்டமைப்பு குறித்த பாரிய அரசியலமைப்பு ரீதியான விவாதமொன்று உருவாகியுள்ளது.

உயர்நீதிமன்றம், மேன்முறையீட்டு நீதிமன்றம் உள்ளிட்ட ஏனைய நீதிமன்றங்களில் பணியாற்றும் நீதிபதிகளின் ஓய்வுபெறும் வயது எல்லையை 02 வருடங்களால் அதிகரிப்பதற்காகச் சமர்ப்பிக்கப்பட்ட அமைச்சரவைப் பத்திரத்திற்கு அங்கீகாரம் கிடைத்துள்ளதுடன், குறித்த திருத்தங்களை வரைவு செய்வதற்காகச் சட்ட வரைஞரிடம் அனுப்புவதற்கும், அதனைத் தொடர்ந்து சட்டமா அதிபரின் அங்கீகாரத்திற்காக அனுப்புவதற்கும் தீர்மானிக்கப்பட்டுள்ளது.

அரசியலமைப்புத் திருத்தமும் முன்மொழியப்பட்டுள்ள வயது எல்லைகளும்

இலங்கை அரசியலமைப்பின் 107 (5) உறுப்புரைக்கு அமைய உயர்நீதிமன்ற நீதிபதி ஒருவரின் தற்போதைய ஓய்வுபெறும் வயது எல்லை 65 ஆகும். முன்மொழியப்பட்டுள்ள அரசியலமைப்புத் திருத்தத்தின் மூலம் அவ்வெல்லையை 67 ஆக அதிகரிப்பதற்கு யோசிக்கப்பட்டுள்ளது. அதேபோன்று தற்போது 63 ஆக உள்ள மேன்முறையீட்டு நீதிமன்ற நீதிபதிகளின் ஓய்வுபெறும் வயதை 65 ஆக அதிகரிப்பதற்கும் குறித்த திருத்தம் மூலம் எதிர்பார்க்கப்படுகின்றது.

இதற்கு மேலதிகமாக மேல்நீதிமன்றம், மாவட்ட நீதிமன்றம் மற்றும் நீதிவான் நீதிமன்றங்களில் பணியாற்றும் நீதிபதிகளின் ஓய்வுபெறும் வயது எல்லைகளையும் திருத்துவதற்கு நீதி அமைச்சு நடவடிக்கைகள் எடுத்து வருகின்றது. தற்போதைய சட்டத்திற்கு அமைய மேல்நீதிமன்ற நீதிபதி ஒருவர் 61 வயதிலும், நீதிவான் மற்றும் மாவட்ட நீதிபதிகள் 60 வயதிலும் ஓய்வுபெற வேண்டும்.

அரசாங்கத்தின் வாதமும் சட்டத்துறையின் எதிர்ப்பும்

நீதிமன்றக் கட்டமைப்பிற்குள் காணப்படும் அதிகமான வழக்குக் நடவடிக்கைகள் மற்றும் தாமதங்களுக்கு மத்தியில், அனுபவமிக்க நீதிபதிகளின் சேவையைத் தொடர்ந்து பெற்றுக்கொள்வதன் மூலம் நீதித்துறைச் செயல்முறையின் திறனை அதிகரிக்க முடியும் என்பது அரசாங்கத்தின் கருத்தாக உள்ளது.

எவ்வாறாயினும், இலங்கைச் சட்டத்தரணிகள் சங்கம் (BASL), கொழும்பு மேல்நீதிமன்றச் சட்டத்தரணிகள் சங்கம் உள்ளிட்ட சட்டத்துறையின் முன்னணித் தரப்புகள் பலவும் இந்த யோசனைக்குக் கடும் எதிர்ப்பை வெளியிட்டுள்ளன. நீதிபதிகளின் பதவிக் காலம் மற்றும் ஓய்வுபெறும் வயதை இவ்வாறான அரசியலமைப்புத் திருத்தங்கள் மூலம் மாற்றுவதனால் நீதிமன்றத்திற்கும் அரசியல் அதிகாரத்துவத்திற்கும் இடையில் காணப்படும் சமநிலைக்குப் பாதிப்பு ஏற்படுவதுடன், அது நீதிமன்றத்தின் சுயாதீனம் குறித்துப் பொதுமக்கள் வைத்துள்ள நம்பிக்கையைச் சிதைப்பதற்கும் காரணமாக அமையும் எனச் சட்ட வல்லுநர்கள் சுட்டிக்காட்டுகின்றனர். அத்துடன், மேல்நீதிமன்றங்களில் காணப்படும் வெற்றிடங்களை நிரப்புவதைத் தாமதப்படுத்தி, இவ்வாறானதொரு நடவடிக்கையைத் தற்காலிகமாக (ad-hoc) நடைமுறைப்படுத்த முயல்வது குறித்தும் சட்டத்தரணிகள் சங்கங்கள் கேள்வி எழுப்பியுள்ளன.

உயர்நீதிமன்றச் சவாலும் எதிர்கால அரசியலமைப்பு வழியும்

குறித்த சட்டமூலம் வர்த்தமானியில் வெளியிடப்பட்டுப் பாராளுமன்றத்தில் சமர்ப்பிக்கப்பட்ட பின்னர், அதன் அரசியலமைப்புத் தன்மையைச் சவாலுக்கு உட்படுத்தி உயர்நீதிமன்றத்தில் மனுத்தாக்கல் செய்வதற்கு இலங்கைச் சட்டத்தரணிகள் சங்கத்திற்கும் சாதாரண குடிமக்களுக்கும் 14 நாட்கள் அவகாசம் கிடைக்கும்.

அங்கு இத்திருத்தத்தை நிறைவேற்றுவதற்குப் பாராளுமன்றத்தில் மூன்றில் இரண்டு விசேட பெரும்பான்மை மாத்திரம் போதுமானதா, அல்லது அரசியலமைப்பின் 3 ஆம் உறுப்புரையின் கீழ் உறுதிப்படுத்தப்பட்டுள்ள மக்களின் பரமாதிப்பத்தியத்திற்கு இதனால் பாதிப்பு ஏற்படுகின்றதா என்பதை உயர்நீதிமன்றம் தீர்மானிக்கும். ஒருவேளை மக்களின் பரமாதிப்பத்தியத்திற்குப் பாதிப்பு ஏற்படுவதாக உயர்நீதிமன்றம் தீர்ப்பளித்தால், இத்திருத்தத்தை நிறைவேற்றுவதற்குப் பாராளுமன்றப் பெரும்பான்மைக்கு மேலதிகமாகச் சர்வஜன வாக்கெடுப்பிற்கும் (Referendum) செல்ல வேண்டிய நிலை அரசாங்கத்திற்கு ஏற்படும்.

எவ்வாறாயினும், பாராளுமன்றத்தில் சட்டமூலம் நிறைவேற்றப்பட்டுச் சபாநாயகரின் சான்றளிப்புப் பெறப்பட்ட பின்னர், இலங்கையின் அரசியலமைப்புக் கட்டமைப்பிற்கு அமைய அச்சட்டத்தை மீண்டும் நீதித்துறை மறுஆய்வுக்கு (Judicial Review) உட்படுத்துவதற்கான சாத்தியக்கூறுகள் இல்லை. எனவே இந்த யோசனையானது வெறும் ஓய்வுபெறும் வயது குறித்த தீர்மானத்திற்கு அப்பால் சென்று, அரசியலமைப்பு அதிகாரங்கள், நீதிமன்றச் சுயாதீனம் மற்றும் அரசுக்கும் நீதிமன்றத்திற்கும் இடையிலான தொடர்பு குறித்த தீர்க்கமானதொரு விவாதமாக மாறியுள்ளது.