-
முன்னாள் அரசியல்வாதிகள் மற்றும் பிரமுகர்களிடம் உள்ள சட்டவிரோத வாகனங்களைக் கைப்பற்ற TID தயார்
-
சுங்கம் மற்றும் மோட்டார் போக்குவரத்துத் திணைக்களத்தின் ஊழல் அதிகாரிகளின் ஒத்துழைப்புடன் முன்னெடுக்கப்பட்ட பிரம்மாண்ட மோசடி
கோடிக்கணக்கான ரூபாய் சுங்க வரிகளை ஏய்த்துச் சட்டவிரோதமான முறையில் நாட்டிற்குள் கொண்டுவரப்பட்டு, போலியாகப் பதிவு செய்யப்பட்டுச் செலுத்தப்பட்டு வரும் சுமார் 500 ஆடம்பர வாகனங்களைக் கண்டறிவதற்காகத் பயங்கரவாத எதிர்ப்பு மற்றும் புலனாய்வுப் பிரிவு (TID) விசேட புலனாய்வு விசாரணையையொன்றை ஆரம்பித்துள்ளது.
குறித்த வாகனங்களில் பெரும்பாலானவை முன்னாள் அரசியல்வாதிகள், அவர்களுக்கு நெருக்கமான தொழிலதிபர்கள் மற்றும் பிரமுகர்களால் தற்போது பயன்படுத்தப்பட்டு வருவதாகத் தகவல்கள் வெளியாகியுள்ளன.
மோசடி இடம்பெற்ற விதம் மற்றும் அரச அதிகாரிகளின் தொடர்பு
விசாரணைகளின்படி, இந்த ஆடம்பர வாகனங்கள் உதிரிப்பாகங்களாக நாட்டிற்கு இறக்குமதி செய்யப்பட்டு மீண்டும் பொருத்தப்பட்டுள்ளதுடன் (assemble), அதற்குச் சுங்கத் திணைக்களத்தின் சில அதிகாரிகளின் ஒத்துழைப்பும் கிடைத்துள்ளது.
அவ்வாறு பொருத்தப்பட்ட வாகனங்களைச் சட்டப்பூர்வமான வாகனங்களாக வீதிக்குக் கொண்டுவருவதற்காக, மோட்டார் போக்குவரத்துத் திணைக்களத்தின் (DMT) அதிகாரிகள் போலியான ஆவணங்களைத் தயாரித்துப் போலிப் பதிவுகளை மேற்கொண்டுள்ளமை ஆரம்பக்கட்ட விசாரணைகளில் உறுதி செய்யப்பட்டுள்ளது.
கடந்த அரசாங்கங்களின் ஆட்சிக் காலத்தில் இந்த மோசடி நெட்வொர்க் முறையில் இடம்பெற்றுள்ளதாகக் கூறப்படும் அதேவேளை, ஏற்கனவே இவ்வாறு செலுத்தப்பட்டு வரும் பல வாகனங்களைப் பயங்கரவாத எதிர்ப்பு மற்றும் புலனாய்வுப் பிரிவு அடையாளம் கண்டுள்ளதுடன், அவற்றை எதிர்வரும் நாட்களில் பொறுப்பேற்கவும் ஆயத்தமாகி வருகின்றது.
முந்தைய விசாரணைகளும் கைதுகளும்
சட்டவிரோத வாகனப் பதிவுகள் தொடர்பாக மோட்டார் போக்குவரத்துத் திணைக்களத்தின் முன்னாள் ஆணையாளர்கள் இருவர் உள்ளிட்ட அதிகாரிகள் குழுவொன்று அண்மையில் இலஞ்ச அல்லது ஊழல் பற்றிய சாட்டப்புகளை புலனாய்வு செய்யும் ஆணைக்குழுவினால் கைது செய்யப்பட்டிருந்தனர்.
இதற்கு முன்னர் 2023 ஆம் ஆண்டில் பாணந்துறை மத்திய ஊழல் தடுப்புப் பிரிவினரால் மேற்கொள்ளப்பட்ட தொடர் சோதனைகளின் போது அரசியல்வாதிகளிடம் இருந்த இவ்வாறான சுமார் 100 சட்டவிரோத வாகனங்கள் கைப்பற்றப்பட்டதுடன், அங்கு மேலும் சுமார் 400 வாகனங்களின் போலி ஆவணங்களும் கண்டெடுக்கப்பட்டன.
பின்னர் அது தொடர்பான மேலதிக விசாரணைகள் குற்றப் புலனாய்வுத் திணைக்களத்திடம் (CID) ஒப்படைக்கப்பட்டமை குறிப்பிடத்தக்கது.