ரகித்த ராஜபக்ஷ, சமகி ஜன பலவேகயவின் ஹொரண தொகுதியின் முன்னாள் அமைப்பாளராகச் செயற்பட்ட சரித் அபேசிங்க மற்றும் சிவில் விமானப் போக்குவரத்து அதிகாரசபையின் முன்னாள் பணிப்பாளரான அருண ஹன்னதிகே ஆகிய மூவரையும் பிணையில் விடுவிக்குமாறு கொழும்பு பிரதான நீதிவான் நீதிமன்றம் இன்று (28) உத்தரவிட்டுள்ளது.
சந்தேகநபர்கள் இன்று முற்பகல் கொழும்பு பிரதான நீதிவான் நீதிமன்றத்தில் முன்னிலைப்படுத்தப்பட்டதைத் தொடர்ந்து, கொழும்பு பிரதான நீதிவான் அஸங்க எஸ். போதரம வழங்கிய தீர்ப்பிற்கமையவே இவ்வாணை பிறப்பிக்கப்பட்டுள்ளது.
ரகித்த ராஜபக்ஷ மற்றும் சரித் அபேசிங்க ஆகியோர் இலஞ்ச அல்லது ஊழல் பற்றிய சாத்தப்புகளை புலனாய்வு செய்யும் ஆணைக்குழுவின் அதிகாரிகளினால் கடந்த ஜூன் மாதம் 25 ஆம் திகதி கைது செய்யப்பட்டிருந்தனர்.
ஒழுங்கமைக்கப்பட்ட குற்றக் குழு உறுப்பினரான 'ஹரக் கடா' என்பவரிடமிருந்து இலஞ்சம் பெற்றமை தொடர்பிலேயே இவர்கள் கைது செய்யப்பட்டிருந்தனர்.
குற்றப் புலனாய்வுத் திணைக்களத்தின் தடுப்புக் காவலில் வைக்கப்பட்டிருந்த ஒழுங்கமைக்கப்பட்ட குற்றக் குழு உறுப்பினரான நடுன் சிந்தக விக்ரமரத்ன அல்லது 'ஹரக் கடா' என்பவர் பொலிஸாரினால் படுகொலை செய்யப்படுவதைத் தடுப்பதற்காகவும், அவரது தடுப்புக் காவல் ஆணையை நீக்கி காலி பூஸ்ஸ அதிஉயர் பாதுகாப்புச் சிறைச்சாலையைத் தவிர்த்து வேறு சிறைச்சாலையொன்றிற்கு அவரை மாற்றுவதற்காகவும், புலனாய்வு நடவடிக்கைகளிலிருந்து அவரை விடுவிப்பதற்காகவும் இந்த இலஞ்சம் பெறப்பட்டுள்ளதாக இங்கு வெளிச்சத்திற்கு வந்தது.
இச்செயற்பாடுகளுக்காக 2023 ஆம் ஆண்டில் டுபாயில் வைத்து, ஹரக் கடாவின் மனைவியான மதுஷிகா மதுவந்தியிடம் 50 கோடி ரூபாயை இலஞ்சமாகக் கோரி, பின்னர் அத்தொகையை 20 கோடி ரூபாவாகக் குறைத்து, அதில் முன்பணமாக 12 கோடி ரூபாயை இலஞ்சமாகக் கோரிப் பெற்றுக்கொண்டதாக ரகித்த ராஜபக்ஷ மற்றும் சரித் அபேசிங்க ஆகியோர் மீது குற்றச்சாட்டுகள் சுமத்தப்பட்டுள்ளன.
அதற்கமைய, இவர்கள் இருவர் மற்றும் சிவில் விமானப் போக்குவரத்து அதிகாரசபை, இலங்கை விமானநிலையங்கள் மற்றும் விமானச் சேவைகள் நிறுவனத்தின் முன்னாள் பணிப்பாளராகச் செயற்பட்ட வருஷ ஹன்னதிகே அருண ஸ்ரீ சதுரங்க ஆகியோரும் இலஞ்சக் குற்றச்சாட்டுகளின் கீழ் கைது செய்யப்பட்டிருந்தமை குறிப்பிடத்தக்கது.