வரியை விதிப்பதற்கு அமெரிக்கா தீர்மானித்துள்ளமையை இலங்கை ஏற்றுமதியாளர்கள் சங்கம் (EASL) வரவேற்றுள்ளதுடன், இந்நடவடிக்கையானது நாட்டின் மிகப்பெரிய ஏற்றுமதிச் சந்தையில் இலங்கை உற்பத்திகளின் போட்டித்தன்மையைப் பேண உதவும் என்றும் தெரிவித்துள்ளது.
முன்னர் முன்மொழியப்பட்ட கணிசமான உயர் வரிகளுடன் ஒப்பிடுகையில் இந்த 10 சதவீத வரியானது குறிப்பிடத்தக்க முன்னேற்றமாகும் எனச் சுட்டிக்காட்டியுள்ள ஏற்றுமதியாளர்கள் சங்கம், இது இலங்கை ஏற்றுமதியாளர்களுக்கு அதிகளவிலான உறுதியான தன்மையை வழங்கும் என்றும் குறிப்பிட்டுள்ளது.
அமெரிக்காவுடனான பேச்சுவார்த்தைகளில் ஈடுபட்ட ஜனாதிபதி அனுர குமார திஸாநாயக்க, அரசாங்கம் மற்றும் அதிகாரிகளுக்கு நன்றி தெரிவித்துள்ள அச்சங்கம், அவர்களின் முயற்சியானது ஏற்றுமதியாளர்களையும் இத்துறை சார்ந்த ஆயிரக்கணக்கானோரின் வாழ்வாதாரத்தையும் பாதுகாக்க உதவியுள்ளதாகத் தெரிவித்துள்ளது.
இலங்கை ஏற்றுமதியாளர்கள் சங்கத்தின் கூற்றுப்படி, இந்த வரி விதிப்பானது பங்களாதேஷ், இந்தியா, பாகிஸ்தான், இந்தோனேசியா, மலேசியா மற்றும் கம்போடியா உள்ளிட்ட பல முக்கிய போட்டியாளர்களுடன் இலங்கையை சமநிலையில் வைத்துள்ளது.
ஆடைத் தொழில் போன்ற ஒப்பீட்டளவில் இலாப வரம்பு குறைவாக உள்ள தொழில்துறைகளுக்கு வரிச் சமநிலையைப் பேணுவது மிகவும் முக்கியமானது என்றும், கொள்முதல் செய்யும் சர்வதேசக் கொள்வனவாளர்கள் செலவினங்களை உன்னிப்பாக ஒப்பிட்டுப் பார்ப்பதாகவும் அச்சங்கம் சுட்டிக்காட்டியுள்ளது.
2.5 சதவீத புள்ளிகள் கொண்ட சிறிய வரி வித்தியாசம்கூட இலங்கையின் போட்டித்தன்மையை கணிசமாகப் பாதிக்கும் என்றும் தெரிவிக்கப்பட்டுள்ளது.
இத்தீர்மானத்தை வரவேற்கும் அதேவேளையில், அதிக உறுதியான தன்மையைப் பெறவும், சந்தைப் பிரவேசத்தை மேம்படுத்தவும், இரு நாடுகளுக்கும் இடையிலான பொருளாதார ஒத்துழைப்பை வலுப்படுத்தவும் அமெரிக்காவுடன் விரிவான இருதரப்பு வர்த்தக ஒப்பந்தத்தை இலங்கை முன்னெடுக்க வேண்டும் என்றும் இலங்கை ஏற்றுமதியாளர்கள் சங்கம் கோரிக்கை விடுத்துள்ளது.
சர்வதேச வர்த்தகக் கொள்கைகள் எவ்வளவு விரைவாக மாறக்கூடும் என்பதை அண்மைக்கால நிகழ்வுகள் வெளிப்படுத்தியுள்ளதாகக் குறிப்பிட்டுள்ள அச்சங்கம், இலங்கை ஏற்றுமதியாளர்களுக்கு மேலும் ஸ்திரமான மற்றும் கணிக்கக்கூடிய வர்த்தகச் சூழலை உருவாக்குவதன் முக்கியத்துவத்தையும் வலியுறுத்தியுள்ளது.