புறக்கோட்டை மத்திய பஸ் நிலைய வளாகத்திற்குள் ஒழுக்கீனமாக நடந்துகொண்டு, கண்ட இடங்களில் வெற்றிலை எச்சில் துப்பியும் சிறுநீர் கழித்தும் சூழலை அசுத்தப்படுத்திய 1,029 நபர்களைப் பாதுகாப்புப் படையினர் அடையாளம் கண்டுள்ளதுடன், அவர்களினாலேயே அப்பகுதிகளைச் சுத்தம் செய்விக்கும் சிறப்புச் சமூக சேவைத் திட்டம் நடைமுறைப்படுத்தப்பட்டுள்ளது.
இவ்வாறு சிக்கியவர்களில் பயணிகளுக்கு மேலதிகமாகச் சில பஸ் சாரதிகளும் நடத்துனர்களும் அடங்குவர் என்பது கண்டறியப்பட்டுள்ளது. சிலர் வெற்றிலை எச்சிலைப் பிளாஸ்டிக் போத்தல்களில் துப்பி வளாகத்திற்குள் வீசியிருந்தமையும் அவதானிக்கப்பட்டுள்ளது.
24 மணி நேரமும் 64 கேமராக்கள் மூலம் தீவிர கண்காணிப்பு
கடந்த ஏப்ரல் 08 ஆம் திகதி மக்களின் பயன்பாட்டிற்கு விடப்பட்ட இம்மாநகர மத்திய பஸ் நிலையத்தின் பாதுகாப்பு மற்றும் தூய்மையைக் கண்காணிப்பதற்காக, 64 பாதுகாப்பு கேமராக்கள் மூலம் 88 கண்காணிப்பு மையங்கள் இணைக்கப்பட்டுள்ளன. இலங்கை விமானப் படையின் படைப்பிரிவு அதிகாரி இந்திக விக்கிரமசிங்கவின் கண்காணிப்பின் கீழ் 25 அதிகாரிகள் அடங்கிய குழுவொன்று 24 மணி நேரமும் இந்த நடவடிக்கைகளில் ஈடுபட்டு வருகிறது.
CCTV காட்சிகளை அடிப்படையாகக் கொண்டு பொலிஸார் மற்றும் விமானப் படை அதிகாரிகள் தலையிட்டு, குற்றவாளிகளை உடனுக்குடன் சட்டத்தின் பிடியில் சிக்குவிக்க நடவடிக்கை எடுத்ததாக விமானப் படை ஊடகப் பேச்சாளர் குரூப் கப்டன் நலின் வெவக்கும்புர தெரிவித்துள்ளார்.
குற்றங்களை ஒடுக்குதலும் அவசர பதிலளிப்பும்
கடந்த ஏழு மாத காலத்தில் இந்த அமைக்கப்பட்ட பாதுகாப்பு கேமரா முறைமை மூலம் 1,286 வெவ்வேறு சம்பவங்கள் கண்டறியப்பட்டுள்ளன. பயணிகளின் பணம் மற்றும் பயணப் பைகளைத் திருடுதல், சட்டவிரோத நடவடிக்கைகள் மற்றும் பொதுச் சொத்துகளுக்குச் சேதம் விளைவித்தல் தொடர்பில் 64 சந்தேகநபர்கள் கைது செய்யப்பட்டு பொலிஸாரிடம் ஒப்படைக்கப்பட்டுள்ளனர்.
இதுதவிர, சட்டவிரோதமாகத் தங்கியிருந்த 55 யாசகர்கள், 13 நடமாடும் வியாபாரிகள் மற்றும் விபச்சாரத்தில் ஈடுபட்ட 3 பெண்கள் வளாகத்திலிருந்து அகற்ற நடவடிக்கை எடுக்கப்பட்டுள்ளது. தற்போது பொலிஸார், விமானப் படை மற்றும் இலங்கை போக்குவரத்துச் சபையின் (SLTB) பாதுகாப்புப் பிரிவினர் இணைந்து பயணிகளுக்கு ஏற்படும் இடையூறுகளைத் தடுக்கும் கூட்டுத் திட்டத்தைச் செயல்படுத்தி வருகின்றனர்.
மேலும், பஸ் நிலைய வளாகத்திற்குள் திடீரென நோய்வாய்ப்பட்ட 64 நபர்களை விரைவாக 'சுவசரிய' ஆம்புலன்ஸ் சேவை மூலம் வைத்தியசாலையில் சேர்க்கவும் பாதுகாப்புப் படையினர் நடவடிக்கை எடுத்துள்ளனர்.
பொதுச் சொத்துச் சேதங்களுக்கு சாரதிகளிடமிருந்தே நஷ்டஈடு
நவீனமயமாக்கலுக்குப் பிறகு சாரதிகள் மற்றும் நடத்துனர்களுக்காக 15 அறைகளைக் கொண்ட ஓய்வறை நிறுவப்பட்டுள்ளதுடன், அங்கு 120 பேர் தங்கும் வசதிகள் செய்யப்பட்டுள்ளன. இருப்பினும், அந்த ஓய்வறைக்கு அருகில் உள்ள குப்பைத் தொட்டியில் தொடர்ச்சியாக சிறுநீர் நிரப்பப்பட்ட போத்தல்களைப் போட்ட அவிசாவளை டிப்போவைச் சேர்ந்த பஸ் சாரதி ஒருவர், எட்டு மணி நேர கேமரா காட்சிகளைப் பின்தொடர்ந்து ஆய்வு செய்ததன் மூலம் அடையாளம் காணப்பட்டதாகப் பாதுகாப்புப் படையினர் தெரிவிக்கின்றனர்.
இதுதவிர, பஸ் நிலையத்தின் சொத்துகளில் மோதி சேதம் விளைவித்த இலங்கை போக்குவரத்துச் சபை பஸ் சாரதிகள் தொடர்பான 28 சம்பவங்கள் கேமரா காட்சிகள் மூலம் உறுதிப்படுத்தப்பட்டுள்ளதுடன், இலங்கை போக்குவரத்துச் சபையின் நிர்வாகத்தினால் அந்தச் சேதப் பணம் சம்பந்தப்பட்ட சாரதிகளிடமிருந்தே அறவிட நடவடிக்கை எடுக்கப்பட்டுள்ளது. அதேபோல் நீர் குழாய்கள், கொமோட்கள் உள்ளிட்ட பொதுச் சொத்துகளைச் சேதப்படுத்திய 48 சம்பவங்களும் அவதானிக்கப்பட்டுள்ளன.
"திருட்டுகள் மற்றும் முறைகேடுகள் கட்டுப்படுத்தப்பட்டுள்ளன" – இலங்கை போக்குவரத்துச் சபையின் தலைவர்
இந்த நிலைமை குறித்துக் கருத்துத் தெரிவித்த இலங்கை போக்குவரத்துச் சபையின் தலைவர் சஜீவ கனகரத்ன, விமானப் படை, பொலிஸார் மற்றும் பாதுகாப்புப் படையினரின் உடனடித் தலையீடு மற்றும் நவீன தொழில்நுட்பக் கண்காணிப்பு காரணமாக மத்திய பஸ் நிலையத்திற்குள் இடம்பெற்ற திருட்டுகள் மற்றும் சட்டவிரோதச் செயல்பாடுகள் தற்போது குறிப்பிடத்தக்க அளவில் கட்டுப்படுத்தப்பட்டுள்ளதாகத் தெரிவித்தார்.
பொதுச் சொத்துகளைப் பாதுகாத்து, மக்களுக்குப் பாதுகாப்பான மற்றும் சுத்தமான போக்குவரத்துச் சேவையை வழங்குவதற்காக இந்தக் கூட்டு கண்காணிப்பு நடவடிக்கை தொடர்ந்து முன்னெடுக்கப்படும் என்றும் அதிகாரிகள் மேலும் வலியுறுத்தினர்.