சுரேஷ் சலேவின் தடுப்புக் காவலை நீட்டிக்க வேண்டாம்: தாயாரிடமிருந்து ஜனாதிபதிக்கு உருக்கமான கடிதம்!

ஏற்பாடுகள் சட்டத்தின் கீழ் தடுப்புக் காவல் உத்தரவின் அடிப்படையில் தடுத்து வைக்கப்பட்டுள்ள அரசு புலனாய்வுச் சேவையின் (SIS) முன்னாள் பணிப்பாளர் மேஜர் ஜெனரல் சுரேஷ் சலேவின் தடுப்புக் காவலை மேலும் நீட்டிக்க வேண்டாம் எனக் கோரி, அவரது தாயாரான குளோடியா சலே (Claudia Mary Antoinette), ஜனாதிபதி அநுர குமார திசாநாயக்கவுக்குக் கடிதம் ஒன்றை அனுப்பியுள்ளார்.

2026 ஆகஸ்ட் 23 ஆம் திகதியிட்டு ஜனாதிபதி செயலகத்திற்கு அனுப்பப்பட்டுள்ள இந்தக் கடிதத்தின் மூலம், தனது மகன் தொடர்பான எந்தவொரு விசாரணையையும் சட்டப்பூர்வமாக நடத்துவதற்கு எவ்வித எதிர்ப்பும் இல்லை எனக் குறிப்பிட்டுள்ள அவர், தடுப்புக் காவல் உத்தரவின் கீழ் தொடர்ந்து தடுத்து வைப்பதைத் தவிர்க்குமாறு கேட்டுக்கொண்டுள்ளார்.

"விசாரணை சான்றுகளின் அடிப்படையில் அமைய வேண்டும், தடுப்புக் காவல் சான்றுகளுக்குப் பகரமாகக் கூடாது"

37 ஆண்டுகள் இலங்கை இராணுவத்தில் பணியாற்றி ஓய்வு பெற்றுள்ள தனது மகனின் தற்போதைய நிலைமை, ஒரு முதிய தாயாகத் தனக்கு மிகுந்த வேதனையைத் தருவதாக அவர் தனது கடிதத்தில் தெரிவித்துள்ளார்.

"நான் எந்தவொரு விசாரணையையும் நிறுத்துமாறு கோரவில்லை. குற்றச்சாட்டுகள் இருந்தால் அவற்றை விசாரியுங்கள். சான்றுகள் இருந்தால் அவற்றை ஆராயுங்கள். உண்மையைக் கண்டறியுங்கள். ஆனால் விசாரணை இடம்பெற்று வரும் நிலையில் எனது மகனின் தடுப்புக் காவலை மேலும் நீட்டிக்க வேண்டாம் என ஒரு தாயாக மிகவும் கருணையுடன் கேட்டுக்கொள்கிறேன். விசாரணை சான்றுகளின் அடிப்படையில் அமைய வேண்டும். தடுப்புக் காவல் என்பது சான்றுகளுக்கு மாற்றீடாக அமையக் கூடாது,"

என அவர் அதில் குறிப்பிட்டுள்ளார்.

ஜனாதிபதியைச் சந்திக்க வாய்ப்பு

தான் எந்தவொரு சிறப்புச் சலுகையையும் எதிர்பார்க்கவில்லை என்றும், நியாயமான வாய்ப்பையும் மனிதநேயத்தையும் மட்டுமே கோருவதாகவும் தெரிவிக்கும் குளோடியா சலே, தனது வேதனையை நேரில் தெரிவிப்பதற்காக ஜனாதிபதியைச் சந்திப்பதற்கு ஒரு வாய்ப்பை வழங்குமாறும் கேட்டுக்கொண்டுள்ளார்.

தனது மகனுக்குச் சுதந்திரமாகச் சட்டத்தின் முன்னிலையில் தன் தரப்புக் கருத்துக்களைத் தெரிவிக்கவும், சட்ட நடவடிக்கைகளை எதிர்கொள்ளவும் வாய்ப்பளிக்குமாறு அவர் ஜனாதிபதியிடம் மேலும் கோரிக்கை விடுத்துள்ளார்.

முன்னதாக, சுரேஷ் சலேவின் மனைவியும் ஜனாதிபதிக்கு இதுபோன்றதொரு அவசரக் கடிதத்தை அனுப்பியிருந்தார். அதில், தனது கணவர் கடுமையான சுகாதாரப் பிரச்சினைகளால் அவதிப்படுவதால், மனிதநேய அடிப்படையில் மற்றும் சட்ட ரீதியான நியாயத்தின் அடிப்படையில் செயல்படுமாறு சுட்டிக்காட்டியிருந்தார் என்பது குறிப்பிடத்தக்கது.