'சலேக்கு பாதிப்பு ஏற்பட்டால் ஜனாதிபதி தலைமையிலான அரசாங்கமே பொறுப்பேற்க வேண்டும்!'

சுரேஷ் சலேக்கு மூன்றாவது முறையாகவும் தடுப்புக் காவல் உத்தரவைப் பிறப்பிக்காமல், அவரை உடனடியாக நீதிமன்றத்தில் ஆஜர்படுத்துமாறு தேசிய அமைப்புகளின் ஒன்றியம் ஜனாதிபதியை வலியுறுத்தியுள்ளது.

"சலேக்கு நீதி - உரையாடல் மேடை" என்ற தலைப்பில் கொழும்பில் நடைபெற்ற ஊடகவியலாளர் சந்திப்பில் கருத்துத் தெரிவித்த அந்த அமைப்பின் பிரதிநிதிகள், சுரேஷ் சலே தொடர்ந்து தடுப்புக் காவல் உத்தரவின் கீழ் வைக்கப்பட்டிருப்பதால் அவரது உயிருக்கு ஏதேனும் பாதிப்பு ஏற்பட்டால், அதற்கு ஜனாதிபதி தலைமையிலான அரசாங்கமே பொறுப்பேற்க வேண்டும் எனக் குறிப்பிட்டனர்.

அங்கு கருத்துத் தெரிவித்த தேசிய அமைப்புகளின் ஒன்றியத்தின் உறுப்பினரான சட்டத்தரணி கல்யாணந்த திராணகம, சுரேஷ் சலே செய்த சட்டவிரோதச் செயல் என்ன என்பது குறித்து எவ்விதத் தகவலும் இல்லை என்றும், அவரைக் கைது செய்வதற்கு எந்தவித அடிப்படையும் இல்லை என்றும் தெரிவித்தார். மேலும், எவ்வித அடிப்படையுமின்றி தடுப்புக் காவல் உத்தரவு பிறப்பிக்கப்பட்டுள்ளதாக அவர் சுட்டிக்காட்டினார்.

அங்கு கருத்துத் தெரிவித்த சர்வஜன பலய அமைப்பின் உப தலைவர் அனுராதா யஹம்பத்:

"இப்போது அவர் ஆறு மாதங்களாகக் காவலில் வைக்கப்பட்டுள்ளார். அவர் மிகவும் மோசமான உடல்நலக் குறைவுடன் இருக்கிறார். அவர் நோய்வாய்ப்படும் நிலை வரை மிகவும் கொடூரமாக நடத்தப்பட்டார் என்பதை நாம் அறிவோம். வரும் 28ஆம் திகதியுடன் அவருக்குத் தொடர்ந்து தடுப்புக் காவல் உத்தரவு நீட்டிக்கப்படுமா இல்லையா என்பதன் மூலம், ஜனாதிபதி அவர்கள் இன்னும் ரணவிருக்களைப் (இராணுவ வீரர்களை) பழிவாங்குகிறாரா என்பதை மக்களுக்குக் காட்டப் போகிறாரா? அப்படி நடந்தால், அதற்கு அவர் மக்களுக்குப் பதிலளிக்க வேண்டியிருக்கும். ஏனெனில் இது இராணுவத்தினரைப் பழிவாங்கும் செயல் என்பதை மக்களும் இப்போது புரிந்துகொண்டுள்ளனர்."

அங்கு கருத்துத் தெரிவித்த தேசிய அமைப்புகளின் ஒன்றியத்தின் வசந்த பண்டார:

"அவர் நோய்வாய்ப்பட்டிருக்கும் போது அவருக்கு இவ்வாறான சித்திரவதைகளை வழங்கி, அவர் இறக்க நேரிட்டால் இந்த நாட்டு மக்கள் அதற்குச் மன்னிப்பு வழங்க மாட்டார்கள். எனவே, வரும் 28 ஆம் திகதி தடுப்புக் காவல் உத்தரவுப் பேனையைக் கையில் எடுக்க வேண்டாம் என அரசாங்கத்தை வலியுறுத்துகிறோம். ஜனாதிபதி அநுர குமார திசாநாயக்க உடனடியாக இது குறித்துத் தனி விசாரணை ஒன்றை ஆரம்பிக்க வேண்டும். இந்தச் சதியைப் புரிந்துகொண்டு அவரை விடுதலை செய்ய வேண்டும் என்ற கோரிக்கையை நாங்கள் முன்வைக்கிறோம்."