சுரேஷ் சலேவுக்கு கொழும்பு தேசிய வைத்தியசாலையில் இதய அறுவைச் சிகிச்சை!

முன்னாள் உளவுத்துறைப் பிரதானி ஒரு மாதத்திற்கும் மேலாக வைத்தியசாலையில் அனுமதி

ஜூன் 07ஆம் திகதி தேசிய வைத்தியசாலையில் அனுமதிக்கப்பட்ட பின்னர் இதயவியல் பிரிவில் அறுவைச் சிகிச்சை இடம்பெற்றுள்ளதாக வெளிப்பாடு

2019 ஈஸ்டர் ஞாயிறு பயங்கரவாதத் தாக்குதல் தொடர்பில் குற்றப் புலனாய்வுத் திணைக்களத்தினால் (CID) முன்னெடுக்கப்பட்டு வரும் விசாரணைகளுக்கு அமைவாகச் சந்தேகநபராகக் கைது செய்யப்பட்டு தடுத்து வைக்கப்பட்டுள்ள அரச புலனாய்வுச் சேவையின் (SIS) முன்னாள் பணிப்பாளர் மேஜர் ஜெனரல் சுரேஷ் சாலே, கொழும்பு தேசிய வைத்தியசாலையில் இதய அறுவைச் சிகிச்சைக்கு உட்படுத்தப்பட்டுள்ளதாக தகவல்கள் தெரிவிக்கின்றன.

கடந்த ஜூன் மாதம் 07ஆம் திகதி மருத்துவ சிகிச்சைக்காக கொழும்பு தேசிய வைத்தியசாலையில் அனுமதிக்கப்பட்ட அவர், பின்னர் மேலதிக மருத்துவப் பரிசோதனைகள் மற்றும் சிகிச்சைகளுக்காக அவ்வைத்தியசாலையின் இதயவியல் பிரிவுக்கு மாற்றப்பட்டிருந்தார்.

அறுவைச் சிகிச்சையும் தற்போதைய நிலைமையும்:

இதயவியல் பிரிவின் தீவிர சிகிச்சை மற்றும் நிபுணத்துவ வைத்தியர்களின் கண்காணிப்பின் கீழ் சிகிச்சைப் பெற்று வந்த நிலையிலேயே சுரேஷ் சாலே இவ்வாறு இதய அறுவைச் சிகிச்சைக்கு உட்படுத்தப்பட்டுள்ளதாகக் குறிப்பிடப்படுகின்றது.

ஈஸ்டர் தாக்குதல் தொடர்பில் குற்றப் புலனாய்வுத் திணைக்களத்தினால் முன்னெடுக்கப்பட்டு வரும் பரந்த அளவிலான விசாரணைகளுக்கு அமைவாக முன்னாள் உளவுத்துறைப் பிரதானி கடந்த பெப்ரவரி 25ஆம் திகதி கைது செய்யப்பட்டதுடன், அன்றிலிருந்து பயங்கரவாதத் தடைச் சட்டத்தின் (PTA) ஏற்பாடுகளின் கீழ் தடுத்து வைக்கும் உத்தரவின் பேரில் அவரிடம் விசாரணைகள் முன்னெடுக்கப்பட்டு வந்தன.

ஈஸ்டர் பயங்கரவாதத் தாக்குதல் தொடரின் பின்னணி மற்றும் அது தொடர்பான உளவுத்துறைத் தகவல்கள் குறித்து குற்றப் புலனாய்வுத் திணைக்களத்தினால் நடத்தப்படும் விசாரணைகளுக்காக சுரேஷ் சாலே கைது செய்யப்பட்டதுடன், அவர் வைத்தியசாலையில் அனுமதிக்கப்பட்டுள்ள காலப்பகுதியிலும் உரிய பாதுகாப்பு ஏற்பாடுகளுக்கு மத்தியில் புலனாய்வு அதிகாரிகளின் அவதானிப்பில் இருந்து வருகின்றார்.