இலங்கை உள்ளிட்ட 60 வர்த்தகப் பங்களிப்பு நாடுகளுக்கு இன்று (24) முதல் அமலுக்கு வரும் வகையில் 10% மற்றும் 12.5% எனும் அடிப்படையில் புதிய இறக்குமதி வரிகளை விதிப்பதற்கு டிரம்ப் நிர்வாகம் தீர்மானித்துள்ளது.
இதற்கமைய, இலங்கை உள்ளிட்ட 17 நாடுகளிலிருந்து இறக்குமதி செய்யப்படும் பொருட்களுக்கு 10 சதவீத வரி விதிக்கப்பட்டுள்ளது.
இந்த வரி சதவீதத்திற்கு உட்படும் ஏனைய நாடுகளாவன: அர்ஜென்டினா, பங்களாதேஷ், கம்போடியா, கனடா, ஈக்வடார், எல் சல்வடோர், குவாத்தமாலா, ஹொண்டுராஸ், இந்தியா, இந்தோனேசியா, ஜோர்தான், மலேசியா, மெக்சிகோ, பாகிஸ்தான், ஐக்கிய இராச்சியம் மற்றும் டிரினிடாட் அண்ட் டுபாகோ ஆகும்.
அத்துடன், ஐரோப்பிய ஒன்றியம் அல்லது தைவானில் இருந்து இறக்குமதி செய்யப்படும் பொருட்களுக்கும் இதே சதவீதமே பொருந்தும்.
இருப்பினும் அல்ஜீரியா, அங்கோலா, அவுஸ்திரேலியா, பஹாமாஸ், பஹ்ரைன், பிரேசில், சிலி, சீனா, கொலம்பியா, கொஸ்டாரிக்கா, டொமினிகன் குடியரசு, எகிப்து, கயானா, ஹொங்கொங், ஈராக், இஸ்ரேல், ஜப்பான், கசகஸ்தான், குவைத், லிபியா, மொரோக்கோ, நியூசிலாந்து, நிகரகுவா, நைஜீரியா, நோர்வே, ஓமான், பெரு, பிலிப்பைன்ஸ், கட்டார், ரஷ்யா, சவூதி அரேபியா, சிங்கப்பூர், தென்னாப்பிரிக்கா, தென் கொரியா, சுவிட்சர்லாந்து, தாய்லாந்து, துருக்கி, ஐக்கிய அரபு அமீரகம், உருகுவே, வெனிசுவேலா மற்றும் வியட்நாம் ஆகிய நாடுகளுக்கு 12.5% வரி நடைமுறைப்படுத்தப்படுகின்றது.
குறித்த நாடுகளில் கட்டாய உழைப்பைப் (Forced Labor) பயன்படுத்தி உற்பத்தி செய்யப்படும் பொருட்களின் இறக்குமதியைத் தடை செய்வதற்கான சட்டங்களை முறையாகச் செயற்படுத்தாமை மற்றும் அது தொடர்பில் நெகிழ்வுப் போக்கைக் காட்டுவதுமே இந்த புதிய வரி விதிப்பிற்கான பிரதான காரணம் எனத் தெரிவிக்கப்படுகின்றது.
அமெரிக்க நீதிமன்றத் தீர்ப்பிற்கு அமைய கடந்த பெப்ரவரி மாதத்தில் டிரம்பின் வரி நிர்வாகத்தை இடைநிறுத்தும் உத்தரவொன்று வழங்கப்பட்டிருந்ததுடன், இதன் காரணமாக அதனைச் செயற்படுத்துவதற்கு 150 நாட்களுக்கு மட்டுமே அனுமதி அளிக்கப்பட்டிருந்தது.
இதற்கமைய, குறித்த கால அவகாசம் நிறைவடையவுள்ள நிலையிலேயே இந்த புதிய வரி விதிப்பை நடைமுறைப்படுத்த நடவடிக்கைகள் மேற்கொள்ளப்பட்டுள்ளன.