மற்றும் வேலிக்கடை சிறைச்சாலையில் இடம்பெற்ற படுகொலைகள் தொடர்பில் உண்மையைக் கண்டறிவதற்கும், ஏற்பட்ட சேதங்களை மதிப்பிடுவதற்கும், இதுபோன்ற சம்பவங்கள் மீண்டும் நடப்பதைத் தடுப்பதற்கான பரிந்துரைகளை வழங்குவதற்கும் ஜனாதிபதி விசாரணை ஆணைக்குழு ஒன்றை நியமிக்குமாறு கோரி பாராளுமன்றத்தில் தனிநபர் உறுப்பினர் முன்மொழிவு ஒன்று சமர்ப்பிக்கப்பட்டுள்ளது.
பாராளுமன்ற உறுப்பினர் அமிர்தநாதன் அடைகலநாதனால் சமர்ப்பிக்கப்பட்ட இந்த முன்மொழிவு, 2026 செப்டம்பர் 11 வெள்ளிக்கிழமை திகதியிடப்பட்ட பாராளுமன்ற நிகழ்ச்சிநிரல் புத்தகத்தில் (Order Paper) 'முன்மொழிவுகள் பற்றிய அறிவித்தல் மற்றும் நாளுக்கான பணிகள்' என்பதன் கீழ் P. 132/2026 எனும் இலக்கத்தில் சேர்க்கப்பட்டுள்ளது.
முன்மொழிவின் அடிப்படை மற்றும் காரணங்கள்
குறித்த தனிநபர் உறுப்பினர் முன்மொழிவின் மூலம், 1983 கறுப்பு ஜூலை மற்றும் வேலிக்கடை சிறைச்சாலையில் இடம்பெற்ற படுகொலைகள் உள்ளிட்ட வன்முறைகள் காரணமாக நாட்டின் தேசிய ஒருமைப்பாடு, சமூகக் கட்டமைப்பு மற்றும் பொருளாதாரம் ஆகியவை கடுமையான பின்னடைவுக்கும் கறைக்கும் உள்ளாகின எனச் சுட்டிக்காட்டப்பட்டுள்ளது.
அந்த மோதல் சூழ்நிலையில் ஆயிரக்கணக்கான மக்கள் உயிரிழந்ததுடன், பல்லாயிரக்கணக்கான மக்கள் இடம்பெயர்ந்து அகதிகளாகினர்; வீடுகள் மற்றும் வணிக நிறுவனங்கள் உள்ளிட்ட பெருமளவிலான சொத்துக்கள் தீயிட்டுக் கொளுத்தப்பட்டு அழிக்கப்பட்டன.
இந்தச் சம்பவங்கள் நடந்து நாற்பது ஆண்டுகளுக்கும் மேலாகியுள்ள போதிலும், இதற்குப் பொறுப்பானவர்கள் அல்லது இவற்றை இயக்கிய தரப்பினர் இதுவரை சரியாக அடையாளம் காணப்படவில்லை என்றும், இடம்பெற்ற மனித உரிமை மீறல்கள் மற்றும் சொத்து சேதங்கள் குறித்து விரிவான மற்றும் சுயாதீனமான விசாரணை இதுவரை நடத்தப்படவில்லை என்றும் நாடாளுமன்ற உறுப்பினர் தனது முன்மொழிவில் சுட்டிக்காட்டியுள்ளார்.
நிலையான நல்லிணக்கமும் மீண்டும் நடப்பதைத் தடுத்தலும்
இலங்கையில் இதுபோன்ற இனமோதல்களும் வன்முறைகளும் இனி ஒருபோதும் ஏற்படாது என்பதை உறுதிப்படுத்துவதும், நாட்டின் அனைத்துச் சமூகங்களுக்கும் இடையே நிலையான சமூக நல்லிணக்கத்தையும் சமாதானத்தையும் கட்டியெழுப்புவதும் காலத்தின் தேவையாகும் என அந்த முன்மொழிவில் வலியுறுத்தப்பட்டுள்ளது.
அதற்கமைய, 1983 வன்முறைகள் பற்றிய முழுமையான உண்மையை வெளிக்கொணர்வதற்கும், ஏற்பட்ட அழிவுகளைத் துல்லியமாக மதிப்பிடுவதற்கும், எதிர்காலத்தில் இதுபோன்ற வன்முறைகளைத் தடுப்பதற்கான கொள்கைப் பரிந்துரைகளை அரசாங்கத்திற்கு வழங்குவதற்கும் பூரண அதிகாரங்களைக் கொண்ட ஜனாதிபதி விசாரணை ஆணைக்குழு ஒன்றை நியமிக்க வேண்டும் என இந்த முன்மொழிவின் மூலம் பாராளுமன்றத்திடம் கோரிக்கை விடுக்கப்பட்டுள்ளது.