இளைஞர்கள் கடத்தப்பட்டு காணாமல் ஆக்கப்பட்ட சம்பவத்துடன் தொடர்புடைய சந்தேகநபரொருவர் தலைமறைவாகியிருப்பதற்கு ஆதரித்து அநுசரணை வழங்கினார் எனக் குற்றம்சாட்டப்பட்டு, சந்தேகநபரக நீதிமன்றத்தில் ஆஜர்படுத்தப்பட்ட முன்னாள் கடற்படைத் தளபதி ரவீந்திர விஜேகுணரத்னவை பிணையில் விடுவிக்குமாறு கொழும்பு கோட்டை நீதவான் நீதிமன்றம் உத்தரவிட்டுள்ளது.
இதற்கு முன்னர் விடுக்கப்பட்ட அறிவித்தலுக்கு (Notice) அமைவாக, சந்தேகநபராக பெயரிடப்பட்டுள்ள முன்னாள் கடற்படைத் தளபதி நீதிமன்றத்தில் ஆஜராகியிருந்தார்.
அதனைத் தொடர்ந்து சமர்ப்பிக்கப்பட்ட குற்றப்பத்திரிகைக்கு தாம் குற்றமற்றவர் என அவர் அறிவித்ததையடுத்து, தலா 10 இலட்சம் ரூபாய் பெறுமதியான இரண்டு சரீரப் பிணைகளில் அவரை விடுவிக்குமாறு கொழும்பு கோட்டை நீதவான் பசந்த அமரசேன உத்தரவிட்டார்.
இதனைத் தொடர்ந்து வழக்கு விசாரணையை எதிர்வரும் டிசம்பர் மாதம் 09ஆம் திகதிக்கு ஒத்திவைக்குமாறு நீதவான் உத்தரவிட்டார்.