சுரேஷ் சலேயின் தடுப்புக்காவலை மேலும் நீடிக்கத் திட்டம்: ஜனாதிபதிக்கு மனைவி அவசரக் கடிதம்!

நிலைமை கவலைக்கிடமாக உள்ளதாக வெளிப்பாடு.

தடுப்புக் காவலாணைக்கு பதிலாக நீதிமன்ற மேற்பார்வையின் கீழ் விளக்கமறியலில் வைக்குமாறு கோரிக்கை.

பயங்கரவாதத் தடைச் சட்டத்தின் (PTA) தற்காலிக விதிகளின் கீழ் குற்றப் புலனாய்வுத் திணைக்களத்தின் (CID) பொறுப்பில் தடுத்து வைக்கப்பட்டு விசாரணைக்கு உட்படுத்தப்பட்டுள்ள அரச புலனாய்வுச் சேவையின் (SIS) முன்னாள் தலைவரும் ஓய்வுபெற்ற மேஜர் ஜெனரலுமான சுரேஷ் சாலேயின் தடுப்புக் காவலாணையை (Detention Order) மேலும் 90 நாட்களுக்கு நீடிப்பதற்கு அதிகாரிகள் தயாராகி வருவதாக தகவல்கள் தெரிவிக்கின்றன.

இருப்பினும், தனது கட்சிக்காரரின் கடுமையான இதய நோயைக் கருத்தில் கொள்ளாமல், நடைமுறையிலுள்ள பயங்கரவாதத் தடைச் சட்டத்தின் விதிகளைப் பயன்படுத்தி மீண்டும் தடுப்புக் காவலாணையை நீடிக்க நடவடிக்கை எடுத்தால், அது புலனாய்வாளர்களின் நோக்கங்கள் குறித்து சட்டச் சிக்கல்களை ஏற்படுத்தும் என அவரது சட்டத்தரணிகள் சுட்டிக்காட்டுகின்றனர். குறிப்பாக, தற்போதைய அரசாங்கம் பயங்கரவாதத் தடைச் சட்டத்தை நீக்கி, புதிய அரசு பாதுகாப்புச் சட்டங்களை இயற்றுவதற்கு நடவடிக்கை எடுத்து வரும் பின்னணியில் இந்நிலைமை உருவெடுத்துள்ளதாக அவர்கள் குறிப்பிடுகின்றனர்.

மனைவியிடமிருந்து ஜனாதிபதிக்கு எழுத்துப்பூர்வ மேன்முறையீடு

இதனிடையே, சுரேஷ் சாலேயின் மனைவியான எஸ்.பி.எம்.எஸ்.சாலே பந்துசேன, பாதுகாப்பு அமைச்சருமான ஜனாதிபதி அநுர குமார திசாநாயக்கவிற்கு நேற்று (ஆகஸ்ட் 20) விசேட எழுத்துப்பூர்வ மேன்முறையீடு ஒன்றை அனுப்பியுள்ளார்.

அந்தக் கடிதத்தின் மூலம், தனது கணவரின் தடுப்புக் காவல் காலத்தை மேலும் நீடிக்காமல், நீதிமன்ற மேற்பார்வையுடன் கூடிய விளக்கமறியல் காவலில் (Remand Custody) வைக்குமாறு அவர் சுட்டிக்காட்டியுள்ளார்.

தடுப்புக் காவலில் இருந்த காலத்தில் மேற்கொண்ட உணவுத் தவிப்புப் போராட்டத்திற்குப் பிறகு அவரது உடல்நிலை மோசமடைந்ததுடன், கடந்த ஜூன் 07 ஆம் திகதி கொழும்பு தேசிய மருத்துவமனைக்கும், அதனைத் தொடர்ந்து ஜூன் 27 ஆம் திகதி தேசிய மருத்துவமனையின் இதய நோய்ப் பிரிவிற்கும் மாற்றப்பட்டார். அங்கு மேற்கொள்ளப்பட்ட மருத்துவப் பரிசோதனைகளின் பின்னர், உயிராபத்தைக் கட்டுப்படுத்துவதற்காக அவரது இதயத்தில் 'Implantable Cardioverter-Defibrillator' (ICD) எனும் கருவியைப் பொருத்தும் சிக்கலான அறுவை சிகிச்சையும் செய்யப்பட்டுள்ளதாக அந்தக் கடிதத்தில் குறிப்பிடப்பட்டுள்ளது.

உயிர் பாதுகாப்பும் விசாரணைகளுக்கு ஒத்துழைப்பும்

இதய அறுவை சிகிச்சைக்குப் பின் மீண்டு வரும் ஒரு நோயாளியை மீண்டும் குற்றப் புலனாய்வுத் திணைக்களத்தின் பொறுப்பில் எடுப்பது அவரது உயிருக்கு நேரடியாகவும் தீவிரமாகவும் ஆபத்தை ஏற்படுத்தக்கூடும் எனச் சுட்டிக்காட்டும் சுரேஷ் சாலேயின் மனைவி, இது வெறும் தடுப்புக் காவல் நிபந்தனைகள் பற்றிய கேள்வி மட்டுமல்ல, வாழ்வதற்க்கான உரிமையோடு தொடர்புடைய ஒரு மனிதநேயப் பிரச்சினை என்றும் வலியுறுத்துகிறார்.

மேலும், சட்டப்பூர்வமாக நடத்தப்படும் எந்தவொரு விசாரணைக்கும் இடையூறு விளைவிக்கும் அல்லது அதனைத் தாமதப்படுத்தும் எண்ணம் எதுவும் தமது குடும்பத்தினருக்கு இல்லை என்றும், நீதிமன்ற மேற்பார்வையின் கீழ் நடைபெறும் எந்தவொரு சட்டப்பூர்வ விசாரணைக்கும் முழுமையான ஒத்துழைப்பை வழங்கத் தயாராக இருப்பதாகவும் அவர் ஜனாதிபதிக்கு அனுப்பிய கடிதத்தில் மேலும் தெரிவித்துள்ளார்.

அரசின் பாதுகாப்பில் உள்ள ஒரு சந்தேகநபரின் சுகாதாரப் பாதுகாப்பை உறுதி செய்வதற்கும், சட்டத்தின் முறையான நடைமுறையைச் செயல்படுத்துவதற்கும் இடையிலான சமநிலையைப் பாதுகாக்கும் வகையில் இத்தீர்மானத்தை எடுக்குமாறு அவர் பாதுகாப்பு அமைச்சரிடம் கேட்டுக்கொண்டுள்ளார்.