தற்போது விடுவிக்கப்படக்கூடியவை என அடையாளம் காணப்பட்டுள்ள வடக்கு மற்றும் கிழக்கு மாகாணங்களிலுள்ள காணிகளை விரைவாக விடுவித்து, உரிய தரப்பினரிடம் ஒப்படைக்குமாறு ஜனாதிபதி அநுர குமார திஸாநாயக்க பாதுகாப்புப் படையினருக்கு அறிவுறுத்தியுள்ளார்.
இன்று (20) நாடாளுமன்ற வளாகத்தில் இது தொடர்பில் நடைபெற்ற கலந்துரையாடலில் கலந்துகொண்ட போதே ஜனாதிபதி இந்த அறிவுறுத்தல்களை வழங்கினார்.
தேசிய பாதுகாப்பு மிகவும் முக்கியமானது என்பதோடு, அதற்காக இராணுவ முகாம்களை எந்தெந்த இடங்களில் நிறுவ வேண்டும் என்பதைத் தீர்மானிப்பது முப்படைகள் மற்றும் பொலிஸார் உட்பட பாதுகாப்புச் சார்ந்த தரப்பினரின் பொறுப்பாகும் என அவர் சுட்டிக்காட்டினார்.
அக் காரணிகளின் அடிப்படையில், விடுவிக்கப்படக்கூடிய காணிகள் எவை, விடுவிக்க முடியாத காணிகள் எவை என்பது தொடர்பில் இறுதித் தீர்மானத்திற்கு வருமாறு அනුர කුමාර திசாநாயக்க அறிவுறுத்தியுள்ளதாக ஜனாதிபதி ஊடகப் பிரிவு தெரிவித்துள்ளது.
அத்தியாவசியமான காணிகளின் அளவைத் தீர்மானிக்கும் போது, முடிந்தவரையில் மக்களின் கோணத்தில் சிந்தித்து, விடுவிக்கக்கூடிய அதிகபட்ச காணிகளை விடுவிக்க வேண்டும்.
அவ்வாறு வழங்கப்படும் காணித் துண்டுகளுக்கு மேலதிகமாக, அம்மக்களின் வாழ்வாதார வழிகளை அமைத்துக் கொடுப்பதற்கான நடவடிக்கைகளை மேற்கொள்வதன் அவசியத்தையும் ஜனாதிபதி தெளிவுபடுத்தினார்.
அதற்காக, அதிக உற்பத்தித்திறனைப் பெறக்கூடிய நவீன விவசாயத் தொழில்நுட்பத்தைக் கொண்ட திட்டங்களை அறிமுகப்படுத்த நடவடிக்கை எடுக்குமாறு ஜனாதிபதி அනුர කුමාර திசாநாயக்க, விவசாய, கால்நடை, காணி மற்றும் நீர்ப்பாசன அமைச்சின் செயலாளருக்கு மேலும் அறிவுறுத்தினார்.