வழங்கிய வாக்குறுதியை மாற்ற முடியாது - சஜித்துக்கு ஜனாதிபதி பதில்!

பிரதமர் பதவியை ஏற்கத் தயார் என எதிர்க்கட்சித் தலைவர் சஜித் பிரேமதாச, ஜனாதிபதி கோட்டாபய ராஜபக்சவுக்கு நேற்று (12) பிற்பகல் அனுப்பி வைத்துள்ள கடிதத்திற்கு பதிலளிக்கும் போதே ஜனாதிபதி இதனைத் தெரிவித்துள்ளார்.

தற்போது ஏற்பட்டுள்ள நெருக்கடியான சூழ்நிலையில் பிரதமராக பதவியேற்குமாறும், அரசாங்கத்தை அமைக்குமாறும் எதிர்க்கட்சித் தலைவரையே தான் முதலில் அழைத்ததாக ஜனாதிபதி குறிப்பிட்டுள்ளார்.

அதன் பின்னர், முன்னாள் பிரதமர் ரணில் விக்ரமசிங்கவிடம் பிரதமர் பதவியை ஏற்குமாறு தாம் விடுத்த கோரிக்கைக்கு சாதகமான பதில் கிடைக்கப் பெற்றதன் காரணமாகவே பதவியேற்பு விழாவில் பங்கேற்குமாறு அழைப்பு விடுக்கப்பட்டதாக ஜனாதிபதி குறிப்பிட்டுள்ளார்.

எவ்வாறாயினும், பாராளுமன்றத்தில் 113 பெரும்பான்மையுடன் பிரதமர் பதவியை கோருமாறு ஜனாதிபதி எதிர்க்கட்சித் தலைவருக்கு பணிப்புரை விடுத்துள்ளார்.

நேற்று முன்தினம் (11) நாட்டு மக்களுக்கு உரையாற்றிய ஜனாதிபதி, பாராளுமன்றத்தில் பெரும்பான்மையினரின் நம்பிக்கையை பெற்று மக்களின் நம்பிக்கையை பலப்படுத்தக்கூடிய பிரதமரும் அமைச்சரவையும் இந்த வாரத்தில் நியமிக்கப்படவுள்ளதாக தெரிவித்தார்.

19 ஆவது திருத்தச் சட்டத்தின் உள்ளடக்கங்களை மீள அமுல்படுத்தும் வகையில் அரசியலமைப்பை திருத்தியமைப்பதற்கு பாராளுமன்றத்திற்கு அதிக அதிகாரம் கிடைக்கும் வகையில் செயற்படுவதாக ஜனாதிபதி தெரிவித்தார்.