-
SLS 1732 மற்றும் SLS 1748 தரச்சான்றிதழ் இலச்சினை (Logo) இல்லாத தயாரிப்புகளைக் காட்சிப்படுத்துவதும் விற்பனை செய்வதும் முற்றாகத் தடை
-
நுகர்வோர் பாதுகாப்பிற்காக 2003 ஆம் ஆண்டின் 9 ஆம் இலக்கச் சட்ட விதிகளின் கீழ் அதிவிசேட வர்த்தமானி அறிவித்தல் வெளியீடு
இலங்கை தரக்கட்டளைகள் நிறுவனத்தின் (SLSI) செல்லுபடியாகும் தயாரிப்பு தரச்சான்றிதழ் இலச்சினை இல்லாத மாதவிடாய் சுகாதாரப் பயன்பாட்டுத் துண்டுகளை (Sanitary Towels/Napkins) சந்தைக்கு வெளியிடுதல், போக்குவரத்து செய்தல் மற்றும் விற்பனை செய்வதனை முற்றாகத் தடை செய்து நுகர்வோர் விவகார அதிகாரசபை (CAA) அதிவிசேட வர்த்தமானி அறிவித்தல் ஒன்றை வெளியிட்டுள்ளது.
நுகர்வோர் பாதுகாப்பு மற்றும் தயாரிப்புகளின் தரத்தை மேம்படுத்தும் நோக்கில் நடைமுறைப்படுத்தப்படும் இந்த புதிய ஒழுங்குவிதிகள், 2026 ஒக்டோபர் மாதம் 08ஆம் திகதி முதல் நாடு பூராகவும் உத்தியோகபூர்வமாக அமலுக்கு வரும் என அந்த அதிகாரசபை அறிவித்துள்ளது.
உள்நாட்டில் உற்பத்தி செய்யப்படும் அல்லது வெளிநாடுகளில் இருந்து இறக்குமதி செய்யப்படும் அனைத்து வகையான மாதவிடாய் சுகாதாரப் பயன்பாட்டுத் துண்டுகளுக்கும் இந்த புதிய உத்தரவு ஒருசேரப் பொருந்தும் என அந்த அறிவித்தலில் தெளிவாகக் குறிப்பிடப்பட்டுள்ளது.
நடைமுறைப்படுத்தப்படும் குறிப்பிட்ட தரப் பிரிவுகள்:
நுகர்வோர் விவகார அதிகாரசபையின் தற்காலிகத் தவிசாளர் எஸ். எம். டி. சூரியகுமாரவின் கையொப்பத்துடன் வெளியிடப்பட்டுள்ள இந்த வர்த்தமானி உத்தரவு, பிரதானமாக இரண்டு (02) தயாரிப்புப் பிரிவுகளின் கீழ் நடைமுறைப்படுத்தப்படுகிறது:
-
SLS 1732 தரம்: ஒருமுறை மாத்திரம் பயன்படுத்தப்படும் சாதாரண மாதவிடாய் சுகாதாரப் பயன்பாட்டுத் துண்டுகள் (Single-use Sanitary Towels).
-
SLS 1748 தரம்: ஒருமுறை மாத்திரம் பயன்படுத்தப்படும் மிக மெல்லிய மாதவிடாய் சுகாதாரப் பயன்பாட்டுத் துண்டுகள் (Single-use Ultra-thin/Slim Sanitary Towels).
இந்த உரிய தரச்சான்றிதழ்கள் இல்லாத எந்தவொரு தயாரிப்பையும் உள்நாட்டில் உற்பத்தி செய்தல், பொதியிடல், விநியோகித்தல், போக்குவரத்து செய்தல், களஞ்சியப்படுத்துதல், விற்பனை செய்தல் மற்றும் விற்பனைக்காகக் காட்சிப்படுத்துதல் என்பன ஒக்டோபர் 08 ஆம் திகதிக்குப் பின்னர் சட்டவிரோதமான குற்றமாகக் கருதப்படும்.
சட்டப் பின்னணியும் இறக்குமதிக்கான கட்டுப்பாடும்:
இந்த விசேட உத்தரவானது 2003 ஆம் ஆண்டின் 9 ஆம் இலக்க நுகர்வோர் விவகார அதிகாரசபைச் சட்டத்தின் 12(2) ஆம் பிரிவின் கீழ் வழங்கப்பட்டுள்ள அதிகாரங்களுக்கு அமைவாக வெளியிடப்பட்டுள்ளது.
இலங்கை தரக்கட்டளைகள் நிறுவனத்தினால் வழங்கப்படும் உத்தியோகபூர்வ SLS தயாரிப்பு தரச்சான்றிதழ் இலச்சினையைக் கொண்ட தயாரிப்புகள் மாத்திரமே இனிவரும் காலங்களில் உள்நாட்டுச் சந்தையில் புழக்கத்தில் இருக்க வேண்டும்.
மேலும், வெளிநாடுகளில் இருந்து இறக்குமதி செய்யப்படும் மாதவிடாய் சுகாதாரப் பயன்பாட்டுத் துண்டுகளை உள்நாட்டுச் சந்தைக்கு விடுவிப்பதற்கு முன்னர், இலங்கை தரக்கட்டளைகள் நிறுவனத்தினால் நடைமுறைப்படுத்தப்படும் 'இறக்குமதி ஆய்வுத் திட்டம்' (Import Inspection Scheme) என்பதன் கீழ் கட்டாயப் பரிசோதனைக்கு உட்படுத்தி உரிய அனுமதியைப் பெற்றுக்கொள்ள வேண்டும் எனவும் வர்த்தமானி அறிவித்தலில் குறிப்பிடப்பட்டுள்ளது.
இந்த சட்ட விதிகள் நடைமுறைக்கு வருவதனைத் தொடர்ந்து, நுகர்வோர் தாம் கொள்வனவு செய்யும் மாதவிடாய் சுகாதாரப் பயன்பாட்டுத் துண்டுகளின் பொதிகளில் செல்லுபடியாகும் SLS தரச்சான்றிதழ் இலச்சினை காணப்படுகின்றதா என்பதை அவதானமாகப் பரிசீலிக்குமாறு நுகர்வோர் விவகார அதிகாரசபை பொதுமக்களிடம் மேலும் கேட்டுக்கொண்டுள்ளது.