முன்னாள் பொலிஸ் மா அதிபர் சி.டி.விக்ரமரத்னவின் மரணம் குறித்து விசேட விசாரணை ஆரம்பம்!

அதிபர் (IGP) சி.டி. விக்கிரமரத்னவின் மரணம் தொடர்பில், மேல் மாகாண தெற்கு குற்றத்தடுப்புப் பிரிவினர் விசேட விசாரணைகளை ஆரம்பித்துள்ளதாகத் தெரிவிக்கப்படுகின்றது.

தினமின அரச நாளிதழை மேற்கோள் காட்டி பொலிஸார் தெரிவித்துள்ளதாவது: பொலிஸ் சட்ட அதிகாரி பிரியந்த வீரசூரியவின் உத்தரவிற்கமைய, மேல் மாகாண தெற்கு பிராந்தியத்திற்கு பொறுப்பான பிரதிப் பொலிஸ் மா அதிபர் (DIG) சமந்த விஜேசேகரவின் நேரடி மேற்பார்வையின் கீழ் இந்த விசேட விசாரணைப் பணிகள் முடுக்கிவிடப்பட்டுள்ளன.

குறித்த மரணம் துப்பாக்கிச் சூட்டினால் தான் நிகழ்ந்துள்ளது என்பது உறுதி செய்யப்பட்டுள்ள போதிலும், இது தற்கொலையா அல்லது தற்செயலாக நிகழ்ந்த துப்பாக்கி வெடிப்பச் சம்பவமா என்பதை புலனாய்வாளர்கள் இன்னும் உறுதிப்படுத்தவில்லை.

இது தொடர்பான தெளிவான விபரங்கள், கிடைக்கப்பெறவுள்ள தடயவியல் மற்றும் பிரேத பரிசோதனை அறிக்கைகளின் பின்னரே தெரியவரும் என சிரேஷ்ட பொலிஸ் அதிகாரி ஒருவர் குறிப்பிட்டுள்ளார்.

சம்பவத்தின் பின்னணி

பொலிஸ் தரப்பு தகவல்களின்படி, விக்கிரமரத்னவின் நெஞ்சுப் பகுதியில் ஏற்பட்ட துப்பாக்கிக் காயம், அவரது முதுகுப் பகுதி ஊடாக வெளியேறியுள்ளது. இந்தச் சம்பவத்திற்குப் பயன்படுத்தப்பட்ட துப்பாக்கியானது, அவரது தனிப்பட்ட பாதுகாப்புப் பிரிவில் கடமையாற்றும் பொலிஸ் சார்ஜன்ட் ஒருவருக்குச் சொந்தமானதாகும்.

தான் உடற்பயிற்சிக்காக (Cycling) வெளியில் செல்வதற்கு முன்னர், அத்துப்பாக்கியை சரிபார்க்க வேண்டும் என முன்னாள் பொலிஸ் மா அதிபர் தன்னிடம் கேட்டதாக அந்த சார்ஜன்ட் புலனாய்வாளர்களிடம் தெரிவித்துள்ளார். அவர் தண்ணீர்க் போத்தல்களை எடுப்பதற்காக வீட்டிற்குள் சென்ற சில நிமிடங்களில், துப்பாக்கி வெடிக்கும் சத்தம் கேட்டுள்ளது.

அந்தச் சமயத்தில் விக்கிரமரத்னவின் மனைவியும் இளைய மகனும் வீட்டிற்குள்ளேயே இருந்துள்ளனர். சத்தம் கேட்டு அவர்கள் வெளியில் ஓடிவந்த போது, துப்பாக்கி அருகில் கிடக்க, அவர் தரையில் விழுந்து கிடப்பதைக் கண்டுள்ளனர்.

இதேவேளை, மறைந்த முன்னாள் பொலிஸ் மா அதிபர் சி.டி. விக்கிரமரத்னவின் இறுதிக் கிரியைகள், முழுமையான பொலிஸ் மரியாதைகளுடன் இன்று (20) இடம்பெறவுள்ளதாக பொலிஸார் அறிவித்துள்ளனர்.

இறுதிக்கிரியைகள் இன்று

மறைந்த முன்னாள் பொலிஸ் மா அதிபர் சி.டி. விக்கிரமரத்னவின் இறுதிக்கிரியைகள், முழுமையான பொலிஸ் மரியாதைகளுடன் இன்று (20) பிற்பகல் பொரள்ளை பொது மயானத்தில் இடம்பெறவுள்ளன.

இலங்கையின் 35ஆவது பொலிஸ் மா அதிபராகப் கடமையாற்றிய சி.டி. விக்கிரமரத்ன, உயிரிழக்கும் போது 63 வயதாக இருந்தமை குறிப்பிடத்தக்கது.

கடந்த 1986ஆம் ஆண்டு பொலிஸ் சேவையில் இணைந்துகொண்ட அவர், 2019ஆம் ஆண்டு உயிர்த்த ஞாயிறு பயங்கரவாதத் தாக்குதலின் பின்னர் அப்போதைய பொலிஸ் மா அதிபர் பூஜித் ஜயசுந்தர கட்டாய விடுமுறையில் அனுப்பப்பட்டதை அடுத்து, பதில் பொலிஸ் மா அதிபராக நியமிக்கப்பட்டார்.

அதனைத் தொடர்ந்து, 2020ஆம் ஆண்டு நவம்பர் மாதம் 27ஆம் திகதி அவர் பொலிஸ் மா அதிபராகப் பதவியேற்றார்.

கடந்த 2023ஆம் ஆண்டு மார்ச் 25ஆம் திகதி அவர் ஓய்வுபெறவிருந்த போதிலும், புதிய பொலிஸ் மா அதிபர் ஒருவர் நியமிக்கப்படும் வரை, அப்போதைய ஜனாதிபதி ரணில் விக்ரமசிங்கவினால் அவருக்கு பலமுறை சேவை நீடிப்பு வழங்கப்பட்டது. இதன்காரணமாக அவர் மேலும் சுமார் 8 மாதங்கள் பதவியில் நீடித்ததுடன், 2023 நவம்பர் 23 அன்று தனது பதவியிலிருந்து ஓய்வு பெற்றார்.

மரணம் மற்றும் விசாரணை குறித்த விபரங்கள்

இதேவேளை, முன்னாள் பொலிஸ் மா அதிபர் சி.டி. விக்கிரமரத்ன கடந்த வெள்ளிக்கிழமை துப்பாக்கிச் சூட்டிற்கு இலக்காகி உயிரிழந்திருந்தார்.

அவரது மரணம் தற்கொலையாக இருக்கலாம் என சந்தேகிக்கப்படுவதுடன், அவர் தனது பாதுகாப்பு அதிகாரியின் துப்பாக்கியைப் பயன்படுத்தி இந்தச் சூட்டை நடத்திக்கொண்டிருக்கலாம் என பொலிஸார் சந்தேகம் வெளியிட்டுள்ளனர்.

சி.டி. விக்கிரமரத்னவின் சடலம் மீதான பிரேத பரிசோதனையின் போது 'திறந்த தீர்ப்பு' (Open Verdict) வழங்கப்பட்டுள்ளது. கொழும்பு கிழக்கு ஆதார வைத்தியசாலையின் சட்ட வைத்திய அதிகாரியினால் இந்தத் தீர்ப்பு வழங்கப்பட்டுள்ளதுடன், அவரது உடற்பாகங்கள் மேலதிக பரிசோதனைகளுக்காக அரசாங்க இரசாயன பகுப்பாய்வாளரிடம் (Government Analyst) சமர்ப்பிக்கப்பட்டுள்ளன.

சம்பவம் தொடர்பில் மேல் மாகாண தெற்கு குற்றத்தடுப்புப் பிரிவினரும் மாலபே பொலிஸாரும் மேலதிக விசாரணைகளை முன்னெடுத்து வருகின்றனர். அத்துடன், இந்தச் சம்பவத்திற்குப் பயன்படுத்தப்பட்டதாகக் கூறப்படும் துப்பாக்கியும் அரசாங்க இரசாயன பகுப்பாய்வாளரிடம் ஒப்படைக்கப்பட்டுள்ளது.

இவ்விசாரணைகளுக்கு அமைய, விக்கிரமரத்னவின் மனைவி மற்றும் மூன்று பாதுகாப்பு அதிகாரிகளிடம் வாக்குமூலங்கள் பதிவு செய்யப்பட்டுள்ளதாக மேல் மாகாண தெற்கு குற்றத்தடுப்புப் பிரிவினர் தெரிவித்துள்ளனர்.