தமிழ்த் தேசியக் கூட்டமைப்பின் முன்னாள் நாடாளுமன்ற உறுப்பினரான எம்.கே. சிவாஜிலிங்கம் காலமானார். உயிரிழக்கும் போது அவருக்கு 69 வயது.
தமிழ்த் தேசியக் கூட்டமைப்பைப் பிரதிநிதித்துவப்படுத்தி இரு தடவைகள் நாடாளுமன்றத்திற்குத் தெரிவான அவர், தற்போது வல்வெட்டித்துறை நகர சபையின் தவிசாளராகவும் (நகரபிதா) கடமையாற்றி வந்தார்.
கடந்த சில காலமாகச் சுகவீனமுற்றிருந்த அவர், நேற்று (14) இரவு உயிரிழந்துள்ளதாகத் தெரிவிக்கப்படுகின்றது.
வடமராட்சி, வல்வெட்டித்துறையைப் பிறப்பிடமாகக் கொண்ட எம்.கே. சிவாஜிலிங்கம், தமிழீழ விடுதலை இயக்கத்தின் (TELO) ஊடாகத் தனது அரசியல் பயணத்தை ஆரம்பித்தார்.
-
நாடாளுமன்றப் பிரதிநிதித்துவம்: கடந்த 2001 மற்றும் 2004 ஆம் ஆண்டுகளில் நடைபெற்ற பொதுத் தேர்தல்களில் தமிழ்த் தேசியக் கூட்டமைப்பின் சார்பில் யாழ்ப்பாண மாவட்டத்தில் போட்டியிட்ட அவர், அவ்விரண்டு சந்தர்ப்பங்களிலும் நாடாளுமன்றத்திற்குத் தெரிவானார்.
-
ஜனாதிபதித் தேர்தல் மற்றும் மாகாண சபை: கடந்த 2010 ஆம் ஆண்டு நடைபெற்ற ஜனாதிபதித் தேர்தலில் சுயேச்சை வேட்பாளராகப் போட்டியிட்டதுடன், 2013 ஆம் ஆண்டு நடைபெற்ற வடக்கு மாகாண சபைத் தேர்தலில் போட்டியிட்டு மாகாண சபை உறுப்பினராகவும் பணியாற்றினார்.
போர் நிறைவடைந்ததன் பின்னர் வடக்கு, கிழக்கு மக்களின் பிரச்சினைகளுக்காகக் குரல்கொடுத்து, இப்பகுதிகளில் முன்னெடுக்கப்பட்ட பல்வேறு போராட்டங்கள் மற்றும் உண்ணாவிரதப் போராட்டங்களுக்குத் தலைமை தாங்கிச் செயற்பட்டார். அத்துடன், பல தமிழ்க் கட்சிகளின் இணைப்பில் தமிழ்த் தேசியக் கூட்டமைப்பை உருவாக்குவதற்கும் அவர் தீவிர பங்களிப்பை வழங்கியிருந்தமை குறிப்பிடத்தக்கது.
காலமான அன்னாரின் பூதவுடல் மீதான இறுதிக் கிரியைகள் யாழ்ப்பாணம், வல்வெட்டித்துறைப் பகுதியில் நடைபெறவுள்ளன.
வடக்கு, கிழக்கு தமிழ் அரசியல் களத்தில் நீண்டகால அனுபவம் கொண்ட சிரேஷ்ட அரசியல்வாதியான எம்.கே.சிவாஜிலிங்கம், இராணுவம், பொலிஸ் மற்றும் இராணுவத்தின் ஆதரவுடன் இயங்கிய ஆயுதக் குழுக்களின் தாக்குதல்களுக்கு இலக்காகியும் எதற்கும் அஞ்சாது தமிழ் மக்களின் உரிமைப் போராட்டங்களிலும் அரசியல் செயற்பாடுகளிலும் தீவிரமாகப் பங்காற்றியவர் ஆவார்.
அரசியல் நகர்வுகள்
2009ஆம் ஆண்டு தமிழர்களின் ஆயுதப் போராட்டம் மௌனிக்கப்பட்ட பின்னர், இராணுவத்தினர், பொலிஸார் மற்றும் அரச புலனாய்வாளர்களின் பல்வேறு அச்சுறுத்தல்களுக்கு மத்தியிலும் தமிழ்த் தேசிய நினைவேந்தல் நிகழ்வுகளைத் துணிவுடன் முன்னின்று நடத்தி வந்த பெருமை இவரையே சாரும்.
ரெலோ அமைப்பின் மூத்த உறுப்பினராக இருந்த இவர், 2001 மற்றும் 2004ஆம் ஆண்டுகளில் நடைபெற்ற பொதுத்தேர்தல்களில் தமிழ்த் தேசியக் கூட்டமைப்பின் ஊடாக யாழ்ப்பாணம் மாவட்டத்தில் போட்டியிட்டு வெற்றியீட்டி நாடாளுமன்ற உறுப்பினராகப் பணியாற்றினார்.

2013ஆம் ஆண்டு நடைபெற்ற வடக்கு மாகாண சபைத் தேர்தலில் யாழ்ப்பாணம் மாவட்டத்தில் போட்டியிட்டு உறுப்பினராகத் தெரிவு செய்யப்பட்டு பணியாற்றினார்.
பின்னர் ரெலோ கட்சியிலிருந்து விலகித் தமிழ்த் தேசியக் கட்சியில் பொதுச்செயலாளராகப் பதவி வகித்த அவர், இறுதியாக நடைபெற்ற உள்ளூராட்சி சபைத் தேர்தலில் தமிழ்த் தேசியப் பேரவையின் சார்பில் வல்வெட்டித்துறை நகர சபையின் உறுப்பினராகத் தெரிவு செய்யப்பட்டு, தவிசாளராகப் பொறுப்பு வகித்து நகர அபிவிருத்தி மற்றும் நிர்வாகப் பணிகளை முன்னெடுத்து வந்தார்.
அன்னாரது மறைவுக்குத் தமிழ் அரசியல் தலைவர்கள், மக்கள் பிரதிநிதிகள், பொதுமக்கள் மற்றும் நலன்விரும்பிகள் தமது ஆழ்ந்த இரங்கல்களைத் தெரிவித்து வருகின்றனர்.


