பிரிவினால் (Social Indicator) அண்மையில் வெளியிடப்பட்ட "ஜனநாயக ஆட்சி மீதான நம்பிக்கைச் சுட்டி" (Confidence in Democratic Governance Index - Wave 7) தொடர்பான புதிய ஆய்வறிக்கையின் மூலம், ஜனாதிபதி அநுர குமார திஸாநாயக்க மீதான மக்கள் நம்பிக்கை 75.5% என்ற மிக உயர்ந்த மட்டத்திற்கு அதிகரித்துள்ளமை தெரியவந்துள்ளது.
அதேவேளை, எதிர்க்கட்சித் தலைவர் சஜித் பிரேமதாசவின் செயற்பாடுகள் குறித்து 64.9% வீதமான மக்கள் அதிருப்தி வெளியிட்டுள்ள அதேவேளை, அவர் 29.4% என்ற மிகக் குறைந்தளவிலான மக்கள் ஆதரவையே பெற்றுக்கொண்டுள்ளார்.
நாடளாவிய ரீதியில் 25 மாவட்டங்களையும் உள்ளடக்கும் வகையில் 1,240 நபர்களிடம் முன்னெடுக்கப்பட்ட இந்த புதிய ஆய்வில் பின்வரும் முக்கிய விபரங்கள் வெளிப்படுத்தப்பட்டுள்ளன:
சிறுபான்மையினர் மற்றும் இளைஞர்களின் ஆதரவுடன் அநுர முன்னிலையில்
ஜனாதிபதி அநுர குமார திஸாநாயக்க மீதான மக்கள் ஆதரவானது பல்வேறு சமூகக் கட்டமைப்புகள் மற்றும் இனக் குழுமங்களுக்கு மத்தியில் குறிப்பிடத்தக்க வளர்ச்சியைப் பதிவுசெய்துள்ளது.
-
சிறுபான்மை சமூகங்களின் பேராதரவு: ஜனாதிபதிக்கு மிக உயர்ந்த ஆதரவு மலையக தமிழ் மக்களிடமிருந்தே கிடைத்துள்ளது (94.4%). அத்துடன், முஸ்லிம் மக்களில் 93.4% வீதமானோரும், பெரும்பான்மை சிங்கள சமூகத்தைச் சேர்ந்த 69.9% வீதமானோரும் ஜனாதிபதியின் வேலைத்திட்டங்களுக்கு தமது ஆதரவை வெளிப்படுத்தியுள்ளனர்.
-
இளைஞர்கள் மற்றும் கிராமப்புற மக்களின் ஈர்ப்பு: 18 முதல் 29 வயதுக்கு இடைப்பட்ட இளம் தலைமுறையினரில் 81.6% வீதமானோர் ஜனாதிபதிக்கு தமது ஆதரவை வழங்கியுள்ள அதேவேளை, கிராமப்புற மக்களில் 76.4% வீதமானோர் அவர் மீது நம்பிக்கை வைத்துள்ளனர். இதேவேளை, அனைத்து மக்கள் பிரிவினரிடையேயும் எதிர்க்கட்சித் தலைவர் சஜித் பிரேமதாசவிற்கான ஆதரவு மிகவும் குறைந்த மட்டத்திலேயே காணப்படுகின்றது.
ஈஸ்டர் தாக்குதல் விசாரணை மற்றும் அரசாங்கத்தின் நிர்வாகத் திறன்
தேசிய மக்கள் சக்தி (NPP) அரசாங்கத்தின் ஆட்சி முறைமை மற்றும் முக்கிய விசாரணைகள் தொடர்பிலும் மக்கள் தமது சாதகமான நிலைப்பாட்டை வெளிப்படுத்தியுள்ளனர்:
-
விசாரணைகளின் நகர்வு: ஈஸ்டர் ஞாயிறு குண்டுத்தாக்குதல்களுடன் தொடர்புடைய குற்றவாளிகளை சட்டத்தின் முன் நிறுத்துவதற்கு அரசாங்கம் எடுக்கும் முயற்சிகள் குறித்து 51.6% வீதமானோர் திருப்தி வெளியிட்டுள்ளனர். குறிப்பாக இதில் முஸ்லிம் (73.3%) மற்றும் மலையக தமிழ் (72.2%) சமூகங்களே அதிகளவிலான திருப்தியை வெளிப்படுத்தியுள்ளனர்.
-
நிர்வாகத் திறன்: தேசிய மக்கள் சக்தி அரசாங்கத்தினால் நாட்டுக்கு வினைத்திறனானதொரு ஆட்சியை வழங்க முடியும் என்ற முழுமையான நம்பிக்கை ஒட்டுமொத்த இலங்கையர்களில் 62.8% வீதமானோரிடம் காணப்படுகின்றது.
சர்ச்சைக்குரிய விடயங்களும் கட்டமைப்பு மாற்றங்களும்
அரசாங்கத்தின் அரசியல் பலம் ஸ்திரமாக உள்ளபோதிலும், பொருளாதார மற்றும் அரசியலமைப்பு ரீதியான சில முக்கிய விடயங்களில் பொதுமக்களின் கருத்துக்கள் வேறுபட்டுக் காணப்படுகின்றன:
-
வாழ்க்கைச் செலவு நெருக்கடி: அரசாங்கம் வாழ்க்கைச் செலவைக் கட்டுப்படுத்தும் விதம் குறித்து மக்களின் கருத்துக்கள் சம அளவில் பிளவுபட்டுள்ளன. இதில் 45.3% வீதமானோர் அரசாங்கத்தின் செயற்பாடுகளை ஆதரிக்கும் அதேவேளை, 44% வீதமானோர் அதற்கு தமது அதிருப்தியை வெளியிட்டுள்ளனர்.
-
நிறைவேற்று அதிகார ஜனாதிபதி முறை மற்றும் மாகாண சபைகள்: இலங்கையர்களில் 64.1% வீதமானோர் நிறைவேற்று அதிகார ஜனாதிபதி முறையை ஒழிப்பதற்கு ஆதரவு தெரிவித்துள்ள போதிலும், அந்தச் செயல்முறையை உடனடியாக ஆரம்பிக்க வேண்டும் என 23.6% வீதமானோரே நம்புகின்றனர். அத்துடன், 67% வீதமானோர் மாகாண சபை தேர்தல்களை உடனடியாக நடத்துவது அவசியமானது எனக் கருதுகின்றனர்.