முன்னாள் அமைச்சர் எஸ்.பீ.யின் சகோதரர் கைது!

முன்னாள் அமைச்சர் எஸ்.பீ. திஸாநாயக்கவின் சகோதரரும் முன்னாள் மாகாண சபை உறுப்பினருமான ஜயலத் பண்டார திஸாநாயக்க கைது செய்யப்பட்டுள்ளார்.

மதுவரி அனுமதிப்பத்திரமொன்றை (Excise License) பெற்றுத் தருவதாகக் கூறி, வீரகெட்டிய பிரதேசத்தைச் சேர்ந்த நபரொருவரிடமிருந்து 27,500,000/= (இரண்டு கோடியே எழுபத்தைந்து இலட்சம்) ரூபா பணத்தை மோசடி செய்தமை தொடர்பில் மத்திய குற்றப் புலனாய்வுப் பணியகத்திற்கு (Central Criminal Investigation Department) கிடைக்கப்பெற்ற முறைப்பாட்டிற்கு அமைய, அதன் நிதி மற்றும் வர்த்தக குற்றப் புலனாய்வுப் பிரிவினரால் விசாரணைகள் ஆரம்பிக்கப்பட்டிருந்தன.

இதற்கமைய, குறித்த விசாரணை அதிகாரிகளினால் நேற்றைய தினம் (ஜூலை 14ஆம் திகதி) காலை வேளையில் ஹங்குரன்கெத்த பிரதேசத்தில் வைத்து ஜயலத் பண்டார திஸாநாயக்க கைது செய்யப்பட்டுள்ளார்.

58 வயதுடைய சந்தேகநபர் இன்றைய தினம் (ஜூலை 15ஆம் திகதி) நுகேகொட நீதவான் நீதிமன்றில் ஆஜர்படுத்தப்படவுள்ளதுடன், மத்திய குற்றப் புலனாய்வுப் பணியகத்தினர் இது தொடர்பான மேலதிக விசாரணைகளை மேற்கொண்டு வருகின்றனர்.