சுகாதார அமைச்சில் புதிதாக நியமிக்கப்பட்ட முஸ்லிம் பெண் உத்தியோகத்தர்களுக்கு இடையூறு ஏற்படுத்தப்பட்டதாக முறைப்பாடு!

கிழக்கு மாகாணத்திலுள்ள வைத்தியசாலையொன்றிற்குப் புதிய நியமனங்களைப் பெற்ற முஸ்லிம் பெண் உத்தியோகத்தர்கள் குழுவினர், அவர்கள் அணிந்திருந்த ஆடையைக் காரணம்காட்டி பணிக்கு அறிக்கை இடுவதை வைத்தியசாலை அதிகாரி தடுத்தமையைக் கேள்விக்குட்படுத்தி முறைப்பாடுகள் பதிவு செய்யப்பட்டுள்ளன.

கல்முனை வடக்கு ஆதார வைத்தியசாலையில் இளநிலை சுகாதார பணி உதவியாளர் பதவிக்கு நியமனம் பெற்ற 9 முஸ்லிம் யுவதிகள் ஆகஸ்ட் 06 ஆம் திகதி பணிப் பொறுப்புகளைப் ஏற்றுக்கொள்ளச் சென்றபோது, அவர்கள் அணிந்திருந்த ஆடையுடன் பணிக்கு அறிக்கை இட அனுமதிக்க முடியாது எனக் கூறி, வருகைப் பதிவேட்டில் கையொப்பமிட வைத்தியசாலையின் பிரதிப் பணிப்பாளர் வைத்தியர் ஸ்ரீ சங்கர் அனுமதிக்கவில்லை.

அதற்கு அடுத்த நாளும் பணிக்கு அறிக்கை இடுவதற்காக வைத்தியசாலைக்குச் சென்ற வேளையில், அந்த முஸ்லிம் உத்தியோகத்தர்களுக்கு அதே கதியே ஏற்பட்டது.

அரசாங்க தகவல் திணைக்களத்தில் ஆகஸ்ட் 11 ஆம் திகதி நடைபெற்ற அமைச்சரவைத் தீர்மானங்களை அறிவிக்கும் ஊடகவியலாளர் சந்திப்பில், ஊடகவியலாளர் ஒருவர் சுகாதார மற்றும் ஊடகத்துறை அமைச்சர் வைத்தியர் நளிந்த ஜயதிஸ்ஸவிடம், குறித்த முஸ்லிம் உத்தியோகத்தர்கள் குழுவினர் தமது சீருடைக்கு மேலாக ‘நீளமான காற்சட்டை, கைகளை மூடும் ஆடை மற்றும் தலையை மூடும் வகையில் சால்வை (Scarf)’ அணிந்திருந்ததாகச் சுட்டிக்காட்டினார்.

மனித உரிமைகள் ஆணைக்குழுவில் முறைப்பாடும் சட்டபூர்வ பின்னணியும்

வைத்தியசாலை அதிகாரி தொடர்ந்து பணிக்கு அறிக்கை இட அனுமதிக்காமை தொடர்பில் அவ்வுத்தியோகத்தர்களில் 5 பேர் ஆகஸ்ட் 10 ஆம் திகதி இலங்கை மனித உரிமைகள் ஆணைக்குழுவில் முறைப்பாடு செய்துள்ளனர். அவர்கள் சார்பில் முன்னிலையாகும் சட்டத்தரணி எம். எம். எம். முகஸம், இவ்விடயத்தை வைத்தியசாலை அதிகாரிகளுடன் கலந்துரையாடித் தீர்ப்பதற்கு எடுத்த முயற்சியும் தோல்வியடைந்ததாகப் பிராந்திய ஊடகவியலாளர்களுக்குத் தெரிவித்தார்.

"வைத்தியசாலையின் பிரதிப் பணிப்பாளர் வைத்தியர் ஸ்ரீ சங்கர் மற்றும் மற்றொரு வைத்திய அத்தியாட்சகரான வைத்தியர் ரஜேந்திரன் ஆகியோரைச் சந்தித்து இது குறித்து நாங்கள் வினவினோம். மேலும், இந்த விவகாரத்தை வைத்தியசாலை வளாகத்திற்குள்ளேயே உள்வாரி நடைமுறையின் கீழ் தீர்க்க முடியுமா என்றும் ஆராய்ந்தோம். ஆனால், அவ்வளவு இலகுவான நடைமுறைகள் அங்கில்லை என்பது பேச்சுவார்த்தைக்குப் பின்னரே தெளிவானது" என சட்டத்தரணி தெரிவித்தார்.

அரச நிர்வாக, பேரிடர் மேலாண்மை மற்றும் கிராமிய பொருளாதார விவகாரங்கள் அமைச்சினால் 2019.06.26 ஆம் திகதி அரசாங்க உத்தியோகத்தர்களின் ஆடை தொடர்பாக வெளியிடப்பட்ட சுற்றறிக்கையைத் தான் வைத்தியசாலை அதிகாரிகளின் கவனத்திற்குக்கொண்டு சென்றதாகச் சட்டத்தரணி எம். எம். எம். முகஸம் வலியுறுத்துகிறார்.

அமைச்சின் செயலாளர் ஜே.ஜே. ரத்னசிறியினால் 2019.06.26 அன்று வெளியிடப்பட்ட அரச நிர்வாக சுற்றறிக்கை 13/2019(1) இன் படி, 'அரச சேவையின் கண்ணியத்தைப் பேணும் பொருத்தமான ஆடையை அணிந்த' பின்னர், 'ஏதேனும் மதச்சடங்குகளுக்கு அமைவாகத் தமது ஆடையை அமைத்துக் கொண்டுள்ள உத்தியோகத்தர்கள் இருப்பின், அவர்கள் சீருடையை அணிந்த பின்னர் அந்த மத அடையாளத்தை உறுதிப்படுத்தும் வகையில் முழு முகமும் தெளிவாகத் தெரியும் வகையில் (இரு காதுகளும் உட்படாமல்) மேலதிக ஆடையைப் பயன்படுத்தலாம்' எனக் குறிப்பிடப்பட்டுள்ளது.

சட்டத்தரணி ருடானி சாஹிருடன் இணைந்து ஆகஸ்ட் 10 ஆம் திகதி இலங்கை மனித உரிமைகள் ஆணைக்குழுவின் அம்பாறை பிராந்தியக் கிளையில் முறைப்பாட்டைச் சமர்ப்பிக்க முதன்மை வகித்த சட்டத்தரணி எம். எம். எம். முகஸம், கல்முனை வடக்கு ஆதார வைத்தியசாலையின் பணிப்பாளர், பிரதிப் பணிப்பாளர் மற்றும் ஒழுக்காற்று அதிகாரி ஆகியோர் 2019 ஆம் ஆண்டின் சுற்றறிக்கையை மீறியுள்ளதாக ஊடகங்களிடம் சுட்டிக்காட்டினார்.

வைத்தியசாலை நிர்வாகத்தின் நிலைப்பாடும் அரசியல் ரீதியான எதிர்வினைகளும்

சுகாதாரப் பணி உதவியாளர்களுக்குத் தனிச் சுற்றறிக்கை உள்ளதாகவும், ஆடை தொடர்பில் சுற்றறிக்கை இருப்பதால் அதற்கு நிச்சயமாகக் கட்டுப்பட வேண்டும் என்றும் வைத்தியசாலை அதிகாரிகள் சட்டத்தரணிகளுடனான சந்திப்பில் வலியுறுத்தியதாகச் சட்டத்தரணி முகஸம் கூறுகிறார்.

முஸ்லிம் யுவதிகளுக்கு ஆடையைக் காரணம்காட்டி பணிக்கு அறிக்கை இட அனுமதிக்காமை குறித்து ஆகஸ்ட் 11 ஆம் திகதி நடைபெற்ற அமைச்சரவை முடிவுகளை அறிவிக்கும் ஊடகவியலாளர் சந்திப்பில், சுகாதார மற்றும் ஊடகத்துறை அமைச்சரும் ஆளும் தரப்பின் முதன்மைச் அமைப்பாளருமான வைத்தியர் நளிந்த ஜயதிஸ்ஸவிடம் கேள்வி எழுப்பப்பட்டது.

அதற்குப் பதிலளித்த அமைச்சர், அந்தத் தருணம் வரை அது குறித்துத் தனக்குத் தெரியாது எனக் குறிப்பிட்டதுடன், "வெளியே இன்னும் தொண்ணூறாயிரம் பேர் காத்துக்கொண்டிருக்கிறார்கள். எனவே தேவையில்லாத பிரச்சினைகளை உருவாக்கி வைத்தியசாலைச் சேவைகளை முடக்க வேண்டாம்" என எச்சரித்தார்.

பிரச்சினைகள் இருப்பின் அது குறித்துச் சுகாதார அமைச்சிடம் முறைப்பாடு செய்யுமாறும் அமைச்சர் சுகாதார ஊழியர்களிடம் கேட்டுக்கொண்டார்.

இதனைத் தொடர்ந்து, முஸ்லிம் உத்தியோகத்தர்கள் சந்தித்துள்ள இந்தச் சிக்கலான நிலைமை குறித்துத் தமது கட்சி சார்பில் சுகாதார அமைச்சின் செயலாளரிடம் முறைப்பாடு செய்துள்ளதாகச் சமூக நீதிக்கட்சியின் தலைவரும் தெஹிவளை-கல்கிஸ்ஸ மாநகர சபை உறுப்பினருமான அர்கம் முனீர் ஆகஸ்ட் 12 ஆம் திகதி ஊடகவியலாளர்களிடம் தெரிவித்தார்.