உலக முன்னணி தொழில்நுட்ப நிறுவனமான ஆப்பிள் (Apple), தனது முதலாவது மடிக்கக்கூடிய ஸ்மார்ட்போனான 'iPhone Duo' ஐ அண்மையில் உத்தியோகபூர்வமாக அறிமுகப்படுத்தியது. கலிபோர்னியாவின் குபெர்டினோவில் உள்ள ஸ்டீவ் ஜாப்ஸ் அரங்கில் நடைபெற்ற இந்த நிகழ்வில், புதிய தலைமை நிர்வாக அதிகாரி ஜான் டர்னஸால் இந்த சாதனம் வெளிப்படுத்தப்பட்டது. இதன் தொடக்க விலை அமெரிக்கச் சந்தையில் 1,999 டொலர்களாகக் குறிப்பிடப்பட்டுள்ளதுடன், அதிக சேமிப்பகத்தைக் கொண்ட மாதிரியின் விலை 3,199 டொலர்கள் வரை உயர்கிறது. நவீன தொழில்நுட்ப அம்சங்களைக் கொண்டிருந்தபோதிலும், இவ்வளவு அதிக விலைக்கு இந்தத் தொலைபேசியை யார் வாங்குவார்கள் என்பது குறித்து துறை சார்ந்த ஆய்வாளர்களிடையே தற்போது பரந்த விவாதம் எழுந்துள்ளது.
தயாரிப்பின் தனித்துவமும் பயன்பாட்டின் தெளிவின்மையும்
புதிய 'iPhone Duo' சாதனமானது வேலைகள், படைப்பாற்றல் சார்ந்த பணிகள் மற்றும் பொழுதுபோக்கு ஆகியவற்றிற்கு ஒரே மாதிரியாகப் பயன்படுத்தக்கூடிய விரிவடையும் திரையைக் (expanded display) கொண்டுள்ளதாக ஆப்பிள் நிறுவனம் சுட்டிக்காட்டுகிறது. ஐபேட் (iPad) கணினியின் அனுபவத்தை வழங்கும் அதே வேளையில், பயனரின் தனிப்பட்ட செயற்கை நுண்ணறிவு மையமாக (personal AI hub) இது செயல்படும் என நிறுவனத்தின் தலைமை நிர்வாகி ஜான் டர்னஸ் வலியுறுத்தினார். இருப்பினும், வழக்கமாக ஓர் ஆப்பிள் தயாரிப்பு மூலம் தீர்க்கப்படும் குறிப்பிட்ட நுகர்வோர் தேவை என்ன என்பது இம்முறை தெளிவாக வரையறுக்கப்படவில்லை என விமர்சகர்கள் தெரிவிக்கின்றனர்.
'கிரியேட்டிவ் ஸ்ட்ராடஜிஸ்' (Creative Strategies) நிறுவனத்தின் ஆய்வாளர் கரோலினா மிலனேசி குறிப்பிடுகையில், வழக்கத்திற்கு மாறாக இம்முறை தயாரிப்பின் குறிப்பிட்ட வாடிக்கையாளர் யார் என்பதை விளக்குவதில் ஆப்பிள் நிறுவனம் பின்னடைவைக் காட்டியுள்ளதாகத் தெரிவித்தார். மேலும், 'கவுண்டர்பாயிண்ட் ரிசர்ச்' (Counterpoint Research) நிறுவனத்தின் துணைத் தலைவர் நீல் ஷா, இந்தச் சாதனம் முதன்மையாக தொழில்முறை பயன்பாட்டிற்கா அல்லது பொழுதுபோக்கிற்கா என்பது தொடர்பான சந்தைப்படுத்தலில் (positioning) தெளிவின்மை தென்படுவதாகச் சுட்டிக்காட்டுகிறார்.
சந்தைப் போட்டியும் எதிர்காலப் போக்கும்
மடிக்கக்கூடிய தொலைபேசி சந்தையில் 2019 ஆம் ஆண்டு முதல் தென் கொரியாவின் சாம்சங் (Samsung) நிறுவனம் முன்னிலையில் உள்ளது. கூகுள் (Google) மற்றும் சீனாவின் ஹுவாவே (Huawei) போன்ற நிறுவனங்களும் இத்துறையில் போட்டியிடும் அதே வேளையில், சாம்சங் நிறுவனம் தற்போது சந்தையில் சுமார் 40% பங்கைக் தக்கவைத்துக் கொண்டுள்ளது. IDC ஆராய்ச்சி நிறுவனத்தின் கூற்றுப்படி, மடிக்கக்கூடிய தொலைபேசிகள் இன்னும் உலகளாவிய ஸ்மார்ட்போன் சந்தையில் 3% க்கும் குறைவான சிறிய பங்கையே பிரதிநிதித்துவப்படுத்துகின்றன.
இருப்பினும், ஆப்பிள் பிராண்டிற்கு உள்ள அதிக ஈர்ப்பு காரணமாக, நடப்பாண்டு நிறைவடைவதற்குள் 'iPhone Duo' வின் சுமார் 6 மில்லியன் சாதனங்கள் விற்பனையாகும் என 'கவுண்டர்பாயிண்ட்' நிறுவனம் கணித்துள்ளது. இதன் மூலம் குறுகிய காலத்தில் இந்தச் சந்தையின் நான்கில் ஒரு பங்கை ஆப்பிள் கைப்பற்ற வாய்ப்புள்ளது. 'ஓம்தியா' (Omdia) ஆராய்ச்சி அறிக்கைகளின்படி, ஆப்பிளின் இந்த வருகையின் மூலம் ஒட்டுமொத்த மடிக்கக்கூடிய தொலைபேசி சந்தையும் 2021க்குப் பிறகு பதிவாகும் அதிகபட்ச வருடாந்திர வளர்ச்சியப் பதிவு செய்து 22.3 மில்லியன் சாதனங்களாக உயரும் என எதிர்பார்க்கப்படுகிறது.
ஆடம்பரச் சின்னம் மட்டுமே ஆகுமா?
'டெக்னாலிசிஸ் ரிசர்ச்' (TECHnalysis Research) நிறுவனத்தின் முதன்மை ஆய்வாளர் பாப் ஓ'டொனல் சுட்டிக்காட்டுகையில், தற்போதைய அதிக விலை காரணமாக இளைஞர்கள் உள்ளிட்ட பரந்த சமூகத்தை இந்தத் தொலைபேசி சென்றடைவது வரம்பிற்குட்படும் என்றார். ஆரம்பக் கட்டத்தில் இது பிரதானமாகச் சமூக அந்தஸ்தைப் பிரதிபலிக்கும் ஓர் ஆடம்பரச் சின்னமாக (status symbol) மற்றும் பணக்கார தொழில்நுட்ப ஆர்வலர்களின் வரம்பிற்குட்பட்ட தயாரிப்பாக மட்டுமே மாறுவதற்கான சாத்தியக்கூறுகள் இருப்பதாக ஆய்வாளர்கள் மேலும் தெரிவிக்கின்றனர்.